| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
4. பவாரணாக்க²ந்த⁴கங்
4. Pavāraṇākkhandhakaṃ
அபா²ஸுகவிஹாரகதா²
Aphāsukavihārakathā
209. பவாரணாக்க²ந்த⁴கே – நேவ ஆலபெய்யாம ந ஸல்லபெய்யாமாதி எத்த² ஆலாபோ நாம பட²மவசனங்; ஸல்லாபோ பச்சி²மவசனங். ஹத்த²விலங்க⁴கேனாதி ஹத்து²க்கே²பகேன. பஸுஸங்வாஸந்தி பஸூனங் விய ஸங்வாஸங். பஸவோபி ஹி அத்தனோ உப்பன்னங் ஸுக²து³க்க²ங் அஞ்ஞமஞ்ஞஸ்ஸ ந ஆரோசெந்தி, படிஸந்தா²ரங் ந கரொந்தி, ததா² ஏதேபி ந அகங்ஸு; தஸ்மா நேஸங் ஸங்வாஸோ ‘‘பஸுஸங்வாஸோ’’தி வுச்சதி. ஏஸ நயோ ஸப்³ப³த்த². ந பி⁴க்க²வே மூக³ப்³ப³தங் தித்தி²யஸமாதா³னந்தி ‘‘இமங் தேமாஸங் ந கதே²தப்³ப³’’ந்தி ஏவரூபங் வதஸமாதா³னங் ந காதப்³ப³ங்; அத⁴ம்மகதிகா ஹேஸா. அஞ்ஞமஞ்ஞானுலோமதாதி அஞ்ஞமஞ்ஞங் வத்துங் அனுலோமபா⁴வோ. ‘‘வத³ந்து மங் ஆயஸ்மந்தோ’’தி ஹி வத³ந்தங் ஸக்கா ஹோதி கிஞ்சி வத்துங்; ந இதரங். ஆபத்திவுட்டா²னதா வினயபுரெக்கா²ரதாதி ஆபத்தீஹி வுட்டா²னபா⁴வோ வினயங் புரதோ கத்வா சரணபா⁴வோ. ‘‘வத³ந்து மங் ஆயஸ்மந்தோ’’தி ஹி ஏவங் வத³ந்தோ ஆபத்தீஹி வுட்ட²ஹிஸ்ஸதி, வினயஞ்ச புரக்க²த்வா விஹரிஸ்ஸதீதி வுச்சதி.
209. Pavāraṇākkhandhake – neva ālapeyyāma na sallapeyyāmāti ettha ālāpo nāma paṭhamavacanaṃ; sallāpo pacchimavacanaṃ. Hatthavilaṅghakenāti hatthukkhepakena. Pasusaṃvāsanti pasūnaṃ viya saṃvāsaṃ. Pasavopi hi attano uppannaṃ sukhadukkhaṃ aññamaññassa na ārocenti, paṭisanthāraṃ na karonti, tathā etepi na akaṃsu; tasmā nesaṃ saṃvāso ‘‘pasusaṃvāso’’ti vuccati. Esa nayo sabbattha. Na bhikkhave mūgabbataṃ titthiyasamādānanti ‘‘imaṃ temāsaṃ na kathetabba’’nti evarūpaṃ vatasamādānaṃ na kātabbaṃ; adhammakatikā hesā. Aññamaññānulomatāti aññamaññaṃ vattuṃ anulomabhāvo. ‘‘Vadantu maṃ āyasmanto’’ti hi vadantaṃ sakkā hoti kiñci vattuṃ; na itaraṃ. Āpattivuṭṭhānatā vinayapurekkhāratāti āpattīhi vuṭṭhānabhāvo vinayaṃ purato katvā caraṇabhāvo. ‘‘Vadantu maṃ āyasmanto’’ti hi evaṃ vadanto āpattīhi vuṭṭhahissati, vinayañca purakkhatvā viharissatīti vuccati.
210. ஸுணாது மே ப⁴ந்தே ஸங்கோ⁴ அஜ்ஜ பவாரணா, யதி³ ஸங்க⁴ஸ்ஸ பத்தகல்லங், ஸங்கோ⁴ பவாரெய்யாதி அயங் ஸப்³ப³ஸங்கா³ஹிகா நாம ஞத்தி; ஏவஞ்ஹி வுத்தே தேவாசிகங் த்³வேவாசிகங் ஏகவாசிகஞ்ச பவாரேதுங் வட்டதி. ஸமானவஸ்ஸிகங் ந வட்டதி. ‘‘தேவாசிகங் பவாரெய்யா’’தி வுத்தே பன தேவாசிகமேவ வட்டதி, அஞ்ஞங் ந வட்டதி. ‘‘த்³வேவாசிகங் பவாரெய்யா’’தி வுத்தே த்³வேவாசிகஞ்ச தேவாசிகஞ்ச வட்டதி, ஏகவாசிகஞ்ச ஸமானவஸ்ஸிகஞ்ச ந வட்டதி. ‘‘ஏகவாசிகங் பவாரெய்யா’’தி வுத்தே பன ஏகவாசிக-த்³வேவாசிக-தேவாசிகானி வட்டந்தி, ஸமானவஸ்ஸிகமேவ ந வட்டதி. ‘‘ஸமானவஸ்ஸிக’’ந்தி வுத்தே ஸப்³ப³ங் வட்டதி.
210.Suṇātu me bhante saṅgho ajja pavāraṇā, yadi saṅghassa pattakallaṃ, saṅgho pavāreyyāti ayaṃ sabbasaṅgāhikā nāma ñatti; evañhi vutte tevācikaṃ dvevācikaṃ ekavācikañca pavāretuṃ vaṭṭati. Samānavassikaṃ na vaṭṭati. ‘‘Tevācikaṃ pavāreyyā’’ti vutte pana tevācikameva vaṭṭati, aññaṃ na vaṭṭati. ‘‘Dvevācikaṃ pavāreyyā’’ti vutte dvevācikañca tevācikañca vaṭṭati, ekavācikañca samānavassikañca na vaṭṭati. ‘‘Ekavācikaṃ pavāreyyā’’ti vutte pana ekavācika-dvevācika-tevācikāni vaṭṭanti, samānavassikameva na vaṭṭati. ‘‘Samānavassika’’nti vutte sabbaṃ vaṭṭati.
211. அச்ச²ந்தீதி நிஸின்னாவ ஹொந்தி, ந உட்ட²ஹந்தி. தத³மந்தராதி தத³ந்தரா; தாவதகங் காலந்தி அத்தோ².
211.Acchantīti nisinnāva honti, na uṭṭhahanti. Tadamantarāti tadantarā; tāvatakaṃ kālanti attho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 120. அபா²ஸுகவிஹாரோ • 120. Aphāsukavihāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அபா²ஸுகவிஹாரகதா²வண்ணனா • Aphāsukavihārakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அபா²ஸுகவிஹாரகதா²வண்ணனா • Aphāsukavihārakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அபா²ஸுவிஹாரகதா²தி³வண்ணனா • Aphāsuvihārakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 120. அபா²ஸுகவிஹாரகதா² • 120. Aphāsukavihārakathā
