| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
११. आपायिकसुत्तं
11. Āpāyikasuttaṃ
४८. वुत्तञ्हेतं भगवता, वुत्तमरहताति मे सुतं –
48. Vuttañhetaṃ bhagavatā, vuttamarahatāti me sutaṃ –
‘‘द्वेमे, भिक्खवे, आपायिका नेरयिका इदमप्पहाय। कतमे द्वे? यो च अब्रह्मचारी ब्रह्मचारिपटिञ्ञो, यो च परिपुण्णं परिसुद्धं ब्रह्मचरियं चरन्तं अमूलकेन अब्रह्मचरियेन अनुद्धंसेति। इमे खो, भिक्खवे, द्वे आपायिका नेरयिका इदमप्पहाया’’ति। एतमत्थं भगवा अवोच। तत्थेतं इति वुच्चति –
‘‘Dveme, bhikkhave, āpāyikā nerayikā idamappahāya. Katame dve? Yo ca abrahmacārī brahmacāripaṭiñño, yo ca paripuṇṇaṃ parisuddhaṃ brahmacariyaṃ carantaṃ amūlakena abrahmacariyena anuddhaṃseti. Ime kho, bhikkhave, dve āpāyikā nerayikā idamappahāyā’’ti. Etamatthaṃ bhagavā avoca. Tatthetaṃ iti vuccati –
‘‘अभूतवादी निरयं उपेति, यो वापि कत्वा न करोमि चाह।
‘‘Abhūtavādī nirayaṃ upeti, yo vāpi katvā na karomi cāha;
उभोपि ते पेच्च समा भवन्ति, निहीनकम्मा मनुजा परत्थ॥
Ubhopi te pecca samā bhavanti, nihīnakammā manujā parattha.
‘‘कासावकण्ठा बहवो, पापधम्मा असञ्ञता।
‘‘Kāsāvakaṇṭhā bahavo, pāpadhammā asaññatā;
पापा पापेहि कम्मेहि, निरयं ते उपपज्जरे॥
Pāpā pāpehi kammehi, nirayaṃ te upapajjare.
‘‘सेय्यो अयोगुळो भुत्तो, तत्तो अग्गिसिखूपमो।
‘‘Seyyo ayoguḷo bhutto, tatto aggisikhūpamo;
यञ्चे भुञ्जेय्य दुस्सीलो, रट्ठपिण्डमसञ्ञतो’’ति॥
Yañce bhuñjeyya dussīlo, raṭṭhapiṇḍamasaññato’’ti.
अयम्पि अत्थो वुत्तो भगवता, इति मे सुतन्ति। एकादसमं।
Ayampi attho vutto bhagavatā, iti me sutanti. Ekādasamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ११. आपायिकसुत्तवण्णना • 11. Āpāyikasuttavaṇṇanā
