| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
আপত্তিসমুট্ঠানৰণ্ণনা
Āpattisamuṭṭhānavaṇṇanā
৪৭০. অচিত্তকো আপজ্জতীতিআদীসু সহসেয্যাদিপণ্ণত্তিৰজ্জং অসঞ্চিচ্চ আপজ্জন্তো অচিত্তকো আপজ্জতি, দেসেন্তো সচিত্তকো ৰুট্ঠাতি। যংকিঞ্চি সঞ্চিচ্চ আপজ্জন্তো সচিত্তকো আপজ্জতি, তিণৰত্থারকেন ৰুট্ঠহন্তো অচিত্তকো ৰুট্ঠাতি। পুব্বে ৰুত্তমেৰ তিণৰত্থারকেন ৰুট্ঠহন্তো অচিত্তকো আপজ্জতি, অচিত্তকো ৰুট্ঠাতি। ইতরং দেসেন্তো সচিত্তকো আপজ্জতি, সচিত্তকো ৰুট্ঠাতি। ‘‘ধম্মদানং করোমী’’তি পদসোধম্মাদীনি করোন্তো কুসলচিত্তো আপজ্জতি, ‘‘বুদ্ধানং অনুসাসনিং করোমী’’তি উদগ্গচিত্তো দেসেন্তো কুসলচিত্তো ৰুট্ঠাতি। দোমনস্সিকো হুত্ৰা দেসেন্তো অকুসলচিত্তো ৰুট্ঠাতি, তিণৰত্থারকেন নিদ্দাগতোৰ ৰুট্ঠহন্তো অব্যাকতচিত্তো ৰুট্ঠাতি। ভিংসাপনাদীনি কত্ৰা ‘‘বুদ্ধানং সাসনং করোমী’’তি সোমনস্সিকো দেসেন্তো অকুসলচিত্তো আপজ্জতি, কুসলচিত্তো ৰুট্ঠাতি। দোমনস্সিকোৰ দেসেন্তো অকুসলচিত্তো ৰুট্ঠাতি, ৰুত্তনযেনেৰ তিণৰত্থারকেন ৰুট্ঠহন্তো অব্যাকতচিত্তো ৰুট্ঠাতি। নিদ্দোক্কন্তসমযে সহগারসেয্যং আপজ্জন্তো অব্যাকতচিত্তো আপজ্জতি, ৰুত্তনযেনেৰ পনেত্থ ‘‘কুসলচিত্তো ৰুট্ঠাতী’’তিআদি ৰেদিতব্বং।
470.Acittakoāpajjatītiādīsu sahaseyyādipaṇṇattivajjaṃ asañcicca āpajjanto acittako āpajjati, desento sacittako vuṭṭhāti. Yaṃkiñci sañcicca āpajjanto sacittako āpajjati, tiṇavatthārakena vuṭṭhahanto acittako vuṭṭhāti. Pubbe vuttameva tiṇavatthārakena vuṭṭhahanto acittako āpajjati, acittako vuṭṭhāti. Itaraṃ desento sacittako āpajjati, sacittako vuṭṭhāti. ‘‘Dhammadānaṃ karomī’’ti padasodhammādīni karonto kusalacitto āpajjati, ‘‘buddhānaṃ anusāsaniṃ karomī’’ti udaggacitto desento kusalacitto vuṭṭhāti. Domanassiko hutvā desento akusalacitto vuṭṭhāti, tiṇavatthārakena niddāgatova vuṭṭhahanto abyākatacitto vuṭṭhāti. Bhiṃsāpanādīni katvā ‘‘buddhānaṃ sāsanaṃ karomī’’ti somanassiko desento akusalacitto āpajjati, kusalacitto vuṭṭhāti. Domanassikova desento akusalacitto vuṭṭhāti, vuttanayeneva tiṇavatthārakena vuṭṭhahanto abyākatacitto vuṭṭhāti. Niddokkantasamaye sahagāraseyyaṃ āpajjanto abyākatacitto āpajjati, vuttanayeneva panettha ‘‘kusalacitto vuṭṭhātī’’tiādi veditabbaṃ.
পঠমং পারাজিকং কতিহি সমুট্ঠানেহীতিআদি পুব্বে ৰুত্তনযত্তা উত্তানমেৰ।
Paṭhamaṃ pārājikaṃ katihi samuṭṭhānehītiādi pubbe vuttanayattā uttānameva.
৪৭৩. চত্তারো পারাজিকা কতিহি সমুট্ঠানেহীতিআদীসু উক্কট্ঠপরিচ্ছেদতো যং যং সমুট্ঠানং যস্স যস্স লব্ভতি, তং সব্বং ৰুত্তমেৰ হোতি।
473.Cattāro pārājikā katihi samuṭṭhānehītiādīsu ukkaṭṭhaparicchedato yaṃ yaṃ samuṭṭhānaṃ yassa yassa labbhati, taṃ sabbaṃ vuttameva hoti.
আপত্তিসমুট্ঠানৰণ্ণনা নিট্ঠিতা।
Āpattisamuṭṭhānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
১. পারাজিকং • 1. Pārājikaṃ
৩. পারাজিকাদি • 3. Pārājikādi
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সমুট্ঠানৰণ্ণনা • Samuṭṭhānavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / আপত্তিসমুট্ঠানৰণ্ণনা • Āpattisamuṭṭhānavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰোহারৰগ্গাদিৰণ্ণনা • Vohāravaggādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / আপত্তিসমুট্ঠানৰণ্ণনা • Āpattisamuṭṭhānavaṇṇanā
