| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
5. ආපත්‌තියා අදස්‌සනෙ උක්‌ඛෙපනීයකම්‌මං
5. Āpattiyā adassane ukkhepanīyakammaṃ
46. තෙන සමයෙන බුද්‌ධො භගවා කොසම්‌බියං විහරති ඝොසිතාරාමෙ. තෙන ඛො පන සමයෙන ආයස්‌මා ඡන්‌නො ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතුං. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ආයස්‌මා ඡන්‌නො ආපත්‌තිං ආපජ්‌ජිත්‌වා න ඉච්‌ඡිස්‌සති ආපත්‌තිං පස්‌සිතු’’න්‌ති. අථ ඛො තෙ භික්‌ඛූ භගවතො එතමත්‌ථං ආරොචෙසුං.
46. Tena samayena buddho bhagavā kosambiyaṃ viharati ghositārāme. Tena kho pana samayena āyasmā channo āpattiṃ āpajjitvā na icchati āpattiṃ passituṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā channo āpattiṃ āpajjitvā na icchissati āpattiṃ passitu’’nti. Atha kho te bhikkhū bhagavato etamatthaṃ ārocesuṃ.
අථ ඛො භගවා එතස්‌මිං නිදානෙ එතස්‌මිං පකරණෙ භික්‌ඛුසඞ්‌ඝං සන්‌නිපාතාපෙත්‌වා භික්‌ඛූ පටිපුච්‌ඡි – ‘‘සච්‌චං කිර, භික්‌ඛවෙ, ඡන්‌නො භික්‌ඛු ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතු’’න්‌ති? ‘‘සච්‌චං භගවා’’ති. විගරහි බුද්‌ධො භගවා – ‘‘අනනුච්‌ඡවිකං…පෙ.… කථඤ්‌හි නාම සො, භික්‌ඛවෙ, මොඝපුරිසො ආපත්‌තිං ආපජ්‌ජිත්‌වා න ඉච්‌ඡිස්‌සති ආපත්‌තිං පස්‌සිතුං? නෙතං, භික්‌ඛවෙ, අප්‌පසන්‌නානං වා පසාදාය…පෙ.… විගරහිත්‌වා…පෙ.… ධම්‌මිං කථං කත්‌වා භික්‌ඛූ ආමන්‌තෙසි – තෙන හි, භික්‌ඛවෙ, සඞ්‌ඝො ඡන්‌නස්‌ස භික්‌ඛුනො, ආපත්‌තියා අදස්‌සනෙ, උක්‌ඛෙපනීයකම්‌මං කරොතු – අසම්‌භොගං සඞ්‌ඝෙන. එවඤ්‌ච පන, භික්‌ඛවෙ, කාතබ්‌බං – පඨමං ඡන්‌නො භික්‌ඛු චොදෙතබ්‌බො, චොදෙත්‌වා සාරෙතබ්‌බො, සාරෙත්‌වා ආපත්‌තිං ආරොපෙතබ්‌බො, ආපත්‌තිං ආරොපෙත්‌වා බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, channo bhikkhu āpattiṃ āpajjitvā na icchati āpattiṃ passitu’’nti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ…pe… kathañhi nāma so, bhikkhave, moghapuriso āpattiṃ āpajjitvā na icchissati āpattiṃ passituṃ? Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – tena hi, bhikkhave, saṅgho channassa bhikkhuno, āpattiyā adassane, ukkhepanīyakammaṃ karotu – asambhogaṃ saṅghena. Evañca pana, bhikkhave, kātabbaṃ – paṭhamaṃ channo bhikkhu codetabbo, codetvā sāretabbo, sāretvā āpattiṃ āropetabbo, āpattiṃ āropetvā byattena bhikkhunā paṭibalena saṅgho ñāpetabbo –
47. ‘‘සුණාතු මෙ, භන්‌තෙ, සඞ්‌ඝො. අයං ඡන්‌නො භික්‌ඛු ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතුං. යදි සඞ්‌ඝස්‌ස පත්‌තකල්‌ලං, සඞ්‌ඝො ඡන්‌නස්‌ස භික්‌ඛුනො, ආපත්‌තියා අදස්‌සනෙ, උක්‌ඛෙපනීයකම්‌මං කරෙය්‍ය – අසම්‌භොගං සඞ්‌ඝෙන. එසා ඤත්‌ති.
47. ‘‘Suṇātu me, bhante, saṅgho. Ayaṃ channo bhikkhu āpattiṃ āpajjitvā na icchati āpattiṃ passituṃ. Yadi saṅghassa pattakallaṃ, saṅgho channassa bhikkhuno, āpattiyā adassane, ukkhepanīyakammaṃ kareyya – asambhogaṃ saṅghena. Esā ñatti.
‘‘සුණාතු මෙ, භන්‌තෙ, සඞ්‌ඝො. අයං ඡන්‌නො භික්‌ඛු ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතුං. සඞ්‌ඝො ඡන්‌නස්‌ස භික්‌ඛුනො, ආපත්‌තියා අදස්‌සනෙ, උක්‌ඛෙපනීයකම්‌මං කරොති – අසම්‌භොගං සඞ්‌ඝෙන. යස්‌සායස්‌මතො ඛමති ඡන්‌නස්‌ස භික්‌ඛුනො, ආපත්‌තියා අදස්‌සනෙ, උක්‌ඛෙපනීයස්‌ස කම්‌මස්‌ස කරණං – අසම්‌භොගං සඞ්‌ඝෙන, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Ayaṃ channo bhikkhu āpattiṃ āpajjitvā na icchati āpattiṃ passituṃ. Saṅgho channassa bhikkhuno, āpattiyā adassane, ukkhepanīyakammaṃ karoti – asambhogaṃ saṅghena. Yassāyasmato khamati channassa bhikkhuno, āpattiyā adassane, ukkhepanīyassa kammassa karaṇaṃ – asambhogaṃ saṅghena, so tuṇhassa; yassa nakkhamati, so bhāseyya.
‘‘දුතියම්‌පි එතමත්‌ථං වදාමි…පෙ.… තතියම්‌පි එතමත්‌ථං වදාමි – සුණාතු මෙ, භන්‌තෙ, සඞ්‌ඝො. අයං ඡන්‌නො භික්‌ඛු ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතුං. සඞ්‌ඝො ඡන්‌නස්‌ස භික්‌ඛුනො, ආපත්‌තියා අදස්‌සනෙ, උක්‌ඛෙපනීයකම්‌මං කරොති – අසම්‌භොගං සඞ්‌ඝෙන. යස්‌සායස්‌මතො ඛමති ඡන්‌නස්‌ස භික්‌ඛුනො, ආපත්‌තියා අදස්‌සනෙ, උක්‌ඛෙපනීයස්‌ස කම්‌මස්‌ස කරණං – අසම්‌භොගං සඞ්‌ඝෙන, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ channo bhikkhu āpattiṃ āpajjitvā na icchati āpattiṃ passituṃ. Saṅgho channassa bhikkhuno, āpattiyā adassane, ukkhepanīyakammaṃ karoti – asambhogaṃ saṅghena. Yassāyasmato khamati channassa bhikkhuno, āpattiyā adassane, ukkhepanīyassa kammassa karaṇaṃ – asambhogaṃ saṅghena, so tuṇhassa; yassa nakkhamati, so bhāseyya.
‘‘කතං සඞ්‌ඝෙන ඡන්‌නස්‌ස භික්‌ඛුනො, ආපත්‌තියා අදස්‌සනෙ, උක්‌ඛෙපනීයකම්‌මං – අසම්‌භොගං සඞ්‌ඝෙන. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමීති.
‘‘Kataṃ saṅghena channassa bhikkhuno, āpattiyā adassane, ukkhepanīyakammaṃ – asambhogaṃ saṅghena. Khamati saṅghassa, tasmā tuṇhī, evametaṃ dhārayāmīti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / ආපත්‌තියා අදස්‌සනෙ උක්‌ඛෙපනීයකම්‌මකථා • Āpattiyā adassane ukkhepanīyakammakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / නියස්‌සකම්‌මකථාදිවණ්‌ණනා • Niyassakammakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 5. ආපත්‌තියා අදස්‌සනෙ උක්‌ඛෙපනීයකම්‌මකථා • 5. Āpattiyā adassane ukkhepanīyakammakathā
