| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
ஆபத்திஸமுட்டா²னவண்ணனா
Āpattisamuṭṭhānavaṇṇanā
470. அசித்தகோ ஆபஜ்ஜதீதிஆதீ³ஸு ஸஹஸெய்யாதி³பண்ணத்திவஜ்ஜங் அஸஞ்சிச்ச ஆபஜ்ஜந்தோ அசித்தகோ ஆபஜ்ஜதி, தே³ஸெந்தோ ஸசித்தகோ வுட்டா²தி. யங்கிஞ்சி ஸஞ்சிச்ச ஆபஜ்ஜந்தோ ஸசித்தகோ ஆபஜ்ஜதி, திணவத்தா²ரகேன வுட்ட²ஹந்தோ அசித்தகோ வுட்டா²தி. புப்³பே³ வுத்தமேவ திணவத்தா²ரகேன வுட்ட²ஹந்தோ அசித்தகோ ஆபஜ்ஜதி, அசித்தகோ வுட்டா²தி. இதரங் தே³ஸெந்தோ ஸசித்தகோ ஆபஜ்ஜதி, ஸசித்தகோ வுட்டா²தி. ‘‘த⁴ம்மதா³னங் கரோமீ’’தி பத³ஸோத⁴ம்மாதீ³னி கரொந்தோ குஸலசித்தோ ஆபஜ்ஜதி, ‘‘பு³த்³தா⁴னங் அனுஸாஸனிங் கரோமீ’’தி உத³க்³க³சித்தோ தே³ஸெந்தோ குஸலசித்தோ வுட்டா²தி. தோ³மனஸ்ஸிகோ ஹுத்வா தே³ஸெந்தோ அகுஸலசித்தோ வுட்டா²தி, திணவத்தா²ரகேன நித்³தா³க³தோவ வுட்ட²ஹந்தோ அப்³யாகதசித்தோ வுட்டா²தி. பி⁴ங்ஸாபனாதீ³னி கத்வா ‘‘பு³த்³தா⁴னங் ஸாஸனங் கரோமீ’’தி ஸோமனஸ்ஸிகோ தே³ஸெந்தோ அகுஸலசித்தோ ஆபஜ்ஜதி, குஸலசித்தோ வுட்டா²தி. தோ³மனஸ்ஸிகோவ தே³ஸெந்தோ அகுஸலசித்தோ வுட்டா²தி, வுத்தனயேனேவ திணவத்தா²ரகேன வுட்ட²ஹந்தோ அப்³யாகதசித்தோ வுட்டா²தி. நித்³தோ³க்கந்தஸமயே ஸஹகா³ரஸெய்யங் ஆபஜ்ஜந்தோ அப்³யாகதசித்தோ ஆபஜ்ஜதி, வுத்தனயேனேவ பனெத்த² ‘‘குஸலசித்தோ வுட்டா²தீ’’திஆதி³ வேதி³தப்³ப³ங்.
470.Acittakoāpajjatītiādīsu sahaseyyādipaṇṇattivajjaṃ asañcicca āpajjanto acittako āpajjati, desento sacittako vuṭṭhāti. Yaṃkiñci sañcicca āpajjanto sacittako āpajjati, tiṇavatthārakena vuṭṭhahanto acittako vuṭṭhāti. Pubbe vuttameva tiṇavatthārakena vuṭṭhahanto acittako āpajjati, acittako vuṭṭhāti. Itaraṃ desento sacittako āpajjati, sacittako vuṭṭhāti. ‘‘Dhammadānaṃ karomī’’ti padasodhammādīni karonto kusalacitto āpajjati, ‘‘buddhānaṃ anusāsaniṃ karomī’’ti udaggacitto desento kusalacitto vuṭṭhāti. Domanassiko hutvā desento akusalacitto vuṭṭhāti, tiṇavatthārakena niddāgatova vuṭṭhahanto abyākatacitto vuṭṭhāti. Bhiṃsāpanādīni katvā ‘‘buddhānaṃ sāsanaṃ karomī’’ti somanassiko desento akusalacitto āpajjati, kusalacitto vuṭṭhāti. Domanassikova desento akusalacitto vuṭṭhāti, vuttanayeneva tiṇavatthārakena vuṭṭhahanto abyākatacitto vuṭṭhāti. Niddokkantasamaye sahagāraseyyaṃ āpajjanto abyākatacitto āpajjati, vuttanayeneva panettha ‘‘kusalacitto vuṭṭhātī’’tiādi veditabbaṃ.
பட²மங் பாராஜிகங் கதிஹி ஸமுட்டா²னேஹீதிஆதி³ புப்³பே³ வுத்தனயத்தா உத்தானமேவ.
Paṭhamaṃ pārājikaṃ katihi samuṭṭhānehītiādi pubbe vuttanayattā uttānameva.
473. சத்தாரோ பாராஜிகா கதிஹி ஸமுட்டா²னேஹீதிஆதீ³ஸு உக்கட்ட²பரிச்சே²த³தோ யங் யங் ஸமுட்டா²னங் யஸ்ஸ யஸ்ஸ லப்³ப⁴தி, தங் ஸப்³ப³ங் வுத்தமேவ ஹோதி.
473.Cattāro pārājikā katihi samuṭṭhānehītiādīsu ukkaṭṭhaparicchedato yaṃ yaṃ samuṭṭhānaṃ yassa yassa labbhati, taṃ sabbaṃ vuttameva hoti.
ஆபத்திஸமுட்டா²னவண்ணனா நிட்டி²தா.
Āpattisamuṭṭhānavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
1. பாராஜிகங் • 1. Pārājikaṃ
3. பாராஜிகாதி³ • 3. Pārājikādi
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸமுட்டா²னவண்ணனா • Samuṭṭhānavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஆபத்திஸமுட்டா²னவண்ணனா • Āpattisamuṭṭhānavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வோஹாரவக்³கா³தி³வண்ணனா • Vohāravaggādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஆபத்திஸமுட்டா²னவண்ணனா • Āpattisamuṭṭhānavaṇṇanā
