| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
အာပတ္တိပဋိကမ္မဝိဓိကထာဒိဝဏ္ဏနာ
Āpattipaṭikammavidhikathādivaṇṇanā
၁၆၉-၁၇၀. ပဋိဒေသေမီတိ ယာယ ကာယစိ ဘာသာယ ဝုတ္တေ ဒေသနာ စ ပဋိဂ္ဂဟော စ ဟောတိယေဝ ဒိဋ္ဌာဝိကမ္မေန ဝိသုဒ္ဓိယာ ဝုတ္တတ္တာတိ ကေစိ။ ဝေမတိကေန ‘‘အဟံ, ဘန္တေ, ဧကိသ္သာ ထုလ္လစ္စယာပတ္တိယာ ဝေမတိကော, ယဒာ နိဗ္ဗေမတိကော ဘဝိသ္သာမိ, တဒာ တံ အာပတ္တိံ ပဋိကရိသ္သာမီ’’တိ ဝတ္တဗ္ဗံ။ ဧဝံ ကတေ ယာဝ နိဗ္ဗေမတိကော န ဟောတိ, တာဝ သဘာဂာပတ္တိံ ပဋိဂ္ဂဟေတုံ န လဘတိ, အညေသဉ္စ ကမ္မာနံ ပရိသုဒ္ဓော နာမ ဟောတိ။ ပုန နိဗ္ဗေမတိကော ဟုတ္ဝာ ဒေသေတဗ္ဗံ။ န စာတိ နေဝ ပာဠိယံ န အဋ္ဌကထာယံ အတ္ထိ, ဒေသိတေ ပန ဒောသော နတ္ထီတိ။ တထာ ဣတော ဝုဋ္ဌဟိတ္ဝာ တံ အာပတ္တိံ ပဋိကရိသ္သာမီတိ ဧတ္ထ စ သကလသင္ဃေ သဘာဂာပတ္တိံ အာပန္နေ, ဝေမတိကေ စ။ တထာ စ ‘‘သဗ္ဗော သင္ဃော သဘာဂာပတ္တိံ အာပဇ္ဇိတ္ဝာ ယဒာ သုဒ္ဓံ ပသ္သိသ္သတီ’’တိ, ‘‘တဒာ တသ္သ သန္တိကေ တံ အာပတ္တိံ ပဋိကရိသ္သတီ’တိ ဝတ္ဝာ ‘ဥပောသထံ ကာတုံ လဘတီ’’တိ စ လိခိတံ။
169-170.Paṭidesemīti yāya kāyaci bhāsāya vutte desanā ca paṭiggaho ca hotiyeva diṭṭhāvikammena visuddhiyā vuttattāti keci. Vematikena ‘‘ahaṃ, bhante, ekissā thullaccayāpattiyā vematiko, yadā nibbematiko bhavissāmi, tadā taṃ āpattiṃ paṭikarissāmī’’ti vattabbaṃ. Evaṃ kate yāva nibbematiko na hoti, tāva sabhāgāpattiṃ paṭiggahetuṃ na labhati, aññesañca kammānaṃ parisuddho nāma hoti. Puna nibbematiko hutvā desetabbaṃ. Na cāti neva pāḷiyaṃ na aṭṭhakathāyaṃ atthi, desite pana doso natthīti. Tathā itovuṭṭhahitvā taṃ āpattiṃ paṭikarissāmīti ettha ca sakalasaṅghe sabhāgāpattiṃ āpanne, vematike ca. Tathā ca ‘‘sabbo saṅgho sabhāgāpattiṃ āpajjitvā yadā suddhaṃ passissatī’’ti, ‘‘tadā tassa santike taṃ āpattiṃ paṭikarissatī’ti vatvā ‘uposathaṃ kātuṃ labhatī’’ti ca likhitaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi
၉၂. အာပတ္တိပဋိကမ္မဝိဓိ • 92. Āpattipaṭikammavidhi
၉၃. အာပတ္တိအာဝိကရဏဝိဓိ • 93. Āpattiāvikaraṇavidhi
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အာပတ္တိပဋိကမ္မဝိဓိကထာ • Āpattipaṭikammavidhikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အာပတ္တိပဋိကမ္မဝိဓိကထာဝဏ္ဏနာ • Āpattipaṭikammavidhikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဆန္ဒဒာနကထာဒိဝဏ္ဏနာ • Chandadānakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၉၂. အာပတ္တိပဋိကမ္မဝိဓိကထာ • 92. Āpattipaṭikammavidhikathā
