| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
আপত্তিসমুট্ঠানকথাৰণ্ণনা
Āpattisamuṭṭhānakathāvaṇṇanā
৪০৫. আদিনাতি পঠমেন কাযসঙ্খাতেন সমুট্ঠানেন।
405.Ādināti paṭhamena kāyasaṅkhātena samuṭṭhānena.
৪০৬-৭. দুক্কটাদযোতি আদি-সদ্দেন থুল্লচ্চযসঙ্ঘাদিসেসা গহিতা। যথাহ – ‘‘পযোগে দুক্কটং । একং পিণ্ডং অনাগতে আপত্তি থুল্লচ্চযস্স। তস্মিং পিণ্ডে আগতে আপত্তি সঙ্ঘাদিসেসস্সা’’তি (পরি॰ ২৭৭)। ৰিকালে পন পাচিত্তীতি ৰিকালভোজনপাচিত্তি। অঞ্ঞাতিহত্থতোতি অঞ্ঞাতিকায ভিক্খুনিযা অন্তরঘরং পৰিট্ঠায হত্থতো। গহেত্ৰাতি খাদনীযং ৰা ভোজনীযং ৰা সহত্থা পটিগ্গহেত্ৰা। ‘‘পঞ্চ ইমা আপত্তিযো’’তি পদচ্ছেদো।
406-7.Dukkaṭādayoti ādi-saddena thullaccayasaṅghādisesā gahitā. Yathāha – ‘‘payoge dukkaṭaṃ . Ekaṃ piṇḍaṃ anāgate āpatti thullaccayassa. Tasmiṃ piṇḍe āgate āpatti saṅghādisesassā’’ti (pari. 277). Vikāle pana pācittīti vikālabhojanapācitti. Aññātihatthatoti aññātikāya bhikkhuniyā antaragharaṃ paviṭṭhāya hatthato. Gahetvāti khādanīyaṃ vā bhojanīyaṃ vā sahatthā paṭiggahetvā. ‘‘Pañca imā āpattiyo’’ti padacchedo.
৪০৮. দুতিযেনাতি ৰাচাসঙ্খাতেন সমুট্ঠানেন।
408.Dutiyenāti vācāsaṅkhātena samuṭṭhānena.
৪০৯-১০. সমাদিসতি কথেতি চে। সব্বথা ৰিপন্নন্তি অদেসিতৰত্থুকতাদিনা সব্বপ্পকারেন ৰিপন্নপ্পদেসং। কুটিন্তি সঞ্ঞাচিকায কুটিং। যথাহ পরিৰারে ‘‘তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমন’’ন্তি (পরি॰ ২৭৮)। পদসোধম্মং মূলং সমুট্ঠানং যস্স পাচিত্তিযস্সাতি তথা ৰুত্তং, তেন পদসোধম্মমূলেন, সহত্থে চেতং করণৰচনং।
409-10.Samādisati katheti ce. Sabbathā vipannanti adesitavatthukatādinā sabbappakārena vipannappadesaṃ. Kuṭinti saññācikāya kuṭiṃ. Yathāha parivāre ‘‘tassa kuṭiṃ karonti adesitavatthukaṃ pamāṇātikkantaṃ sārambhaṃ aparikkamana’’nti (pari. 278). Padasodhammaṃ mūlaṃ samuṭṭhānaṃ yassa pācittiyassāti tathā vuttaṃ, tena padasodhammamūlena, sahatthe cetaṃ karaṇavacanaṃ.
৪১১. ততিযেন সমুট্ঠানেনাতি কাযৰাচাসঙ্খাতেন সমুট্ঠানেন।
411.Tatiyena samuṭṭhānenāti kāyavācāsaṅkhātena samuṭṭhānena.
৪১২. সংৰিদহিত্ৰানাতি সদ্ধিং ৰিদহিত্ৰা, ‘‘কুটিং করোমা’’তি অঞ্ঞেহি সদ্ধিং মন্তেত্ৰাতি অত্থো।
412.Saṃvidahitvānāti saddhiṃ vidahitvā, ‘‘kuṭiṃ karomā’’ti aññehi saddhiṃ mantetvāti attho.
৪১৩. ৰত্ৰাতি অত্তনো অত্থায ৰিঞ্ঞাপেত্ৰা। ভিক্খুনিন্তি ভিক্খূনং ভুঞ্জনট্ঠানে ঠত্ৰা ‘‘ইধ সূপং দেথ, ইধ ওদনং দেথা’’তি ৰোসাসমানং উপাসকানং ৰত্ৰা দাপেন্তিং ভিক্খুনিং। ন নিৰারেত্ৰাতি ‘‘অপসক্ক তাৰ, ভগিনি, যাৰ ভিক্খূ ভুঞ্জন্তী’’তি অনপসাদেত্ৰা ভুঞ্জতোতি যোজনা।
413.Vatvāti attano atthāya viññāpetvā. Bhikkhuninti bhikkhūnaṃ bhuñjanaṭṭhāne ṭhatvā ‘‘idha sūpaṃ detha, idha odanaṃ dethā’’ti vosāsamānaṃ upāsakānaṃ vatvā dāpentiṃ bhikkhuniṃ. Na nivāretvāti ‘‘apasakka tāva, bhagini, yāva bhikkhū bhuñjantī’’ti anapasādetvā bhuñjatoti yojanā.
৪১৪. চতুত্থেন কাযচিত্তসমুট্ঠানেন কতি আপত্তিযো সিযুন্তি যোজনা।
414. Catutthena kāyacittasamuṭṭhānena kati āpattiyo siyunti yojanā.
৪১৭. পঞ্চমেনাতি ৰাচাচিত্তসমুট্ঠানেন। ৰদন্তি ৰদন্তো সমুদাচরন্তো।
417.Pañcamenāti vācācittasamuṭṭhānena. Vadanti vadanto samudācaranto.
৪১৮. কুটিন্তি নিদস্সনমত্তং, অদেসিতৰত্থুকং পমাণাতিক্কন্তং সারম্ভং অপরিক্কমনং সেনাসনম্পি গহণং ৰেদিতব্বং।
418.Kuṭinti nidassanamattaṃ, adesitavatthukaṃ pamāṇātikkantaṃ sārambhaṃ aparikkamanaṃ senāsanampi gahaṇaṃ veditabbaṃ.
৪১৯. ৰাচেতি পদসো ধম্মন্তি এত্থ ‘‘অনুপসম্পন্ন’’ন্তি সেসো। যথাহ – ‘‘ভিক্খু অকপ্পিযসঞ্ঞী অনুপসম্পন্নং পদসো ধম্মং ৰাচেতী’’তি (পরি॰ ২৮১)। দৰকম্যতা ৰদন্তস্সাতি জাতিআদীহি অক্কোসৰত্থূহি কীল়াধিপ্পাযেন ৰদন্তস্স। দৰকম্যতাতি চ ‘‘পটিসঙ্খা যোনিসো’’তিআদীসু (ম॰ নি॰ ১.২২, ২৪, ৪২২; অ॰ নি॰ ৬.৫৮; ৮.৯; মহানি॰ ১৯৯, ২০৬; ধ॰ স॰ ১৩৫৫; ৰিভ॰ ৫১৮) ৰিয য-কারলোপেন নিদ্দেসো।
419.Vāceti padaso dhammanti ettha ‘‘anupasampanna’’nti seso. Yathāha – ‘‘bhikkhu akappiyasaññī anupasampannaṃ padaso dhammaṃ vācetī’’ti (pari. 281). Davakamyatā vadantassāti jātiādīhi akkosavatthūhi kīḷādhippāyena vadantassa. Davakamyatāti ca ‘‘paṭisaṅkhā yoniso’’tiādīsu (ma. ni. 1.22, 24, 422; a. ni. 6.58; 8.9; mahāni. 199, 206; dha. sa. 1355; vibha. 518) viya ya-kāralopena niddeso.
৪২০. ছট্ঠেন কাযৰাচাচিত্তসমুট্ঠানেন। সংৰিদহিত্ৰানাতি সংৰিধায, ‘‘ত্ৰঞ্চ অহঞ্চ একতো অৰহরিস্সামা’’তি সম্মন্তনং কত্ৰা। ভণ্ডং হরতীতি ‘‘ভারিযং ত্ৰং একং পস্সং গণ্হ, অহং ইম’’ন্তি ৰত্ৰা তেন সহ ঠানা চাৰেতি চে।
420. Chaṭṭhena kāyavācācittasamuṭṭhānena. Saṃvidahitvānāti saṃvidhāya, ‘‘tvañca ahañca ekato avaharissāmā’’ti sammantanaṃ katvā. Bhaṇḍaṃ haratīti ‘‘bhāriyaṃ tvaṃ ekaṃ passaṃ gaṇha, ahaṃ ima’’nti vatvā tena saha ṭhānā cāveti ce.
৪২৩. ইধ ইমস্মিং সাসনে। ৰিমতূপরমং পরমন্তি এত্থ ‘‘কপ্পিযং নু খো, অকপ্পিয’’ন্তি ৰা ‘‘আপত্তি নু খো, অনাপত্তী’’তি ৰা ‘‘ধম্মো নু খো, অধম্মো’’তি ৰা এৰমাদিনা নযেন ৰিৰিধেনাকারেন পৰত্তা ৰিমতি ৰিচিকিচ্ছা ৰিমতি। ৰিমতিং উপরমেতি ৰিনাসেতীতি ৰিমতূপরমং। পরমং উত্তমং। উত্তরন্তি ৰিভঙ্গখন্ধকাগতানং নিদানাদিৰিনিচ্ছযানং পঞ্হউত্তরভাৰেন ঠিতত্তা উত্তরং। ইমং উত্তরং নাম পকরণং যো উত্তরতি পঞ্ঞায ওগাহেত্ৰা পরিযোসাপেতি। ইধ ‘‘উত্তরং উত্তর’’ন্তি পদদ্ৰযে একং গুণনিদস্সনং, একং সত্থনিদস্সনন্তি গহেতব্বং। সুনযেন যুতো সো পুগ্গলো ৰিনযং পিটকং উত্তরতীতি সম্বন্ধো। কিং ৰিসিট্ঠন্তি আহ ‘‘সুনয’’ন্তিআদি । সুট্ঠু চারিত্তৰারিত্তদল়্হীকরণসিথিলকরণভেদা পঞ্ঞত্তিঅনউপঞ্ঞত্তাদিনযা এত্থাতি সুনযো, তং। সুট্ঠু নীযতি ৰিনিচ্ছযো এতেনাতি সুনযো, উত্তরৰিনিচ্ছযো, তেন। ৰিনিচ্ছযাৰবোধেন সংযুত্তো সমন্নাগতো। দুক্খেন উত্তরীযতীতি দুত্তরং। পাতিমোক্খসংৰরসীলদীপকত্তেন সমাধিপঞ্ঞানিব্বানসঙ্খাতউত্তরপ্পত্তিযা পতিট্ঠাভাৰতো উত্তরং উত্তরতি ওগাহেত্ৰা পরিযোসানং পাপুণাতীতি অত্থো।
423.Idha imasmiṃ sāsane. Vimatūparamaṃ paramanti ettha ‘‘kappiyaṃ nu kho, akappiya’’nti vā ‘‘āpatti nu kho, anāpattī’’ti vā ‘‘dhammo nu kho, adhammo’’ti vā evamādinā nayena vividhenākārena pavattā vimati vicikicchā vimati. Vimatiṃ uparameti vināsetīti vimatūparamaṃ. Paramaṃ uttamaṃ. Uttaranti vibhaṅgakhandhakāgatānaṃ nidānādivinicchayānaṃ pañhauttarabhāvena ṭhitattā uttaraṃ. Imaṃ uttaraṃ nāma pakaraṇaṃ yo uttarati paññāya ogāhetvā pariyosāpeti. Idha ‘‘uttaraṃ uttara’’nti padadvaye ekaṃ guṇanidassanaṃ, ekaṃ satthanidassananti gahetabbaṃ. Sunayena yuto so puggalo vinayaṃ piṭakaṃ uttaratīti sambandho. Kiṃ visiṭṭhanti āha ‘‘sunaya’’ntiādi . Suṭṭhu cārittavārittadaḷhīkaraṇasithilakaraṇabhedā paññattianaupaññattādinayā etthāti sunayo, taṃ. Suṭṭhu nīyati vinicchayo etenāti sunayo, uttaravinicchayo, tena. Vinicchayāvabodhena saṃyutto samannāgato. Dukkhena uttarīyatīti duttaraṃ. Pātimokkhasaṃvarasīladīpakattena samādhipaññānibbānasaṅkhātauttarappattiyā patiṭṭhābhāvato uttaraṃ uttarati ogāhetvā pariyosānaṃ pāpuṇātīti attho.
ইধ যো ৰিমতূপরমং পরমং উত্তরং উত্তরং নাম পকরণং উত্তরতি, সুনযেন যুতো সো পুগ্গলো সুনযং দুত্তরং উত্তরং ৰিনযং উত্তরতীতি যোজনা। চ-সদ্দেন সত্থন্তরসমুচ্চযত্থেন ইমমত্থং দীপেতি। সেয্যথিদং, ইধ যো সুনযং দুত্তরং উত্তরং ৰিনযং উত্তরতি, সুনযেন যুতো সো পুগ্গলো ৰিমতূপরমং পরমং উত্তরং উত্তরং নাম পকরণং উত্তরতীতি। ইমিনা যো উত্তরং জানাতি, সো ৰিনযং জানাতি। যো ৰিনযং জানাতি, সো উত্তরং জানাতীতি উত্তরপকরণস্স ৰিনযপিটকজাননে অচ্চন্তূপকারিতা ৰিভাৰিতাতি দট্ঠব্বং।
Idha yo vimatūparamaṃ paramaṃ uttaraṃ uttaraṃ nāma pakaraṇaṃ uttarati, sunayena yuto so puggalo sunayaṃ duttaraṃ uttaraṃ vinayaṃ uttaratīti yojanā. Ca-saddena satthantarasamuccayatthena imamatthaṃ dīpeti. Seyyathidaṃ, idha yo sunayaṃ duttaraṃ uttaraṃ vinayaṃ uttarati, sunayena yuto so puggalo vimatūparamaṃ paramaṃ uttaraṃ uttaraṃ nāma pakaraṇaṃ uttaratīti. Iminā yo uttaraṃ jānāti, so vinayaṃ jānāti. Yo vinayaṃ jānāti, so uttaraṃ jānātīti uttarapakaraṇassa vinayapiṭakajānane accantūpakāritā vibhāvitāti daṭṭhabbaṃ.
ইতি উত্তরে লীনত্থপকাসনিযা
Iti uttare līnatthapakāsaniyā
আপত্তিসমুট্ঠানকথাৰণ্ণনা নিট্ঠিতা।
Āpattisamuṭṭhānakathāvaṇṇanā niṭṭhitā.
