| Library / Tipiṭaka / तिपिटक • Tipiṭaka / चूळवग्ग-अट्ठकथा • Cūḷavagga-aṭṭhakathā |
आपत्तिया अदस्सने उक्खेपनीयकम्मकथा
Āpattiyā adassane ukkhepanīyakammakathā
४६. छन्नवत्थुस्मिं – आवासपरम्परञ्च भिक्खवे संसथाति सब्बावासेसु आरोचेथ।
46. Channavatthusmiṃ – āvāsaparamparañca bhikkhave saṃsathāti sabbāvāsesu ārocetha.
५०. भण्डनकारकोतिआदीसु भण्डनादिपच्चया आपन्नं आपत्तिं रोपेत्वा तस्सा अदस्सनेयेव कम्मं कातब्बं। तिका वुत्तप्पकारा एव।
50.Bhaṇḍanakārakotiādīsu bhaṇḍanādipaccayā āpannaṃ āpattiṃ ropetvā tassā adassaneyeva kammaṃ kātabbaṃ. Tikā vuttappakārā eva.
५१. सम्मावत्तनायं पनेत्थ तेचत्तालीस वत्तानि। तत्थ न अनुद्धंसेतब्बोति न चोदेतब्बो। न भिक्खु भिक्खूहीति अञ्ञो भिक्खु अञ्ञेहि भिक्खूहि न भिन्दितब्बो। न गिहिद्धजोति ओदातवत्थानि अच्छिन्नदसपुप्फदसानि च न धारेतब्बानि। न तित्थियद्धजोति कुसचीरादीनि न धारेतब्बानि। न आसादेतब्बोति न अपसादेतब्बो। अन्तो वा बहि वाति विहारस्स अन्तो वा बहि वा। न तित्थियादिपदत्तयं उत्तानमेव । सेसं सब्बं पारिवासिकक्खन्धके वण्णयिस्साम। सेसं तज्जनीये वुत्तनयमेव। आपत्तिया अप्पटिकम्मे उक्खेपनीयकम्मं इमिना सदिसमेव।
51. Sammāvattanāyaṃ panettha tecattālīsa vattāni. Tattha na anuddhaṃsetabboti na codetabbo. Na bhikkhu bhikkhūhīti añño bhikkhu aññehi bhikkhūhi na bhinditabbo. Na gihiddhajoti odātavatthāni acchinnadasapupphadasāni ca na dhāretabbāni. Na titthiyaddhajoti kusacīrādīni na dhāretabbāni. Na āsādetabboti na apasādetabbo. Anto vā bahi vāti vihārassa anto vā bahi vā. Na titthiyādipadattayaṃ uttānameva . Sesaṃ sabbaṃ pārivāsikakkhandhake vaṇṇayissāma. Sesaṃ tajjanīye vuttanayameva. Āpattiyā appaṭikamme ukkhepanīyakammaṃ iminā sadisameva.
६५. अरिट्ठवत्थु खुद्दकवण्णनायं वुत्तं। ‘‘भण्डनकारको’’तिआदीसु यं दिट्ठिं निस्साय भण्डनादीनि करोति, तस्सा अप्पटिनिस्सग्गेयेव कम्मं कातब्बं। सेसं तज्जनीये वुत्तनयमेव। सम्मावत्तनायम्पि हि इध तेचत्तालीसंयेव वत्तानीति।
65. Ariṭṭhavatthu khuddakavaṇṇanāyaṃ vuttaṃ. ‘‘Bhaṇḍanakārako’’tiādīsu yaṃ diṭṭhiṃ nissāya bhaṇḍanādīni karoti, tassā appaṭinissaggeyeva kammaṃ kātabbaṃ. Sesaṃ tajjanīye vuttanayameva. Sammāvattanāyampi hi idha tecattālīsaṃyeva vattānīti.
आपत्तिया अदस्सने उक्खेपनीयकम्मकथा निट्ठिता।
Āpattiyā adassane ukkhepanīyakammakathā niṭṭhitā.
कम्मक्खन्धकवण्णना निट्ठिता।
Kammakkhandhakavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / चूळवग्गपाळि • Cūḷavaggapāḷi
५. आपत्तिया अदस्सने उक्खेपनीयकम्मं • 5. Āpattiyā adassane ukkhepanīyakammaṃ
आकङ्खमानछक्कं • Ākaṅkhamānachakkaṃ
तेचत्तालीसवत्तं • Tecattālīsavattaṃ
७. पापिकाय दिट्ठिया अप्पटिनिस्सग्गे उक्खेपनीयकम्मं • 7. Pāpikāya diṭṭhiyā appaṭinissagge ukkhepanīyakammaṃ
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / आपत्तिया अदस्सने उक्खेपनीयकम्मकथावण्णना • Āpattiyā adassane ukkhepanīyakammakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / अधम्मकम्मद्वादसककथावण्णना • Adhammakammadvādasakakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / नियस्सकम्मकथादिवण्णना • Niyassakammakathādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ५. आपत्तिया अदस्सने उक्खेपनीयकम्मकथा • 5. Āpattiyā adassane ukkhepanīyakammakathā
