| Library / Tipiṭaka / ติปิฎก • Tipiṭaka / มหาวคฺคปาฬิ • Mahāvaggapāḷi |
๑๙๘. อปวิลายนนวกํ
198. Apavilāyananavakaṃ
๓๒๑. ภิกฺขุ อตฺถตกถิโน ทิสํคมิโก ปกฺกมติ จีวรปฎิวีสํ อปวิลายมาโน 1ฯ ตเมนํ ทิสงฺคตํ ภิกฺขู ปุจฺฉนฺติ – ‘‘กหํ ตฺวํ, อาวุโส, วสฺสํวุโฎฺฐ, กตฺถ จ เต จีวรปฎิวีโส’’ติ? โส เอวํ วเทติ – ‘‘อมุกสฺมิํ อาวาเส วสฺสํวุโฎฺฐมฺหิฯ ตตฺถ จ เม จีวรปฎิวีโส’’ติฯ เต เอวํ วทนฺติ – ‘‘คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา’’ติฯ โส ตํ อาวาสํ คนฺตฺวา ภิกฺขู ปุจฺฉติ – ‘‘กหํ เม, อาวุโส, จีวรปฎิวีโส’’ติ? เต เอวํ วทนฺติ – ‘‘อยํ เต, อาวุโส, จีวรปฎิวีโส; กหํ คมิสฺสสี’’ติ? โส เอวํ วเทติ – ‘‘อมุกํ นาม 2 อาวาสํ คมิสฺสามิ, ตตฺถ เม ภิกฺขู จีวรํ กริสฺสนฺตี’’ติฯ เต เอวํ วทนฺติ – ‘‘อลํ, อาวุโส, มา อคมาสิฯ มยํ เต อิธ จีวรํ กริสฺสามา’’ติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปเจฺจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฎฺฐานนฺติโก กถินุทฺธาโรฯ
321. Bhikkhu atthatakathino disaṃgamiko pakkamati cīvarapaṭivīsaṃ apavilāyamāno 3. Tamenaṃ disaṅgataṃ bhikkhū pucchanti – ‘‘kahaṃ tvaṃ, āvuso, vassaṃvuṭṭho, kattha ca te cīvarapaṭivīso’’ti? So evaṃ vadeti – ‘‘amukasmiṃ āvāse vassaṃvuṭṭhomhi. Tattha ca me cīvarapaṭivīso’’ti. Te evaṃ vadanti – ‘‘gacchāvuso, taṃ cīvaraṃ āhara, mayaṃ te idha cīvaraṃ karissāmā’’ti. So taṃ āvāsaṃ gantvā bhikkhū pucchati – ‘‘kahaṃ me, āvuso, cīvarapaṭivīso’’ti? Te evaṃ vadanti – ‘‘ayaṃ te, āvuso, cīvarapaṭivīso; kahaṃ gamissasī’’ti? So evaṃ vadeti – ‘‘amukaṃ nāma 4 āvāsaṃ gamissāmi, tattha me bhikkhū cīvaraṃ karissantī’’ti. Te evaṃ vadanti – ‘‘alaṃ, āvuso, mā agamāsi. Mayaṃ te idha cīvaraṃ karissāmā’’ti. Tassa evaṃ hoti – ‘‘idhevimaṃ cīvaraṃ kāressaṃ, na paccessa’’nti. So taṃ cīvaraṃ kāreti. Tassa bhikkhuno niṭṭhānantiko kathinuddhāro.
ภิกฺขุ อตฺถตกถิโน ทิสํคมิโก ปกฺกมติ…เป.… ‘‘เนวิมํ จีวรํ กาเรสฺสํ, น ปเจฺจสฺส’’นฺติฯ ตสฺส ภิกฺขุโน สนฺนิฎฺฐานนฺติโก กถินุทฺธาโรฯ
Bhikkhu atthatakathino disaṃgamiko pakkamati…pe… ‘‘nevimaṃ cīvaraṃ kāressaṃ, na paccessa’’nti. Tassa bhikkhuno sanniṭṭhānantiko kathinuddhāro.
ภิกฺขุ อตฺถตกถิโน ทิสํคมิโก ปกฺกมติ…เป.… ‘‘อิเธวิมํ จีวรํ กาเรสฺสํ, น ปเจฺจสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ
Bhikkhu atthatakathino disaṃgamiko pakkamati…pe… ‘‘idhevimaṃ cīvaraṃ kāressaṃ, na paccessa’’nti. So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro.
๓๒๒. ภิกฺขุ อตฺถตกถิโน ทิสํคมิโก ปกฺกมติ จีวรปฎิวีสํ อปวิลายมาโนฯ ตเมนํ ทิสํคตํ ภิกฺขู ปุจฺฉนฺติ – ‘‘กหํ ตฺวํ, อาวุโส, วสฺสํวุโฎฺฐ , กตฺถ จ เต จีวรปฎิวีโส’’ติ? โส เอวํ วเทติ – ‘‘อมุกสฺมิํ อาวาเส วสฺสํวุโฎฺฐมฺหิ, ตตฺถ จ เม จีวรปฎิวีโส’’ติฯ เต เอวํ วทนฺติ – ‘‘คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา’’ติฯ โส ตํ อาวาสํ คนฺตฺวา ภิกฺขู ปุจฺฉติ – ‘‘กหํ เม, อาวุโส, จีวรปฎิวีโส’’ติ? เต เอวํ วทนฺติ – ‘‘อยํ เต, อาวุโส, จีวรปฎิวีโส’’ติฯ โส ตํ จีวรํ อาทาย ตํ อาวาสํ คจฺฉติฯ ตเมนํ อนฺตรามเคฺค ภิกฺขู ปุจฺฉนฺติ – ‘‘อาวุโส, กหํ คมิสฺสสี’’ติ? โส เอวํ วเทติ – ‘‘อมุกํ นาม อาวาสํ คมิสฺสามิ, ตตฺถ เม ภิกฺขู จีวรํ กริสฺสนฺตี’’ติฯ เต เอวํ วทนฺติ – ‘‘อลํ, อาวุโส, มา อคมาสิ, มยํ เต อิธ จีวรํ กริสฺสามา’’ติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ น ปเจฺจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฎฺฐานนฺติโก กถินุทฺธาโรฯ
322. Bhikkhu atthatakathino disaṃgamiko pakkamati cīvarapaṭivīsaṃ apavilāyamāno. Tamenaṃ disaṃgataṃ bhikkhū pucchanti – ‘‘kahaṃ tvaṃ, āvuso, vassaṃvuṭṭho , kattha ca te cīvarapaṭivīso’’ti? So evaṃ vadeti – ‘‘amukasmiṃ āvāse vassaṃvuṭṭhomhi, tattha ca me cīvarapaṭivīso’’ti. Te evaṃ vadanti – ‘‘gacchāvuso, taṃ cīvaraṃ āhara, mayaṃ te idha cīvaraṃ karissāmā’’ti. So taṃ āvāsaṃ gantvā bhikkhū pucchati – ‘‘kahaṃ me, āvuso, cīvarapaṭivīso’’ti? Te evaṃ vadanti – ‘‘ayaṃ te, āvuso, cīvarapaṭivīso’’ti. So taṃ cīvaraṃ ādāya taṃ āvāsaṃ gacchati. Tamenaṃ antarāmagge bhikkhū pucchanti – ‘‘āvuso, kahaṃ gamissasī’’ti? So evaṃ vadeti – ‘‘amukaṃ nāma āvāsaṃ gamissāmi, tattha me bhikkhū cīvaraṃ karissantī’’ti. Te evaṃ vadanti – ‘‘alaṃ, āvuso, mā agamāsi, mayaṃ te idha cīvaraṃ karissāmā’’ti. Tassa evaṃ hoti – ‘‘idhevimaṃ cīvaraṃ kāressaṃ na paccessa’’nti. So taṃ cīvaraṃ kāreti. Tassa bhikkhuno niṭṭhānantiko kathinuddhāro.
ภิกฺขุ อตฺถตกถิโน ทิสํคมิโก ปกฺกมติ จีวรปฎิวีสํ อปวิลายมาโนฯ ตเมนํ ทิสํคตํ ภิกฺขู ปุจฺฉนฺติ – ‘‘กหํ ตฺวํ, อาวุโส, วสฺสํวุโฎฺฐ, กตฺถ จ เต จีวรปฎิวีโส’’ติ? โส เอวํ วเทติ – ‘‘อมุกสฺมิํ อาวาเส วสฺสํวุโฎฺฐมฺหิ, ตตฺถ จ เม จีวรปฎิวีโส’’ติฯ เต เอวํ วทนฺติ – ‘‘คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา’’ติฯ โส ตํ อาวาสํ คนฺตฺวา ภิกฺขู ปุจฺฉติ – ‘‘กหํ เม, อาวุโส, จีวรปฎิวีโส’’ติ? เต เอวํ วทนฺติ – ‘‘อยํ เต, อาวุโส, จีวรปฎิวีโส’’ติฯ โส ตํ จีวรํ อาทาย ตํ อาวาสํ คจฺฉติฯ ตเมนํ อนฺตรามเคฺค ภิกฺขู ปุจฺฉนฺติ – ‘‘อาวุโส, กหํ คมิสฺสสี’’ติ? โส เอวํ วเทติ – ‘‘อมุกํ นาม อาวาสํ คมิสฺสามิ, ตตฺถ เม ภิกฺขู จีวรํ กริสฺสนฺตี’’ติฯ เต เอวํ วทนฺติ – ‘‘อลํ, อาวุโส, มา อคมาสิ, มยํ เต อิธ จีวรํ กริสฺสามา’’ติฯ ตสฺส เอวํ โหติ – ‘‘เนวิมํ จีวรํ กาเรสฺสํ, น ปเจฺจสฺส’’นฺติฯ ตสฺส ภิกฺขุโน สนฺนิฎฺฐานนฺติโก กถินุทฺธาโรฯ
Bhikkhu atthatakathino disaṃgamiko pakkamati cīvarapaṭivīsaṃ apavilāyamāno. Tamenaṃ disaṃgataṃ bhikkhū pucchanti – ‘‘kahaṃ tvaṃ, āvuso, vassaṃvuṭṭho, kattha ca te cīvarapaṭivīso’’ti? So evaṃ vadeti – ‘‘amukasmiṃ āvāse vassaṃvuṭṭhomhi, tattha ca me cīvarapaṭivīso’’ti. Te evaṃ vadanti – ‘‘gacchāvuso, taṃ cīvaraṃ āhara, mayaṃ te idha cīvaraṃ karissāmā’’ti. So taṃ āvāsaṃ gantvā bhikkhū pucchati – ‘‘kahaṃ me, āvuso, cīvarapaṭivīso’’ti? Te evaṃ vadanti – ‘‘ayaṃ te, āvuso, cīvarapaṭivīso’’ti. So taṃ cīvaraṃ ādāya taṃ āvāsaṃ gacchati. Tamenaṃ antarāmagge bhikkhū pucchanti – ‘‘āvuso, kahaṃ gamissasī’’ti? So evaṃ vadeti – ‘‘amukaṃ nāma āvāsaṃ gamissāmi, tattha me bhikkhū cīvaraṃ karissantī’’ti. Te evaṃ vadanti – ‘‘alaṃ, āvuso, mā agamāsi, mayaṃ te idha cīvaraṃ karissāmā’’ti. Tassa evaṃ hoti – ‘‘nevimaṃ cīvaraṃ kāressaṃ, na paccessa’’nti. Tassa bhikkhuno sanniṭṭhānantiko kathinuddhāro.
ภิกฺขุ อตฺถตกถิโน ทิสํคมิโก ปกฺกมติ…เป.… ‘‘อิเธวิมํ จีวรํ กาเรสฺสํ, น ปเจฺจสฺส’’นฺติ ฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ
Bhikkhu atthatakathino disaṃgamiko pakkamati…pe… ‘‘idhevimaṃ cīvaraṃ kāressaṃ, na paccessa’’nti . So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro.
๓๒๓. ภิกฺขุ อตฺถตกถิโน ทิสํคมิโก ปกฺกมติ จีวรปฎิวีสํ อปวิลายมาโนฯ ตเมนํ ทิสํคตํ ภิกฺขู ปุจฺฉนฺติ – ‘‘กหํ ตฺวํ, อาวุโส, วสฺสํวุโฎฺฐ, กตฺถ จ เต จีวรปฎิวีโส’’ติ? โส เอวํ วเทติ – ‘‘อมุกสฺมิํ อาวาเส วสฺสํวุโฎฺฐมฺหิ, ตตฺถ จ เม จีวรปฎิวีโส’’ติฯ เต เอวํ วทนฺติ – ‘‘คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา’’ติฯ โส ตํ อาวาสํ คนฺตฺวา ภิกฺขู ปุจฺฉติ – ‘‘กหํ เม, อาวุโส, จีวรปฎิวีโส’’ติ? เต เอวํ วทนฺติ – ‘‘อยํ เต, อาวุโส, จีวรปฎิวีโส’’ติฯ โส ตํ จีวรํ อาทาย ตํ อาวาสํ คจฺฉติฯ ตสฺส ตํ อาวาสํ คตสฺส เอวํ โหติ – ‘‘อิเธวิมํ จีวรํ กาเรสฺสํ, น ปเจฺจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฎฺฐานนฺติโก กถินุทฺธาโรฯ
323. Bhikkhu atthatakathino disaṃgamiko pakkamati cīvarapaṭivīsaṃ apavilāyamāno. Tamenaṃ disaṃgataṃ bhikkhū pucchanti – ‘‘kahaṃ tvaṃ, āvuso, vassaṃvuṭṭho, kattha ca te cīvarapaṭivīso’’ti? So evaṃ vadeti – ‘‘amukasmiṃ āvāse vassaṃvuṭṭhomhi, tattha ca me cīvarapaṭivīso’’ti. Te evaṃ vadanti – ‘‘gacchāvuso, taṃ cīvaraṃ āhara, mayaṃ te idha cīvaraṃ karissāmā’’ti. So taṃ āvāsaṃ gantvā bhikkhū pucchati – ‘‘kahaṃ me, āvuso, cīvarapaṭivīso’’ti? Te evaṃ vadanti – ‘‘ayaṃ te, āvuso, cīvarapaṭivīso’’ti. So taṃ cīvaraṃ ādāya taṃ āvāsaṃ gacchati. Tassa taṃ āvāsaṃ gatassa evaṃ hoti – ‘‘idhevimaṃ cīvaraṃ kāressaṃ, na paccessa’’nti. So taṃ cīvaraṃ kāreti. Tassa bhikkhuno niṭṭhānantiko kathinuddhāro.
ภิกฺขุ อตฺถตกถิโน ทิสํคมิโก ปกฺกมติ…เป.… ‘‘เนวิมํ จีวรํ กาเรสฺสํ, น ปเจฺจสฺส’’นฺติฯ ตสฺส ภิกฺขุโน สนฺนิฎฺฐานนฺติโก กถินุทฺธาโรฯ
Bhikkhu atthatakathino disaṃgamiko pakkamati…pe… ‘‘nevimaṃ cīvaraṃ kāressaṃ, na paccessa’’nti. Tassa bhikkhuno sanniṭṭhānantiko kathinuddhāro.
ภิกฺขุ อตฺถตกถิโน ทิสํคมิโก ปกฺกมติ…เป.… ‘‘อิเธวิมํ จีวรํ กาเรสฺสํ, น ปเจฺจสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ
Bhikkhu atthatakathino disaṃgamiko pakkamati…pe… ‘‘idhevimaṃ cīvaraṃ kāressaṃ, na paccessa’’nti. So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro.
อปวิลายนนวกํ นิฎฺฐิตํฯ
Apavilāyananavakaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / อาทายสตฺตกกถา • Ādāyasattakakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / อาทายสตฺตกาทิกถาวณฺณนา • Ādāyasattakādikathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / อาทายสตฺตกกถาวณฺณนา • Ādāyasattakakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / อาทายสตฺตกกถาวณฺณนา • Ādāyasattakakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๑๘๘. อาทายสตฺตกกถา • 188. Ādāyasattakakathā
