| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
আপত্তিপটিকম্মৰিধিকথা
Āpattipaṭikammavidhikathā
১৬৯. ভগৰতা পঞ্ঞত্তং ‘‘ন সাপত্তিকেন উপোসথো কাতব্বো’’তি ইদং ‘‘যস্স সিযা আপত্তী’’তিআদিৰচনেনেৰ পারিসুদ্ধিদানপঞ্ঞাপনেন চ পারিসুদ্ধিউপোসথপঞ্ঞাপনেন চ পঞ্ঞত্তং হোতীতি ৰেদিতব্বং। ইত্থন্নামং আপত্তিন্তি থুল্লচ্চযাদীসু একিস্সা নামং গহেত্ৰা ‘‘থুল্লচ্চযং আপত্তিং পাচিত্তিযং আপত্তি’’ন্তি এৰং ৰত্তব্বং। তং পটিদেসেমীতি ইদং ‘‘তং তুম্হমূলে, তং তুয্হমূলে পটিদেসেমী’’তি ৰুত্তেপি সুৰুত্তমেৰ হোতি। পস্সসীতি ইদঞ্চ ‘‘পস্সসি আৰুসো তং আপত্তিং, পস্সথ ভন্তে তং আপত্তি’’ন্তি এৰং ৰত্তব্বং। আম পস্সামীতি ইদং পন ‘‘আম ভন্তে পস্সামি, আম আৰুসো পস্সামী’’তি এৰং ৰুত্তম্পি সুৰুত্তমেৰ হোতি। আযতিং সংৰরেয্যাসীতি এত্থ পন সচে ৰুড্ঢতরো ‘‘আযতিং সংৰরেয্যাথা’’তি ৰত্তব্বো। এৰং ৰুত্তেন পন ‘‘সাধু সুট্ঠু সংৰরিস্সামী’’তি ৰত্তব্বমেৰ।
169.Bhagavatā paññattaṃ ‘‘na sāpattikena uposatho kātabbo’’ti idaṃ ‘‘yassa siyā āpattī’’tiādivacaneneva pārisuddhidānapaññāpanena ca pārisuddhiuposathapaññāpanena ca paññattaṃ hotīti veditabbaṃ. Itthannāmaṃ āpattinti thullaccayādīsu ekissā nāmaṃ gahetvā ‘‘thullaccayaṃ āpattiṃ pācittiyaṃ āpatti’’nti evaṃ vattabbaṃ. Taṃ paṭidesemīti idaṃ ‘‘taṃ tumhamūle, taṃ tuyhamūle paṭidesemī’’ti vuttepi suvuttameva hoti. Passasīti idañca ‘‘passasi āvuso taṃ āpattiṃ, passatha bhante taṃ āpatti’’nti evaṃ vattabbaṃ. Āma passāmīti idaṃ pana ‘‘āma bhante passāmi, āma āvuso passāmī’’ti evaṃ vuttampi suvuttameva hoti. Āyatiṃ saṃvareyyāsīti ettha pana sace vuḍḍhataro ‘‘āyatiṃ saṃvareyyāthā’’ti vattabbo. Evaṃ vuttena pana ‘‘sādhu suṭṭhu saṃvarissāmī’’ti vattabbameva.
যদা নিব্বেমতিকোতি এত্থ সচে পনেস নিব্বেমতিকো ন হোতি, ৰত্থুং কিত্তেত্ৰাৰ দেসেতুং ৰট্টতীতি অন্ধকট্ঠকথাযং ৰুত্তং। তত্রাযং দেসনাৰিধি – সচে মেঘচ্ছন্নে সূরিযে ‘‘কালো নু খো নো’’তি ৰেমতিকো ভুঞ্জতি, তেন ভিক্খুনা ‘‘অহং ভন্তে ৰেমতিকো ভুঞ্জিং’’, সচে কালো অত্থি, ‘‘সম্বহুলা দুক্কটা আপত্তিযো আপন্নোম্হি, নো চে অত্থি, ‘‘সম্বহুলা পাচিত্তিযা আপন্নোম্হী’’তি এৰং ৰত্থুং কিত্তেত্ৰা ‘‘অহং ভন্তে যা তস্মিং ৰত্থুস্মিং সম্বহুলা দুক্কটা ৰা পাচিত্তিযা ৰা আপত্তিযো আপন্নো, তা তুম্হমূলে পটিদেসেমী’’তি ৰত্তব্বং। এস নযো সব্বাপত্তীসু।
Yadā nibbematikoti ettha sace panesa nibbematiko na hoti, vatthuṃ kittetvāva desetuṃ vaṭṭatīti andhakaṭṭhakathāyaṃ vuttaṃ. Tatrāyaṃ desanāvidhi – sace meghacchanne sūriye ‘‘kālo nu kho no’’ti vematiko bhuñjati, tena bhikkhunā ‘‘ahaṃ bhante vematiko bhuñjiṃ’’, sace kālo atthi, ‘‘sambahulā dukkaṭā āpattiyo āpannomhi, no ce atthi, ‘‘sambahulā pācittiyā āpannomhī’’ti evaṃ vatthuṃ kittetvā ‘‘ahaṃ bhante yā tasmiṃ vatthusmiṃ sambahulā dukkaṭā vā pācittiyā vā āpattiyo āpanno, tā tumhamūle paṭidesemī’’ti vattabbaṃ. Esa nayo sabbāpattīsu.
ন ভিক্খৰে সভাগা আপত্তীতি এত্থ যং দ্ৰেপি জনা ৰিকালভোজনাদিনা সভাগৰত্থুনা আপত্তিং আপজ্জন্তি, এৰরূপা ৰত্থুসভাগা ‘‘সভাগা’’তি ৰুচ্চতি। ৰিকালভোজনপ্পচ্চযা আপন্নং পন অনতিরিত্তভোজনপচ্চযা আপন্নস্স সন্তিকে দেসেতুং ৰট্টতি। যাপি চাযং ৰত্থুসভাগা, সাপি দেসিতা সুদেসিতাৰ। অঞ্ঞং পন দেসনপচ্চযা দেসকো, পটিগ্গহণপ্পচ্চযা পটিগ্গহকো চাতি উভোপি দুক্কটং আপজ্জন্তি, তং নানাৰত্থুকং হোতি, তস্মা অঞ্ঞমঞ্ঞং দেসেতুং ৰট্টতি।
Na bhikkhave sabhāgā āpattīti ettha yaṃ dvepi janā vikālabhojanādinā sabhāgavatthunā āpattiṃ āpajjanti, evarūpā vatthusabhāgā ‘‘sabhāgā’’ti vuccati. Vikālabhojanappaccayā āpannaṃ pana anatirittabhojanapaccayā āpannassa santike desetuṃ vaṭṭati. Yāpi cāyaṃ vatthusabhāgā, sāpi desitā sudesitāva. Aññaṃ pana desanapaccayā desako, paṭiggahaṇappaccayā paṭiggahako cāti ubhopi dukkaṭaṃ āpajjanti, taṃ nānāvatthukaṃ hoti, tasmā aññamaññaṃ desetuṃ vaṭṭati.
১৭০. সামন্তো ভিক্খু এৰমস্স ৰচনীযোতি এত্থ সভাগোযেৰ ৰত্তব্বো। ৰিসভাগস্স হি ৰুচ্চমানে ভণ্ডনকলহসঙ্ঘভেদাদীনিপি হোন্তি, তস্মা তস্স অৰত্ৰা ‘‘ইতো ৰুট্ঠহিত্ৰা পটিকরিস্সামী’’তি আভোগং কত্ৰা উপোসথো কাতব্বোতি অন্ধকট্ঠকথাযং ৰুত্তং।
170.Sāmanto bhikkhu evamassa vacanīyoti ettha sabhāgoyeva vattabbo. Visabhāgassa hi vuccamāne bhaṇḍanakalahasaṅghabhedādīnipi honti, tasmā tassa avatvā ‘‘ito vuṭṭhahitvā paṭikarissāmī’’ti ābhogaṃ katvā uposatho kātabboti andhakaṭṭhakathāyaṃ vuttaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৯২. আপত্তিপটিকম্মৰিধি • 92. Āpattipaṭikammavidhi
৯৩. আপত্তিআৰিকরণৰিধি • 93. Āpattiāvikaraṇavidhi
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / আপত্তিপটিকম্মৰিধিকথাৰণ্ণনা • Āpattipaṭikammavidhikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / আপত্তিপটিকম্মৰিধিকথাদিৰণ্ণনা • Āpattipaṭikammavidhikathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছন্দদানকথাদিৰণ্ণনা • Chandadānakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৯২. আপত্তিপটিকম্মৰিধিকথা • 92. Āpattipaṭikammavidhikathā
