| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
(১২) ২. আপাযিকৰগ্গো
(12) 2. Āpāyikavaggo
১. আপাযিকসুত্তৰণ্ণনা
1. Āpāyikasuttavaṇṇanā
১১৪. দুতিযস্স পঠমে অপাযেসু নিব্বত্তনসীলতায অপাযূপগা আপাযিকাতি আহ ‘‘অপাযং গচ্ছিস্সন্তীতি আপাযিকা’’তি। অঞ্ঞে ব্রহ্মচারিনো সুনিৰত্থে সুপারুতে সুম্ভকপত্তধরে গামনিগমরাজধানীসু পিণ্ডায চরিত্ৰা জীৰিকং কপ্পেন্তে দিস্ৰা সযম্পি তাদিসেন আকারেন তথাপটিপজ্জনতো ‘‘অহং ব্রহ্মচারী’’তি পটিঞ্ঞং দেন্তো ৰিয হোতীতি আহ ‘‘ব্রহ্মচারিপটিঞ্ঞোতি ব্রহ্মচারিপটিরূপকো’’তি। ‘‘অহম্পি ভিক্খূ’’তি ৰত্ৰা উপোসথঙ্গাদীনি পৰিসন্তো পন ব্রহ্মচারিপটিঞ্ঞো হোতিযেৰ, তথা সঙ্ঘিকং লাভং গণ্হন্তো। তেনাহ ‘‘তেসং ৰা…পে॰… এৰংপটিঞ্ঞো’’তি। অক্কোসতীতি ‘‘অস্সমণোসি, সমণপটিঞ্ঞোসী’’তিআদিনা অক্কোসতি। পরিভাসতীতি ‘‘সো ত্ৰং ‘হোতু, মুণ্ডকসমণো অহ’ন্তি মঞ্ঞসি, ইদানি তে অস্সমণভাৰং আরোপেস্সামী’’তিআদিনা ৰদন্তো পরিভাসতি।
114. Dutiyassa paṭhame apāyesu nibbattanasīlatāya apāyūpagā āpāyikāti āha ‘‘apāyaṃ gacchissantīti āpāyikā’’ti. Aññe brahmacārino sunivatthe supārute sumbhakapattadhare gāmanigamarājadhānīsu piṇḍāya caritvā jīvikaṃ kappente disvā sayampi tādisena ākārena tathāpaṭipajjanato ‘‘ahaṃ brahmacārī’’ti paṭiññaṃ dento viya hotīti āha ‘‘brahmacāripaṭiññoti brahmacāripaṭirūpako’’ti. ‘‘Ahampi bhikkhū’’ti vatvā uposathaṅgādīni pavisanto pana brahmacāripaṭiñño hotiyeva, tathā saṅghikaṃ lābhaṃ gaṇhanto. Tenāha ‘‘tesaṃ vā…pe… evaṃpaṭiñño’’ti. Akkosatīti ‘‘assamaṇosi, samaṇapaṭiññosī’’tiādinā akkosati. Paribhāsatīti ‘‘so tvaṃ ‘hotu, muṇḍakasamaṇo aha’nti maññasi, idāni te assamaṇabhāvaṃ āropessāmī’’tiādinā vadanto paribhāsati.
কিলেসকামোপি অস্সাদিযমানো ৰত্থুকামন্তোগধোযেৰ, কিলেসকামৰসেন চ তেসং অস্সাদনং সিযাতি আহ ‘‘কিলেসকামেন ৰত্থুকামে সেৰন্তস্সা’’তি। কিলেসকামেনাতি করণত্থে করণৰচনং। নত্থি দোসোতি অস্সাদেত্ৰা ৰিসযপরিভোগে নত্থি আদীনৰো, তপ্পচ্চযা ন কোচি অন্তরাযোতি অধিপ্পাযো। পাতব্বতং আপজ্জতীতি পরিভুঞ্জনকতং উপগচ্ছতি। পরিভোগত্থো হি অযং পা-সদ্দো, কত্তুসাধনো চ তব্ব-সদ্দো, যথারুচি পরিভুঞ্জতীতি অত্থো। পিৰিতব্বতং পরিভুঞ্জিতব্বতন্তি এত্থাপি কত্তুৰসেনেৰ অত্থো ৰেদিতব্বো।
Kilesakāmopi assādiyamāno vatthukāmantogadhoyeva, kilesakāmavasena ca tesaṃ assādanaṃ siyāti āha ‘‘kilesakāmena vatthukāme sevantassā’’ti. Kilesakāmenāti karaṇatthe karaṇavacanaṃ. Natthi dosoti assādetvā visayaparibhoge natthi ādīnavo, tappaccayā na koci antarāyoti adhippāyo. Pātabbataṃ āpajjatīti paribhuñjanakataṃ upagacchati. Paribhogattho hi ayaṃ pā-saddo, kattusādhano ca tabba-saddo, yathāruci paribhuñjatīti attho. Pivitabbataṃ paribhuñjitabbatanti etthāpi kattuvaseneva attho veditabbo.
আপাযিকসুত্তৰণ্ণনা নিট্ঠিতা।
Āpāyikasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. আপাযিকসুত্তং • 1. Āpāyikasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. আপাযিকসুত্তৰণ্ণনা • 1. Āpāyikasuttavaṇṇanā
