| Library / Tipiṭaka / ತಿಪಿಟಕ • Tipiṭaka / ಪರಿವಾರ-ಅಟ್ಠಕಥಾ • Parivāra-aṭṭhakathā |
ಆಪತ್ತಿಸಮುಟ್ಠಾನವಣ್ಣನಾ
Āpattisamuṭṭhānavaṇṇanā
೪೭೦. ಅಚಿತ್ತಕೋ ಆಪಜ್ಜತೀತಿಆದೀಸು ಸಹಸೇಯ್ಯಾದಿಪಣ್ಣತ್ತಿವಜ್ಜಂ ಅಸಞ್ಚಿಚ್ಚ ಆಪಜ್ಜನ್ತೋ ಅಚಿತ್ತಕೋ ಆಪಜ್ಜತಿ, ದೇಸೇನ್ತೋ ಸಚಿತ್ತಕೋ ವುಟ್ಠಾತಿ। ಯಂಕಿಞ್ಚಿ ಸಞ್ಚಿಚ್ಚ ಆಪಜ್ಜನ್ತೋ ಸಚಿತ್ತಕೋ ಆಪಜ್ಜತಿ, ತಿಣವತ್ಥಾರಕೇನ ವುಟ್ಠಹನ್ತೋ ಅಚಿತ್ತಕೋ ವುಟ್ಠಾತಿ। ಪುಬ್ಬೇ ವುತ್ತಮೇವ ತಿಣವತ್ಥಾರಕೇನ ವುಟ್ಠಹನ್ತೋ ಅಚಿತ್ತಕೋ ಆಪಜ್ಜತಿ, ಅಚಿತ್ತಕೋ ವುಟ್ಠಾತಿ। ಇತರಂ ದೇಸೇನ್ತೋ ಸಚಿತ್ತಕೋ ಆಪಜ್ಜತಿ, ಸಚಿತ್ತಕೋ ವುಟ್ಠಾತಿ। ‘‘ಧಮ್ಮದಾನಂ ಕರೋಮೀ’’ತಿ ಪದಸೋಧಮ್ಮಾದೀನಿ ಕರೋನ್ತೋ ಕುಸಲಚಿತ್ತೋ ಆಪಜ್ಜತಿ, ‘‘ಬುದ್ಧಾನಂ ಅನುಸಾಸನಿಂ ಕರೋಮೀ’’ತಿ ಉದಗ್ಗಚಿತ್ತೋ ದೇಸೇನ್ತೋ ಕುಸಲಚಿತ್ತೋ ವುಟ್ಠಾತಿ। ದೋಮನಸ್ಸಿಕೋ ಹುತ್ವಾ ದೇಸೇನ್ತೋ ಅಕುಸಲಚಿತ್ತೋ ವುಟ್ಠಾತಿ, ತಿಣವತ್ಥಾರಕೇನ ನಿದ್ದಾಗತೋವ ವುಟ್ಠಹನ್ತೋ ಅಬ್ಯಾಕತಚಿತ್ತೋ ವುಟ್ಠಾತಿ। ಭಿಂಸಾಪನಾದೀನಿ ಕತ್ವಾ ‘‘ಬುದ್ಧಾನಂ ಸಾಸನಂ ಕರೋಮೀ’’ತಿ ಸೋಮನಸ್ಸಿಕೋ ದೇಸೇನ್ತೋ ಅಕುಸಲಚಿತ್ತೋ ಆಪಜ್ಜತಿ, ಕುಸಲಚಿತ್ತೋ ವುಟ್ಠಾತಿ। ದೋಮನಸ್ಸಿಕೋವ ದೇಸೇನ್ತೋ ಅಕುಸಲಚಿತ್ತೋ ವುಟ್ಠಾತಿ, ವುತ್ತನಯೇನೇವ ತಿಣವತ್ಥಾರಕೇನ ವುಟ್ಠಹನ್ತೋ ಅಬ್ಯಾಕತಚಿತ್ತೋ ವುಟ್ಠಾತಿ। ನಿದ್ದೋಕ್ಕನ್ತಸಮಯೇ ಸಹಗಾರಸೇಯ್ಯಂ ಆಪಜ್ಜನ್ತೋ ಅಬ್ಯಾಕತಚಿತ್ತೋ ಆಪಜ್ಜತಿ, ವುತ್ತನಯೇನೇವ ಪನೇತ್ಥ ‘‘ಕುಸಲಚಿತ್ತೋ ವುಟ್ಠಾತೀ’’ತಿಆದಿ ವೇದಿತಬ್ಬಂ।
470.Acittakoāpajjatītiādīsu sahaseyyādipaṇṇattivajjaṃ asañcicca āpajjanto acittako āpajjati, desento sacittako vuṭṭhāti. Yaṃkiñci sañcicca āpajjanto sacittako āpajjati, tiṇavatthārakena vuṭṭhahanto acittako vuṭṭhāti. Pubbe vuttameva tiṇavatthārakena vuṭṭhahanto acittako āpajjati, acittako vuṭṭhāti. Itaraṃ desento sacittako āpajjati, sacittako vuṭṭhāti. ‘‘Dhammadānaṃ karomī’’ti padasodhammādīni karonto kusalacitto āpajjati, ‘‘buddhānaṃ anusāsaniṃ karomī’’ti udaggacitto desento kusalacitto vuṭṭhāti. Domanassiko hutvā desento akusalacitto vuṭṭhāti, tiṇavatthārakena niddāgatova vuṭṭhahanto abyākatacitto vuṭṭhāti. Bhiṃsāpanādīni katvā ‘‘buddhānaṃ sāsanaṃ karomī’’ti somanassiko desento akusalacitto āpajjati, kusalacitto vuṭṭhāti. Domanassikova desento akusalacitto vuṭṭhāti, vuttanayeneva tiṇavatthārakena vuṭṭhahanto abyākatacitto vuṭṭhāti. Niddokkantasamaye sahagāraseyyaṃ āpajjanto abyākatacitto āpajjati, vuttanayeneva panettha ‘‘kusalacitto vuṭṭhātī’’tiādi veditabbaṃ.
ಪಠಮಂ ಪಾರಾಜಿಕಂ ಕತಿಹಿ ಸಮುಟ್ಠಾನೇಹೀತಿಆದಿ ಪುಬ್ಬೇ ವುತ್ತನಯತ್ತಾ ಉತ್ತಾನಮೇವ।
Paṭhamaṃ pārājikaṃ katihi samuṭṭhānehītiādi pubbe vuttanayattā uttānameva.
೪೭೩. ಚತ್ತಾರೋ ಪಾರಾಜಿಕಾ ಕತಿಹಿ ಸಮುಟ್ಠಾನೇಹೀತಿಆದೀಸು ಉಕ್ಕಟ್ಠಪರಿಚ್ಛೇದತೋ ಯಂ ಯಂ ಸಮುಟ್ಠಾನಂ ಯಸ್ಸ ಯಸ್ಸ ಲಬ್ಭತಿ, ತಂ ಸಬ್ಬಂ ವುತ್ತಮೇವ ಹೋತಿ।
473.Cattāro pārājikā katihi samuṭṭhānehītiādīsu ukkaṭṭhaparicchedato yaṃ yaṃ samuṭṭhānaṃ yassa yassa labbhati, taṃ sabbaṃ vuttameva hoti.
ಆಪತ್ತಿಸಮುಟ್ಠಾನವಣ್ಣನಾ ನಿಟ್ಠಿತಾ।
Āpattisamuṭṭhānavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi
೧. ಪಾರಾಜಿಕಂ • 1. Pārājikaṃ
೩. ಪಾರಾಜಿಕಾದಿ • 3. Pārājikādi
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸಮುಟ್ಠಾನವಣ್ಣನಾ • Samuṭṭhānavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಆಪತ್ತಿಸಮುಟ್ಠಾನವಣ್ಣನಾ • Āpattisamuṭṭhānavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ವೋಹಾರವಗ್ಗಾದಿವಣ್ಣನಾ • Vohāravaggādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಆಪತ್ತಿಸಮುಟ್ಠಾನವಣ್ಣನಾ • Āpattisamuṭṭhānavaṇṇanā
