| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၉၈. အပဝိလာယနနဝကံ
198. Apavilāyananavakaṃ
၃၂၁. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော 1။ တမေနံ ဒိသင္ဂတံ ဘိက္ခူ ပုစ္ဆန္တိ – ‘‘ကဟံ တ္ဝံ, အာဝုသော, ဝသ္သံဝုဋ္ဌော, ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝာသေ ဝသ္သံဝုဋ္ဌောမ္ဟိ။ တတ္ထ စ မေ စီဝရပဋိဝီသော’’တိ။ တေ ဧဝံ ဝဒန္တိ – ‘‘ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိသ္သာမာ’’တိ။ သော တံ အာဝာသံ ဂန္တ္ဝာ ဘိက္ခူ ပုစ္ဆတိ – ‘‘ကဟံ မေ, အာဝုသော, စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ, အာဝုသော, စီဝရပဋိဝီသော; ကဟံ ဂမိသ္သသီ’’တိ? သော ဧဝံ ဝဒေတိ – ‘‘အမုကံ နာမ 2 အာဝာသံ ဂမိသ္သာမိ, တတ္ထ မေ ဘိက္ခူ စီဝရံ ကရိသ္သန္တီ’’တိ။ တေ ဧဝံ ဝဒန္တိ – ‘‘အလံ, အာဝုသော, မာ အဂမာသိ။ မယံ တေ ဣဓ စီဝရံ ကရိသ္သာမာ’’တိ။ တသ္သ ဧဝံ ဟောတိ – ‘‘ဣဓေဝိမံ စီဝရံ ကာရေသ္သံ, န ပစ္စေသ္သ’’န္တိ။ သော တံ စီဝရံ ကာရေတိ။ တသ္သ ဘိက္ခုနော နိဋ္ဌာနန္တိကော ကထိနုဒ္ဓာရော။
321. Bhikkhu atthatakathino disaṃgamiko pakkamati cīvarapaṭivīsaṃ apavilāyamāno 3. Tamenaṃ disaṅgataṃ bhikkhū pucchanti – ‘‘kahaṃ tvaṃ, āvuso, vassaṃvuṭṭho, kattha ca te cīvarapaṭivīso’’ti? So evaṃ vadeti – ‘‘amukasmiṃ āvāse vassaṃvuṭṭhomhi. Tattha ca me cīvarapaṭivīso’’ti. Te evaṃ vadanti – ‘‘gacchāvuso, taṃ cīvaraṃ āhara, mayaṃ te idha cīvaraṃ karissāmā’’ti. So taṃ āvāsaṃ gantvā bhikkhū pucchati – ‘‘kahaṃ me, āvuso, cīvarapaṭivīso’’ti? Te evaṃ vadanti – ‘‘ayaṃ te, āvuso, cīvarapaṭivīso; kahaṃ gamissasī’’ti? So evaṃ vadeti – ‘‘amukaṃ nāma 4 āvāsaṃ gamissāmi, tattha me bhikkhū cīvaraṃ karissantī’’ti. Te evaṃ vadanti – ‘‘alaṃ, āvuso, mā agamāsi. Mayaṃ te idha cīvaraṃ karissāmā’’ti. Tassa evaṃ hoti – ‘‘idhevimaṃ cīvaraṃ kāressaṃ, na paccessa’’nti. So taṃ cīvaraṃ kāreti. Tassa bhikkhuno niṭṭhānantiko kathinuddhāro.
ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘နေဝိမံ စီဝရံ ကာရေသ္သံ, န ပစ္စေသ္သ’’န္တိ။ တသ္သ ဘိက္ခုနော သန္နိဋ္ဌာနန္တိကော ကထိနုဒ္ဓာရော။
Bhikkhu atthatakathino disaṃgamiko pakkamati…pe… ‘‘nevimaṃ cīvaraṃ kāressaṃ, na paccessa’’nti. Tassa bhikkhuno sanniṭṭhānantiko kathinuddhāro.
ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘ဣဓေဝိမံ စီဝရံ ကာရေသ္သံ, န ပစ္စေသ္သ’’န္တိ။ သော တံ စီဝရံ ကာရေတိ။ တသ္သ တံ စီဝရံ ကယိရမာနံ နသ္သတိ။ တသ္သ ဘိက္ခုနော နာသနန္တိကော ကထိနုဒ္ဓာရော။
Bhikkhu atthatakathino disaṃgamiko pakkamati…pe… ‘‘idhevimaṃ cīvaraṃ kāressaṃ, na paccessa’’nti. So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro.
၃၂၂. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော။ တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တ္ဝံ, အာဝုသော, ဝသ္သံဝုဋ္ဌော , ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝာသေ ဝသ္သံဝုဋ္ဌောမ္ဟိ, တတ္ထ စ မေ စီဝရပဋိဝီသော’’တိ။ တေ ဧဝံ ဝဒန္တိ – ‘‘ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိသ္သာမာ’’တိ။ သော တံ အာဝာသံ ဂန္တ္ဝာ ဘိက္ခူ ပုစ္ဆတိ – ‘‘ကဟံ မေ, အာဝုသော, စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ, အာဝုသော, စီဝရပဋိဝီသော’’တိ။ သော တံ စီဝရံ အာဒာယ တံ အာဝာသံ ဂစ္ဆတိ။ တမေနံ အန္တရာမဂ္ဂေ ဘိက္ခူ ပုစ္ဆန္တိ – ‘‘အာဝုသော, ကဟံ ဂမိသ္သသီ’’တိ? သော ဧဝံ ဝဒေတိ – ‘‘အမုကံ နာမ အာဝာသံ ဂမိသ္သာမိ, တတ္ထ မေ ဘိက္ခူ စီဝရံ ကရိသ္သန္တီ’’တိ။ တေ ဧဝံ ဝဒန္တိ – ‘‘အလံ, အာဝုသော, မာ အဂမာသိ, မယံ တေ ဣဓ စီဝရံ ကရိသ္သာမာ’’တိ။ တသ္သ ဧဝံ ဟောတိ – ‘‘ဣဓေဝိမံ စီဝရံ ကာရေသ္သံ န ပစ္စေသ္သ’’န္တိ။ သော တံ စီဝရံ ကာရေတိ။ တသ္သ ဘိက္ခုနော နိဋ္ဌာနန္တိကော ကထိနုဒ္ဓာရော။
322. Bhikkhu atthatakathino disaṃgamiko pakkamati cīvarapaṭivīsaṃ apavilāyamāno. Tamenaṃ disaṃgataṃ bhikkhū pucchanti – ‘‘kahaṃ tvaṃ, āvuso, vassaṃvuṭṭho , kattha ca te cīvarapaṭivīso’’ti? So evaṃ vadeti – ‘‘amukasmiṃ āvāse vassaṃvuṭṭhomhi, tattha ca me cīvarapaṭivīso’’ti. Te evaṃ vadanti – ‘‘gacchāvuso, taṃ cīvaraṃ āhara, mayaṃ te idha cīvaraṃ karissāmā’’ti. So taṃ āvāsaṃ gantvā bhikkhū pucchati – ‘‘kahaṃ me, āvuso, cīvarapaṭivīso’’ti? Te evaṃ vadanti – ‘‘ayaṃ te, āvuso, cīvarapaṭivīso’’ti. So taṃ cīvaraṃ ādāya taṃ āvāsaṃ gacchati. Tamenaṃ antarāmagge bhikkhū pucchanti – ‘‘āvuso, kahaṃ gamissasī’’ti? So evaṃ vadeti – ‘‘amukaṃ nāma āvāsaṃ gamissāmi, tattha me bhikkhū cīvaraṃ karissantī’’ti. Te evaṃ vadanti – ‘‘alaṃ, āvuso, mā agamāsi, mayaṃ te idha cīvaraṃ karissāmā’’ti. Tassa evaṃ hoti – ‘‘idhevimaṃ cīvaraṃ kāressaṃ na paccessa’’nti. So taṃ cīvaraṃ kāreti. Tassa bhikkhuno niṭṭhānantiko kathinuddhāro.
ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော။ တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တ္ဝံ, အာဝုသော, ဝသ္သံဝုဋ္ဌော, ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝာသေ ဝသ္သံဝုဋ္ဌောမ္ဟိ, တတ္ထ စ မေ စီဝရပဋိဝီသော’’တိ။ တေ ဧဝံ ဝဒန္တိ – ‘‘ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိသ္သာမာ’’တိ။ သော တံ အာဝာသံ ဂန္တ္ဝာ ဘိက္ခူ ပုစ္ဆတိ – ‘‘ကဟံ မေ, အာဝုသော, စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ, အာဝုသော, စီဝရပဋိဝီသော’’တိ။ သော တံ စီဝရံ အာဒာယ တံ အာဝာသံ ဂစ္ဆတိ။ တမေနံ အန္တရာမဂ္ဂေ ဘိက္ခူ ပုစ္ဆန္တိ – ‘‘အာဝုသော, ကဟံ ဂမိသ္သသီ’’တိ? သော ဧဝံ ဝဒေတိ – ‘‘အမုကံ နာမ အာဝာသံ ဂမိသ္သာမိ, တတ္ထ မေ ဘိက္ခူ စီဝရံ ကရိသ္သန္တီ’’တိ။ တေ ဧဝံ ဝဒန္တိ – ‘‘အလံ, အာဝုသော, မာ အဂမာသိ, မယံ တေ ဣဓ စီဝရံ ကရိသ္သာမာ’’တိ။ တသ္သ ဧဝံ ဟောတိ – ‘‘နေဝိမံ စီဝရံ ကာရေသ္သံ, န ပစ္စေသ္သ’’န္တိ။ တသ္သ ဘိက္ခုနော သန္နိဋ္ဌာနန္တိကော ကထိနုဒ္ဓာရော။
Bhikkhu atthatakathino disaṃgamiko pakkamati cīvarapaṭivīsaṃ apavilāyamāno. Tamenaṃ disaṃgataṃ bhikkhū pucchanti – ‘‘kahaṃ tvaṃ, āvuso, vassaṃvuṭṭho, kattha ca te cīvarapaṭivīso’’ti? So evaṃ vadeti – ‘‘amukasmiṃ āvāse vassaṃvuṭṭhomhi, tattha ca me cīvarapaṭivīso’’ti. Te evaṃ vadanti – ‘‘gacchāvuso, taṃ cīvaraṃ āhara, mayaṃ te idha cīvaraṃ karissāmā’’ti. So taṃ āvāsaṃ gantvā bhikkhū pucchati – ‘‘kahaṃ me, āvuso, cīvarapaṭivīso’’ti? Te evaṃ vadanti – ‘‘ayaṃ te, āvuso, cīvarapaṭivīso’’ti. So taṃ cīvaraṃ ādāya taṃ āvāsaṃ gacchati. Tamenaṃ antarāmagge bhikkhū pucchanti – ‘‘āvuso, kahaṃ gamissasī’’ti? So evaṃ vadeti – ‘‘amukaṃ nāma āvāsaṃ gamissāmi, tattha me bhikkhū cīvaraṃ karissantī’’ti. Te evaṃ vadanti – ‘‘alaṃ, āvuso, mā agamāsi, mayaṃ te idha cīvaraṃ karissāmā’’ti. Tassa evaṃ hoti – ‘‘nevimaṃ cīvaraṃ kāressaṃ, na paccessa’’nti. Tassa bhikkhuno sanniṭṭhānantiko kathinuddhāro.
ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘ဣဓေဝိမံ စီဝရံ ကာရေသ္သံ, န ပစ္စေသ္သ’’န္တိ ။ သော တံ စီဝရံ ကာရေတိ။ တသ္သ တံ စီဝရံ ကယိရမာနံ နသ္သတိ။ တသ္သ ဘိက္ခုနော နာသနန္တိကော ကထိနုဒ္ဓာရော။
Bhikkhu atthatakathino disaṃgamiko pakkamati…pe… ‘‘idhevimaṃ cīvaraṃ kāressaṃ, na paccessa’’nti . So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro.
၃၂၃. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော။ တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တ္ဝံ, အာဝုသော, ဝသ္သံဝုဋ္ဌော, ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝာသေ ဝသ္သံဝုဋ္ဌောမ္ဟိ, တတ္ထ စ မေ စီဝရပဋိဝီသော’’တိ။ တေ ဧဝံ ဝဒန္တိ – ‘‘ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိသ္သာမာ’’တိ။ သော တံ အာဝာသံ ဂန္တ္ဝာ ဘိက္ခူ ပုစ္ဆတိ – ‘‘ကဟံ မေ, အာဝုသော, စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ, အာဝုသော, စီဝရပဋိဝီသော’’တိ။ သော တံ စီဝရံ အာဒာယ တံ အာဝာသံ ဂစ္ဆတိ။ တသ္သ တံ အာဝာသံ ဂတသ္သ ဧဝံ ဟောတိ – ‘‘ဣဓေဝိမံ စီဝရံ ကာရေသ္သံ, န ပစ္စေသ္သ’’န္တိ။ သော တံ စီဝရံ ကာရေတိ။ တသ္သ ဘိက္ခုနော နိဋ္ဌာနန္တိကော ကထိနုဒ္ဓာရော။
323. Bhikkhu atthatakathino disaṃgamiko pakkamati cīvarapaṭivīsaṃ apavilāyamāno. Tamenaṃ disaṃgataṃ bhikkhū pucchanti – ‘‘kahaṃ tvaṃ, āvuso, vassaṃvuṭṭho, kattha ca te cīvarapaṭivīso’’ti? So evaṃ vadeti – ‘‘amukasmiṃ āvāse vassaṃvuṭṭhomhi, tattha ca me cīvarapaṭivīso’’ti. Te evaṃ vadanti – ‘‘gacchāvuso, taṃ cīvaraṃ āhara, mayaṃ te idha cīvaraṃ karissāmā’’ti. So taṃ āvāsaṃ gantvā bhikkhū pucchati – ‘‘kahaṃ me, āvuso, cīvarapaṭivīso’’ti? Te evaṃ vadanti – ‘‘ayaṃ te, āvuso, cīvarapaṭivīso’’ti. So taṃ cīvaraṃ ādāya taṃ āvāsaṃ gacchati. Tassa taṃ āvāsaṃ gatassa evaṃ hoti – ‘‘idhevimaṃ cīvaraṃ kāressaṃ, na paccessa’’nti. So taṃ cīvaraṃ kāreti. Tassa bhikkhuno niṭṭhānantiko kathinuddhāro.
ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘နေဝိမံ စီဝရံ ကာရေသ္သံ, န ပစ္စေသ္သ’’န္တိ။ တသ္သ ဘိက္ခုနော သန္နိဋ္ဌာနန္တိကော ကထိနုဒ္ဓာရော။
Bhikkhu atthatakathino disaṃgamiko pakkamati…pe… ‘‘nevimaṃ cīvaraṃ kāressaṃ, na paccessa’’nti. Tassa bhikkhuno sanniṭṭhānantiko kathinuddhāro.
ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘ဣဓေဝိမံ စီဝရံ ကာရေသ္သံ, န ပစ္စေသ္သ’’န္တိ။ သော တံ စီဝရံ ကာရေတိ။ တသ္သ တံ စီဝရံ ကယိရမာနံ နသ္သတိ။ တသ္သ ဘိက္ခုနော နာသနန္တိကော ကထိနုဒ္ဓာရော။
Bhikkhu atthatakathino disaṃgamiko pakkamati…pe… ‘‘idhevimaṃ cīvaraṃ kāressaṃ, na paccessa’’nti. So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro.
အပဝိလာယနနဝကံ နိဋ္ဌိတံ။
Apavilāyananavakaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အာဒာယသတ္တကကထာ • Ādāyasattakakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အာဒာယသတ္တကာဒိကထာဝဏ္ဏနာ • Ādāyasattakādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အာဒာယသတ္တကကထာဝဏ္ဏနာ • Ādāyasattakakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အာဒာယသတ္တကကထာဝဏ္ဏနာ • Ādāyasattakakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၈၈. အာဒာယသတ္တကကထာ • 188. Ādāyasattakakathā
