| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
5. ආපත්‌තියා අදස්‌සනෙ උක්‌ඛෙපනීයකම්‌මකථා
5. Āpattiyā adassane ukkhepanīyakammakathā
46. සංසථාති එත්‌ථ සංසධාතුයා කථනත්‌ථං දස්‌සෙන්‌තො ආහ ‘‘ආරොචෙථා’’ති. තුම්‌හෙ සංසථ, කථෙථාති අත්‌ථො.
46.Saṃsathāti ettha saṃsadhātuyā kathanatthaṃ dassento āha ‘‘ārocethā’’ti. Tumhe saṃsatha, kathethāti attho.
50. භණ්‌ඩනකාරකො හොතීතිආදි කාරණූපචාරවසෙන වුත්‌තොති ආහ ‘‘භණ්‌ඩනාදිපච්‌චයා’’තිආදි. භණ්‌ඩනකාරකාදි කාරණං, තෙන ආපන්‌නා ආපත්‌ති ඵලං, තස්‌සා අදස්‌සනෙ උක්‌ඛෙපනීයකම්‌මං කාතබ්‌බන්‌ති අධිප්‌පායො. තස්‌සාති ආපත්‌තියා.
50.Bhaṇḍanakārako hotītiādi kāraṇūpacāravasena vuttoti āha ‘‘bhaṇḍanādipaccayā’’tiādi. Bhaṇḍanakārakādi kāraṇaṃ, tena āpannā āpatti phalaṃ, tassā adassane ukkhepanīyakammaṃ kātabbanti adhippāyo. Tassāti āpattiyā.
51. එත්‌ථාති උක්‌ඛෙපනීයකම්‌මෙ. තත්‌ථාති තෙචත්‌තාලීසවත්‌තෙසු. අනුද්‌ධංසෙතබ්‌බොති එත්‌ථ ධංසධාතුයා ගත්‍යත්‌ථං පටික්‌ඛිපන්‌තො ආහ ‘‘න චොදෙතබ්‌බො’’ති. ‘‘රජොනුද්‌ධංසතී’’තිආදීසු (බු. වං. 2.101) හි ධංසධාතු ගත්‍යත්‌ථෙ වත්‌තති. ‘‘න භික්‌ඛු භික්‌ඛූහී’’ති එත්‌ථ සොයෙව භික්‌ඛු තෙහෙව භික්‌ඛූහීති අත්‌ථං නිවාරෙන්‌තො ආහ ‘‘අඤ්‌ඤො භික්‌ඛු අඤ්‌ඤෙහි භික්‌ඛූහී’’ති. න ගිහිද්‌ධජොති එත්‌ථ ගිහීනං ධජො ගිහිද්‌ධජොති වුත්‌තෙ ඔදාතවත්‌ථාදීනීති ආහ ‘‘ඔදාතවත්‌ථානී’’තිආදි. න තිත්‌ථියාදිපදත්‌තයන්‌ති ‘‘න තිත්‌ථියා සෙවිතබ්‌බා, භික්‌ඛූ සෙවිතබ්‌බා, භික්‌ඛුසික්‌ඛාය සික්‌ඛිතබ්‌බ’’න්‌ති පදානං තයං. ‘‘න අපසාදෙතබ්‌බො’’ති ඉමිනා න ආසාදෙතබ්‌බොති එත්‌ථ ආපුබ්‌බසදධාතුයා අපපුබ්‌බසදධාතුයා සමානභාවං දස්‌සෙති. ‘‘අන්‌තො වා බහි වාති’’ එත්‌ථ කස්‌ස අන්‌තො වා බහි වාති ආහ ‘‘විහාරස්‌සා’’ති. සෙසං සබ්‌බංවත්‌තන්‌ති යොජනා. ඉමිනාති ආපත්‌තියා අදස්‌සනෙ උක්‌ඛෙපනීයකම්‌මෙන.
51.Etthāti ukkhepanīyakamme. Tatthāti tecattālīsavattesu. Anuddhaṃsetabboti ettha dhaṃsadhātuyā gatyatthaṃ paṭikkhipanto āha ‘‘na codetabbo’’ti. ‘‘Rajonuddhaṃsatī’’tiādīsu (bu. vaṃ. 2.101) hi dhaṃsadhātu gatyatthe vattati. ‘‘Na bhikkhu bhikkhūhī’’ti ettha soyeva bhikkhu teheva bhikkhūhīti atthaṃ nivārento āha ‘‘añño bhikkhu aññehi bhikkhūhī’’ti. Na gihiddhajoti ettha gihīnaṃ dhajo gihiddhajoti vutte odātavatthādīnīti āha ‘‘odātavatthānī’’tiādi. Na titthiyādipadattayanti ‘‘na titthiyā sevitabbā, bhikkhū sevitabbā, bhikkhusikkhāya sikkhitabba’’nti padānaṃ tayaṃ. ‘‘Na apasādetabbo’’ti iminā na āsādetabboti ettha āpubbasadadhātuyā apapubbasadadhātuyā samānabhāvaṃ dasseti. ‘‘Anto vā bahi vāti’’ ettha kassa anto vā bahi vāti āha ‘‘vihārassā’’ti. Sesaṃ sabbaṃvattanti yojanā. Imināti āpattiyā adassane ukkhepanīyakammena.
65. තස්‌සාති ආපත්‌තියා. ඉධාති පාපිකාය දිට්‌ඨියා අප්‌පටිනිස්‌සග්‌ගෙ කතෙ උක්‌ඛෙපනීයකම්‌මෙ. ආපත්‌තිඅදස්‌සනාදීසු උද්‌ධරිත්‌වා ඛිපීයති අපනීයති අනෙන විනයකම්‌මෙනාති උක්‌ඛෙපනීයං, තමෙව කම්‌මං උක්‌ඛෙපනීයකම්‌මං.
65.Tassāti āpattiyā. Idhāti pāpikāya diṭṭhiyā appaṭinissagge kate ukkhepanīyakamme. Āpattiadassanādīsu uddharitvā khipīyati apanīyati anena vinayakammenāti ukkhepanīyaṃ, tameva kammaṃ ukkhepanīyakammaṃ.
ඉති කම්‌මක්‌ඛන්‌ධකවණ්‌ණනාය යොජනා සමත්‌තා.
Iti kammakkhandhakavaṇṇanāya yojanā samattā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi
5. ආපත්‌තියා අදස්‌සනෙ උක්‌ඛෙපනීයකම්‌මං • 5. Āpattiyā adassane ukkhepanīyakammaṃ
ආකඞ්‌ඛමානඡක්‌කං • Ākaṅkhamānachakkaṃ
තෙචත්‌තාලීසවත්‌තං • Tecattālīsavattaṃ
7. පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයකම්‌මං • 7. Pāpikāya diṭṭhiyā appaṭinissagge ukkhepanīyakammaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / ආපත්‌තියා අදස්‌සනෙ උක්‌ඛෙපනීයකම්‌මකථා • Āpattiyā adassane ukkhepanīyakammakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ආපත්‌තියා අදස්‌සනෙ උක්‌ඛෙපනීයකම්‌මකථාවණ්‌ණනා • Āpattiyā adassane ukkhepanīyakammakathāvaṇṇanā
