| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
ஆபத்திஸமுட்டா²னகதா²வண்ணனா
Āpattisamuṭṭhānakathāvaṇṇanā
405. ஆதி³னாதி பட²மேன காயஸங்கா²தேன ஸமுட்டா²னேன.
405.Ādināti paṭhamena kāyasaṅkhātena samuṭṭhānena.
406-7. து³க்கடாத³யோதி ஆதி³-ஸத்³தே³ன து²ல்லச்சயஸங்கா⁴தி³ஸேஸா க³ஹிதா. யதா²ஹ – ‘‘பயோகே³ து³க்கடங் . ஏகங் பிண்ட³ங் அனாக³தே ஆபத்தி து²ல்லச்சயஸ்ஸ. தஸ்மிங் பிண்டே³ ஆக³தே ஆபத்தி ஸங்கா⁴தி³ஸேஸஸ்ஸா’’தி (பரி॰ 277). விகாலே பன பாசித்தீதி விகாலபோ⁴ஜனபாசித்தி. அஞ்ஞாதிஹத்த²தோதி அஞ்ஞாதிகாய பி⁴க்கு²னியா அந்தரக⁴ரங் பவிட்டா²ய ஹத்த²தோ. க³ஹெத்வாதி கா²த³னீயங் வா போ⁴ஜனீயங் வா ஸஹத்தா² படிக்³க³ஹெத்வா. ‘‘பஞ்ச இமா ஆபத்தியோ’’தி பத³ச்சே²தோ³.
406-7.Dukkaṭādayoti ādi-saddena thullaccayasaṅghādisesā gahitā. Yathāha – ‘‘payoge dukkaṭaṃ . Ekaṃ piṇḍaṃ anāgate āpatti thullaccayassa. Tasmiṃ piṇḍe āgate āpatti saṅghādisesassā’’ti (pari. 277). Vikāle pana pācittīti vikālabhojanapācitti. Aññātihatthatoti aññātikāya bhikkhuniyā antaragharaṃ paviṭṭhāya hatthato. Gahetvāti khādanīyaṃ vā bhojanīyaṃ vā sahatthā paṭiggahetvā. ‘‘Pañca imā āpattiyo’’ti padacchedo.
408. து³தியேனாதி வாசாஸங்கா²தேன ஸமுட்டா²னேன.
408.Dutiyenāti vācāsaṅkhātena samuṭṭhānena.
409-10. ஸமாதி³ஸதி கதே²தி சே. ஸப்³ப³தா² விபன்னந்தி அதே³ஸிதவத்து²கதாதி³னா ஸப்³ப³ப்பகாரேன விபன்னப்பதே³ஸங். குடிந்தி ஸஞ்ஞாசிகாய குடிங். யதா²ஹ பரிவாரே ‘‘தஸ்ஸ குடிங் கரொந்தி அதே³ஸிதவத்து²கங் பமாணாதிக்கந்தங் ஸாரம்ப⁴ங் அபரிக்கமன’’ந்தி (பரி॰ 278). பத³ஸோத⁴ம்மங் மூலங் ஸமுட்டா²னங் யஸ்ஸ பாசித்தியஸ்ஸாதி ததா² வுத்தங், தேன பத³ஸோத⁴ம்மமூலேன, ஸஹத்தே² சேதங் கரணவசனங்.
409-10.Samādisati katheti ce. Sabbathā vipannanti adesitavatthukatādinā sabbappakārena vipannappadesaṃ. Kuṭinti saññācikāya kuṭiṃ. Yathāha parivāre ‘‘tassa kuṭiṃ karonti adesitavatthukaṃ pamāṇātikkantaṃ sārambhaṃ aparikkamana’’nti (pari. 278). Padasodhammaṃ mūlaṃ samuṭṭhānaṃ yassa pācittiyassāti tathā vuttaṃ, tena padasodhammamūlena, sahatthe cetaṃ karaṇavacanaṃ.
411. ததியேன ஸமுட்டா²னேனாதி காயவாசாஸங்கா²தேன ஸமுட்டா²னேன.
411.Tatiyena samuṭṭhānenāti kāyavācāsaṅkhātena samuṭṭhānena.
412. ஸங்வித³ஹித்வானாதி ஸத்³தி⁴ங் வித³ஹித்வா, ‘‘குடிங் கரோமா’’தி அஞ்ஞேஹி ஸத்³தி⁴ங் மந்தெத்வாதி அத்தோ².
412.Saṃvidahitvānāti saddhiṃ vidahitvā, ‘‘kuṭiṃ karomā’’ti aññehi saddhiṃ mantetvāti attho.
413. வத்வாதி அத்தனோ அத்தா²ய விஞ்ஞாபெத்வா. பி⁴க்கு²னிந்தி பி⁴க்கூ²னங் பு⁴ஞ்ஜனட்டா²னே ட²த்வா ‘‘இத⁴ ஸூபங் தே³த², இத⁴ ஓத³னங் தே³தா²’’தி வோஸாஸமானங் உபாஸகானங் வத்வா தா³பெந்திங் பி⁴க்கு²னிங். ந நிவாரெத்வாதி ‘‘அபஸக்க தாவ, ப⁴கி³னி, யாவ பி⁴க்கூ² பு⁴ஞ்ஜந்தீ’’தி அனபஸாதெ³த்வா பு⁴ஞ்ஜதோதி யோஜனா.
413.Vatvāti attano atthāya viññāpetvā. Bhikkhuninti bhikkhūnaṃ bhuñjanaṭṭhāne ṭhatvā ‘‘idha sūpaṃ detha, idha odanaṃ dethā’’ti vosāsamānaṃ upāsakānaṃ vatvā dāpentiṃ bhikkhuniṃ. Na nivāretvāti ‘‘apasakka tāva, bhagini, yāva bhikkhū bhuñjantī’’ti anapasādetvā bhuñjatoti yojanā.
414. சதுத்தே²ன காயசித்தஸமுட்டா²னேன கதி ஆபத்தியோ ஸியுந்தி யோஜனா.
414. Catutthena kāyacittasamuṭṭhānena kati āpattiyo siyunti yojanā.
417. பஞ்சமேனாதி வாசாசித்தஸமுட்டா²னேன. வத³ந்தி வத³ந்தோ ஸமுதா³சரந்தோ.
417.Pañcamenāti vācācittasamuṭṭhānena. Vadanti vadanto samudācaranto.
418. குடிந்தி நித³ஸ்ஸனமத்தங், அதே³ஸிதவத்து²கங் பமாணாதிக்கந்தங் ஸாரம்ப⁴ங் அபரிக்கமனங் ஸேனாஸனம்பி க³ஹணங் வேதி³தப்³ப³ங்.
418.Kuṭinti nidassanamattaṃ, adesitavatthukaṃ pamāṇātikkantaṃ sārambhaṃ aparikkamanaṃ senāsanampi gahaṇaṃ veditabbaṃ.
419. வாசேதி பத³ஸோ த⁴ம்மந்தி எத்த² ‘‘அனுபஸம்பன்ன’’ந்தி ஸேஸோ. யதா²ஹ – ‘‘பி⁴க்கு² அகப்பியஸஞ்ஞீ அனுபஸம்பன்னங் பத³ஸோ த⁴ம்மங் வாசேதீ’’தி (பரி॰ 281). த³வகம்யதா வத³ந்தஸ்ஸாதி ஜாதிஆதீ³ஹி அக்கோஸவத்தூ²ஹி கீளாதி⁴ப்பாயேன வத³ந்தஸ்ஸ. த³வகம்யதாதி ச ‘‘படிஸங்கா² யோனிஸோ’’திஆதீ³ஸு (ம॰ நி॰ 1.22, 24, 422; அ॰ நி॰ 6.58; 8.9; மஹானி॰ 199, 206; த⁴॰ ஸ॰ 1355; விப⁴॰ 518) விய ய-காரலோபேன நித்³தே³ஸோ.
419.Vāceti padaso dhammanti ettha ‘‘anupasampanna’’nti seso. Yathāha – ‘‘bhikkhu akappiyasaññī anupasampannaṃ padaso dhammaṃ vācetī’’ti (pari. 281). Davakamyatā vadantassāti jātiādīhi akkosavatthūhi kīḷādhippāyena vadantassa. Davakamyatāti ca ‘‘paṭisaṅkhā yoniso’’tiādīsu (ma. ni. 1.22, 24, 422; a. ni. 6.58; 8.9; mahāni. 199, 206; dha. sa. 1355; vibha. 518) viya ya-kāralopena niddeso.
420. ச²ட்டே²ன காயவாசாசித்தஸமுட்டா²னேன. ஸங்வித³ஹித்வானாதி ஸங்விதா⁴ய, ‘‘த்வஞ்ச அஹஞ்ச ஏகதோ அவஹரிஸ்ஸாமா’’தி ஸம்மந்தனங் கத்வா. ப⁴ண்ட³ங் ஹரதீதி ‘‘பா⁴ரியங் த்வங் ஏகங் பஸ்ஸங் க³ண்ஹ, அஹங் இம’’ந்தி வத்வா தேன ஸஹ டா²னா சாவேதி சே.
420. Chaṭṭhena kāyavācācittasamuṭṭhānena. Saṃvidahitvānāti saṃvidhāya, ‘‘tvañca ahañca ekato avaharissāmā’’ti sammantanaṃ katvā. Bhaṇḍaṃ haratīti ‘‘bhāriyaṃ tvaṃ ekaṃ passaṃ gaṇha, ahaṃ ima’’nti vatvā tena saha ṭhānā cāveti ce.
423. இத⁴ இமஸ்மிங் ஸாஸனே. விமதூபரமங் பரமந்தி எத்த² ‘‘கப்பியங் நு கோ², அகப்பிய’’ந்தி வா ‘‘ஆபத்தி நு கோ², அனாபத்தீ’’தி வா ‘‘த⁴ம்மோ நு கோ², அத⁴ம்மோ’’தி வா ஏவமாதி³னா நயேன விவிதே⁴னாகாரேன பவத்தா விமதி விசிகிச்சா² விமதி. விமதிங் உபரமேதி வினாஸேதீதி விமதூபரமங். பரமங் உத்தமங். உத்தரந்தி விப⁴ங்க³க²ந்த⁴காக³தானங் நிதா³னாதி³வினிச்ச²யானங் பஞ்ஹஉத்தரபா⁴வேன டி²தத்தா உத்தரங். இமங் உத்தரங் நாம பகரணங் யோ உத்தரதி பஞ்ஞாய ஓகா³ஹெத்வா பரியோஸாபேதி. இத⁴ ‘‘உத்தரங் உத்தர’’ந்தி பத³த்³வயே ஏகங் கு³ணனித³ஸ்ஸனங், ஏகங் ஸத்த²னித³ஸ்ஸனந்தி க³ஹேதப்³ப³ங். ஸுனயேன யுதோ ஸோ புக்³க³லோ வினயங் பிடகங் உத்தரதீதி ஸம்ப³ந்தோ⁴. கிங் விஸிட்ட²ந்தி ஆஹ ‘‘ஸுனய’’ந்திஆதி³ . ஸுட்டு² சாரித்தவாரித்தத³ள்ஹீகரணஸிதி²லகரணபே⁴தா³ பஞ்ஞத்திஅனஉபஞ்ஞத்தாதி³னயா எத்தா²தி ஸுனயோ, தங். ஸுட்டு² நீயதி வினிச்ச²யோ ஏதேனாதி ஸுனயோ, உத்தரவினிச்ச²யோ, தேன. வினிச்ச²யாவபோ³தே⁴ன ஸங்யுத்தோ ஸமன்னாக³தோ. து³க்கே²ன உத்தரீயதீதி து³த்தரங். பாதிமொக்க²ஸங்வரஸீலதீ³பகத்தேன ஸமாதி⁴பஞ்ஞானிப்³பா³னஸங்கா²தஉத்தரப்பத்தியா பதிட்டா²பா⁴வதோ உத்தரங் உத்தரதி ஓகா³ஹெத்வா பரியோஸானங் பாபுணாதீதி அத்தோ².
423.Idha imasmiṃ sāsane. Vimatūparamaṃ paramanti ettha ‘‘kappiyaṃ nu kho, akappiya’’nti vā ‘‘āpatti nu kho, anāpattī’’ti vā ‘‘dhammo nu kho, adhammo’’ti vā evamādinā nayena vividhenākārena pavattā vimati vicikicchā vimati. Vimatiṃ uparameti vināsetīti vimatūparamaṃ. Paramaṃ uttamaṃ. Uttaranti vibhaṅgakhandhakāgatānaṃ nidānādivinicchayānaṃ pañhauttarabhāvena ṭhitattā uttaraṃ. Imaṃ uttaraṃ nāma pakaraṇaṃ yo uttarati paññāya ogāhetvā pariyosāpeti. Idha ‘‘uttaraṃ uttara’’nti padadvaye ekaṃ guṇanidassanaṃ, ekaṃ satthanidassananti gahetabbaṃ. Sunayena yuto so puggalo vinayaṃ piṭakaṃ uttaratīti sambandho. Kiṃ visiṭṭhanti āha ‘‘sunaya’’ntiādi . Suṭṭhu cārittavārittadaḷhīkaraṇasithilakaraṇabhedā paññattianaupaññattādinayā etthāti sunayo, taṃ. Suṭṭhu nīyati vinicchayo etenāti sunayo, uttaravinicchayo, tena. Vinicchayāvabodhena saṃyutto samannāgato. Dukkhena uttarīyatīti duttaraṃ. Pātimokkhasaṃvarasīladīpakattena samādhipaññānibbānasaṅkhātauttarappattiyā patiṭṭhābhāvato uttaraṃ uttarati ogāhetvā pariyosānaṃ pāpuṇātīti attho.
இத⁴ யோ விமதூபரமங் பரமங் உத்தரங் உத்தரங் நாம பகரணங் உத்தரதி, ஸுனயேன யுதோ ஸோ புக்³க³லோ ஸுனயங் து³த்தரங் உத்தரங் வினயங் உத்தரதீதி யோஜனா. ச-ஸத்³தே³ன ஸத்த²ந்தரஸமுச்சயத்தே²ன இமமத்த²ங் தீ³பேதி. ஸெய்யதி²த³ங், இத⁴ யோ ஸுனயங் து³த்தரங் உத்தரங் வினயங் உத்தரதி, ஸுனயேன யுதோ ஸோ புக்³க³லோ விமதூபரமங் பரமங் உத்தரங் உத்தரங் நாம பகரணங் உத்தரதீதி. இமினா யோ உத்தரங் ஜானாதி, ஸோ வினயங் ஜானாதி. யோ வினயங் ஜானாதி, ஸோ உத்தரங் ஜானாதீதி உத்தரபகரணஸ்ஸ வினயபிடகஜானநே அச்சந்தூபகாரிதா விபா⁴விதாதி த³ட்ட²ப்³ப³ங்.
Idha yo vimatūparamaṃ paramaṃ uttaraṃ uttaraṃ nāma pakaraṇaṃ uttarati, sunayena yuto so puggalo sunayaṃ duttaraṃ uttaraṃ vinayaṃ uttaratīti yojanā. Ca-saddena satthantarasamuccayatthena imamatthaṃ dīpeti. Seyyathidaṃ, idha yo sunayaṃ duttaraṃ uttaraṃ vinayaṃ uttarati, sunayena yuto so puggalo vimatūparamaṃ paramaṃ uttaraṃ uttaraṃ nāma pakaraṇaṃ uttaratīti. Iminā yo uttaraṃ jānāti, so vinayaṃ jānāti. Yo vinayaṃ jānāti, so uttaraṃ jānātīti uttarapakaraṇassa vinayapiṭakajānane accantūpakāritā vibhāvitāti daṭṭhabbaṃ.
இதி உத்தரே லீனத்த²பகாஸனியா
Iti uttare līnatthapakāsaniyā
ஆபத்திஸமுட்டா²னகதா²வண்ணனா நிட்டி²தா.
Āpattisamuṭṭhānakathāvaṇṇanā niṭṭhitā.
