| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
5. ஆபத்தியா அத³ஸ்ஸனே உக்கே²பனீயகம்மங்
5. Āpattiyā adassane ukkhepanīyakammaṃ
46. தேன ஸமயேன பு³த்³தோ⁴ ப⁴க³வா கோஸம்பி³யங் விஹரதி கோ⁴ஸிதாராமே. தேன கோ² பன ஸமயேன ஆயஸ்மா ச²ன்னோ ஆபத்திங் ஆபஜ்ஜித்வா ந இச்ச²தி ஆபத்திங் பஸ்ஸிதுங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா ச²ன்னோ ஆபத்திங் ஆபஜ்ஜித்வா ந இச்சி²ஸ்ஸதி ஆபத்திங் பஸ்ஸிது’’ந்தி. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்.
46. Tena samayena buddho bhagavā kosambiyaṃ viharati ghositārāme. Tena kho pana samayena āyasmā channo āpattiṃ āpajjitvā na icchati āpattiṃ passituṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā channo āpattiṃ āpajjitvā na icchissati āpattiṃ passitu’’nti. Atha kho te bhikkhū bhagavato etamatthaṃ ārocesuṃ.
அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, ச²ன்னோ பி⁴க்கு² ஆபத்திங் ஆபஜ்ஜித்வா ந இச்ச²தி ஆபத்திங் பஸ்ஸிது’’ந்தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங்…பே॰… கத²ஞ்ஹி நாம ஸோ, பி⁴க்க²வே, மோக⁴புரிஸோ ஆபத்திங் ஆபஜ்ஜித்வா ந இச்சி²ஸ்ஸதி ஆபத்திங் பஸ்ஸிதுங்? நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – தேன ஹி, பி⁴க்க²வே, ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அத³ஸ்ஸனே, உக்கே²பனீயகம்மங் கரோது – அஸம்போ⁴க³ங் ஸங்கே⁴ன. ஏவஞ்ச பன, பி⁴க்க²வே, காதப்³ப³ங் – பட²மங் ச²ன்னோ பி⁴க்கு² சோதே³தப்³போ³, சோதெ³த்வா ஸாரேதப்³போ³, ஸாரெத்வா ஆபத்திங் ஆரோபேதப்³போ³, ஆபத்திங் ஆரோபெத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, channo bhikkhu āpattiṃ āpajjitvā na icchati āpattiṃ passitu’’nti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ…pe… kathañhi nāma so, bhikkhave, moghapuriso āpattiṃ āpajjitvā na icchissati āpattiṃ passituṃ? Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – tena hi, bhikkhave, saṅgho channassa bhikkhuno, āpattiyā adassane, ukkhepanīyakammaṃ karotu – asambhogaṃ saṅghena. Evañca pana, bhikkhave, kātabbaṃ – paṭhamaṃ channo bhikkhu codetabbo, codetvā sāretabbo, sāretvā āpattiṃ āropetabbo, āpattiṃ āropetvā byattena bhikkhunā paṭibalena saṅgho ñāpetabbo –
47. ‘‘ஸுணாது மே, ப⁴ந்தே, ஸங்கோ⁴. அயங் ச²ன்னோ பி⁴க்கு² ஆபத்திங் ஆபஜ்ஜித்வா ந இச்ச²தி ஆபத்திங் பஸ்ஸிதுங். யதி³ ஸங்க⁴ஸ்ஸ பத்தகல்லங், ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அத³ஸ்ஸனே, உக்கே²பனீயகம்மங் கரெய்ய – அஸம்போ⁴க³ங் ஸங்கே⁴ன. ஏஸா ஞத்தி.
47. ‘‘Suṇātu me, bhante, saṅgho. Ayaṃ channo bhikkhu āpattiṃ āpajjitvā na icchati āpattiṃ passituṃ. Yadi saṅghassa pattakallaṃ, saṅgho channassa bhikkhuno, āpattiyā adassane, ukkhepanīyakammaṃ kareyya – asambhogaṃ saṅghena. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் ச²ன்னோ பி⁴க்கு² ஆபத்திங் ஆபஜ்ஜித்வா ந இச்ச²தி ஆபத்திங் பஸ்ஸிதுங். ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அத³ஸ்ஸனே, உக்கே²பனீயகம்மங் கரோதி – அஸம்போ⁴க³ங் ஸங்கே⁴ன. யஸ்ஸாயஸ்மதோ க²மதி ச²ன்னஸ்ஸ பி⁴க்கு²னோ, ஆபத்தியா அத³ஸ்ஸனே, உக்கே²பனீயஸ்ஸ கம்மஸ்ஸ கரணங் – அஸம்போ⁴க³ங் ஸங்கே⁴ன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ channo bhikkhu āpattiṃ āpajjitvā na icchati āpattiṃ passituṃ. Saṅgho channassa bhikkhuno, āpattiyā adassane, ukkhepanīyakammaṃ karoti – asambhogaṃ saṅghena. Yassāyasmato khamati channassa bhikkhuno, āpattiyā adassane, ukkhepanīyassa kammassa karaṇaṃ – asambhogaṃ saṅghena, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. அயங் ச²ன்னோ பி⁴க்கு² ஆபத்திங் ஆபஜ்ஜித்வா ந இச்ச²தி ஆபத்திங் பஸ்ஸிதுங். ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அத³ஸ்ஸனே, உக்கே²பனீயகம்மங் கரோதி – அஸம்போ⁴க³ங் ஸங்கே⁴ன. யஸ்ஸாயஸ்மதோ க²மதி ச²ன்னஸ்ஸ பி⁴க்கு²னோ, ஆபத்தியா அத³ஸ்ஸனே, உக்கே²பனீயஸ்ஸ கம்மஸ்ஸ கரணங் – அஸம்போ⁴க³ங் ஸங்கே⁴ன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ channo bhikkhu āpattiṃ āpajjitvā na icchati āpattiṃ passituṃ. Saṅgho channassa bhikkhuno, āpattiyā adassane, ukkhepanīyakammaṃ karoti – asambhogaṃ saṅghena. Yassāyasmato khamati channassa bhikkhuno, āpattiyā adassane, ukkhepanīyassa kammassa karaṇaṃ – asambhogaṃ saṅghena, so tuṇhassa; yassa nakkhamati, so bhāseyya.
‘‘கதங் ஸங்கே⁴ன ச²ன்னஸ்ஸ பி⁴க்கு²னோ, ஆபத்தியா அத³ஸ்ஸனே, உக்கே²பனீயகம்மங் – அஸம்போ⁴க³ங் ஸங்கே⁴ன. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீதி.
‘‘Kataṃ saṅghena channassa bhikkhuno, āpattiyā adassane, ukkhepanīyakammaṃ – asambhogaṃ saṅghena. Khamati saṅghassa, tasmā tuṇhī, evametaṃ dhārayāmīti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஆபத்தியா அத³ஸ்ஸனே உக்கே²பனீயகம்மகதா² • Āpattiyā adassane ukkhepanīyakammakathā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / நியஸ்ஸகம்மகதா²தி³வண்ணனா • Niyassakammakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ஆபத்தியா அத³ஸ்ஸனே உக்கே²பனீயகம்மகதா² • 5. Āpattiyā adassane ukkhepanīyakammakathā
