| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৯২. আপত্তিপটিকম্মৰিধিকথা
92. Āpattipaṭikammavidhikathā
১৬৯. ভগৰতা…পে॰… কাতব্বোতি ইদং ৰেদিতব্বন্তি সম্বন্ধো। ‘‘যস্স সিযা আপত্তীতিআদিৰচনেনেৰ চা’’তিআদিহেতুত্তযেন ‘‘ন সাপত্তিকেন উপোসথো কাতব্বো’’তি যথারুতং অপঞ্ঞত্তম্পি অত্থতো সিদ্ধমেৰাতি দস্সেতি। হেতুত্তযং ‘‘ৰেদিতব্ব’’ন্তি পদেন যোজেতব্বং। থুল্লচ্চযাদীসূতি আদিসদ্দেন পাচিত্তিযপাটিদেসনীযদুক্কটদুব্ভাসিতাপত্তিযো সঙ্গণ্হাতি। ‘‘তং পটিদেসেমী’’তি ইদং সুৰুত্তমেৰ হোতীতি সম্বন্ধো। তন্তি আপত্তিং। তুম্হমূলেতি তুম্হং সন্তিকে। নিগ্গহিতলোপঞ্হি ৰাক্যমেৰ, ন সমাসো। ‘‘তুম্হ’’ ইতি চ ‘‘তুয্হ’’ ইতি চ নৰকত্থেরানং ৰত্তব্বাকারদস্সনমত্তমেৰ, ন ইচ্ছিতত্থৰিপত্তিদস্সনং। ৰুত্তম্পীতি পিসদ্দেন ন কেৰলং পাল়িনযেনেৰ সুৰুত্তং, ইমিনা নযেনপি সুৰুত্তন্তি দস্সেতি। ‘‘পস্সসী’’তি ইদঞ্চ ৰত্তব্বন্তি সম্বন্ধো। ৰত্তব্বাকারং পন সুৰিঞ্ঞেয্যং। ‘‘আম পস্সামী’’তি ইদং পন সুৰুত্তমেৰ হোতীতি সম্বন্ধো। ৰুত্তম্পীতি পিসদ্দো পাল়িনযং সম্পিণ্ডেতি। আযতিং সংৰরেয্যাসীতি এত্থ পন ৰত্তব্বোতি সম্বন্ধো। গরূসু বহুৰচনস্স কত্তব্বত্তা ৰুত্তং ‘‘সংৰরেয্যাথা’’তি। এৰং ৰুত্তেন আপত্তিদেসকেনাতি সম্বন্ধো।
169. Bhagavatā…pe… kātabboti idaṃ veditabbanti sambandho. ‘‘Yassa siyā āpattītiādivacaneneva cā’’tiādihetuttayena ‘‘na sāpattikena uposatho kātabbo’’ti yathārutaṃ apaññattampi atthato siddhamevāti dasseti. Hetuttayaṃ ‘‘veditabba’’nti padena yojetabbaṃ. Thullaccayādīsūti ādisaddena pācittiyapāṭidesanīyadukkaṭadubbhāsitāpattiyo saṅgaṇhāti. ‘‘Taṃ paṭidesemī’’ti idaṃ suvuttameva hotīti sambandho. Tanti āpattiṃ. Tumhamūleti tumhaṃ santike. Niggahitalopañhi vākyameva, na samāso. ‘‘Tumha’’ iti ca ‘‘tuyha’’ iti ca navakattherānaṃ vattabbākāradassanamattameva, na icchitatthavipattidassanaṃ. Vuttampīti pisaddena na kevalaṃ pāḷinayeneva suvuttaṃ, iminā nayenapi suvuttanti dasseti. ‘‘Passasī’’ti idañca vattabbanti sambandho. Vattabbākāraṃ pana suviññeyyaṃ. ‘‘Āma passāmī’’ti idaṃ pana suvuttameva hotīti sambandho. Vuttampīti pisaddo pāḷinayaṃ sampiṇḍeti. Āyatiṃ saṃvareyyāsīti ettha pana vattabboti sambandho. Garūsu bahuvacanassa kattabbattā vuttaṃ ‘‘saṃvareyyāthā’’ti. Evaṃ vuttena āpattidesakenāti sambandho.
তত্রাতি ‘‘যদা নিব্বেমতিকো’’তি পাঠে। সূরিযে মেঘচ্ছন্নে সতীতি যোজনা। তেন ভিক্খুনা ৰত্তব্বন্তি সম্বন্ধো, ৰত্থুং কিত্তেত্ৰাতি ভোজনসঙ্খাতং ৰত্থুং কিত্তেত্ৰা। তাতি আপত্তিযো।
Tatrāti ‘‘yadā nibbematiko’’ti pāṭhe. Sūriye meghacchanne satīti yojanā. Tena bhikkhunā vattabbanti sambandho, vatthuṃ kittetvāti bhojanasaṅkhātaṃ vatthuṃ kittetvā. Tāti āpattiyo.
সভাগা আপত্তীতি এত্থ দ্ৰীসু ৰত্থুসভাগআপত্তিসভাগাসু ৰত্থুসভাগাৰ অধিপ্পেতাতি দস্সেন্তো আহ ‘‘যং দ্ৰেপি জনা’’তিআদি। যং আপত্তিন্তি সম্বন্ধো। সমানো ভাগো এতাসন্তি সভাগা। দেসেতুং ৰট্টতীতি আপত্তিসভাগাপি ৰত্থুৰিসভাগত্তা দেসেতুং ৰট্টতি। সুদেসিতাৰাতি আপত্তিতো ভিক্খু ৰুট্ঠাতিযেৰাতি অধিপ্পাযো। অঞ্ঞং দুক্কটন্তি সম্বন্ধো। পনসদ্দো গরহত্থজোতকো সুদেসিতায গরহাকারেন পৰত্তত্তা। কিঞ্চাপি সুদেসিতাৰ, পন তথাপীতি যোজনা। তন্তি দুক্কটং। নানাৰত্থুকন্তি দেসনাপটিগ্গহণৰসেন নানাৰত্থুকং।
Sabhāgā āpattīti ettha dvīsu vatthusabhāgaāpattisabhāgāsu vatthusabhāgāva adhippetāti dassento āha ‘‘yaṃ dvepi janā’’tiādi. Yaṃ āpattinti sambandho. Samāno bhāgo etāsanti sabhāgā. Desetuṃ vaṭṭatīti āpattisabhāgāpi vatthuvisabhāgattā desetuṃ vaṭṭati. Sudesitāvāti āpattito bhikkhu vuṭṭhātiyevāti adhippāyo. Aññaṃ dukkaṭanti sambandho. Panasaddo garahatthajotako sudesitāya garahākārena pavattattā. Kiñcāpi sudesitāva, pana tathāpīti yojanā. Tanti dukkaṭaṃ. Nānāvatthukanti desanāpaṭiggahaṇavasena nānāvatthukaṃ.
১৭০. সভাগোযেৰ ৰত্তব্বো, ন ৰিসভাগো। হীতি সচ্চং, যস্মা ৰা। তস্সাতি ৰিসভাগস্স। ইতোতি সঙ্ঘসন্নিপাততো।
170. Sabhāgoyeva vattabbo, na visabhāgo. Hīti saccaṃ, yasmā vā. Tassāti visabhāgassa. Itoti saṅghasannipātato.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৯২. আপত্তিপটিকম্মৰিধি • 92. Āpattipaṭikammavidhi
৯৩. আপত্তিআৰিকরণৰিধি • 93. Āpattiāvikaraṇavidhi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / আপত্তিপটিকম্মৰিধিকথা • Āpattipaṭikammavidhikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / আপত্তিপটিকম্মৰিধিকথাৰণ্ণনা • Āpattipaṭikammavidhikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / আপত্তিপটিকম্মৰিধিকথাদিৰণ্ণনা • Āpattipaṭikammavidhikathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছন্দদানকথাদিৰণ্ণনা • Chandadānakathādivaṇṇanā
