| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. பவாரணாக்க²ந்த⁴கங்
4. Pavāraṇākkhandhakaṃ
120. அபா²ஸுகவிஹாரகதா²
120. Aphāsukavihārakathā
209. பவாரணாக்க²ந்த⁴கே அல்லாபோதி எத்த² ஆத்யூபஸக்³க³ஸ்ஸ ஆதி³கம்மத்த²ங், லபதா⁴துயா ச கத²னத்த²ங் த³ஸ்ஸெந்தோ ஆஹ ‘‘பட²மவசன’’ந்தி. ஆதி³தோ, ஆதி³ம்ஹி வா லபனங் கத²னங், லபதி அனேனாதி வா அல்லாபோ ஸங்யோகே³ பரே ரஸ்ஸோ. ஸங் புன லபனங், லபதி வா அனேனாதி ஸல்லாபோ. ஹத்த²விலங்க⁴கேனாதி எத்த² விபுப்³போ³ லகி⁴தா⁴து உக்கி²பனத்தோ²தி ஆஹ ‘‘ஹத்து²க்கே²பகேனா’’தி. பஸுஸங்வாஸந்தி எத்த² பஸூதி ஸப்³ப³சதுப்பதா³. தே ஹி அஞ்ஞமஞ்ஞங் பஸந்தி பா³த⁴ந்தி, மனுஸ்ஸாதீ³ஹி வா பஸீயந்தி பா³தீ⁴யந்தீதி பஸவோதி வுச்சந்தி. பஸூனங் விய ஸங்வாஸந்தி பஸூனங் ஸங்வாஸோ விய ஸங்வாஸோதி பஸுஸங்வாஸோ, தங் பஸுஸங்வாஸங். தமத்த²ங் வித்தா²ரெந்தோ ஆஹ ‘‘பஸவோபி ஹீ’’திஆதி³. ததா²தி யதா² ந கரொந்தி, ததா²தி அத்தோ². ஏதேபீதி பி⁴க்க²வோபி. தஸ்மாதி யஸ்மா அகங்ஸு, தஸ்மா. நேஸந்தி பி⁴க்கூ²னங். ஸப்³ப³த்தா²தி ஸப்³பே³ஸு ஏளகஸங்வாஸஸபத்தஸங்வாஸேஸு. மூக³ப்³ப³தந்தி மூக³ஸ்ஸ வதங் விய வதந்தி மூக³ப்³ப³தங், ஸுஞ்ஞவசனவதந்தி அத்தோ². தித்தி²யஸமாதா³னந்தி தித்தி²யேஹி ஸமாதா³தப்³ப³ங். வதஸமாதா³னந்தி ஸமாதா³தப்³ப³ங் வதங். அஞ்ஞமஞ்ஞானுலோமதாதி எத்த² தாஸத்³த³ஸ்ஸ பா⁴வத்த²ங் த³ஸ்ஸெந்தோ ஆஹ ‘‘அனுலோமபா⁴வோ’’தி. இமினா ‘‘தே³வதா’’திஆதீ³ஸு (ஸங்॰ நி॰ அட்ட²॰ 1.1.1; கு²॰ பா॰ அட்ட²॰ 5.ஏவமிச்சாதி³பாட²வண்ணனா; ஸு॰ நி॰ அட்ட²॰ 2.அங்க³லஸுத்தவண்ணனா) விய தாபச்சயஸ்ஸ ஸ்வத்த²ங் ‘‘ஜனதா’’திஆதீ³ஸு (பே॰ வ॰ அட்ட²॰ 460) விய ஸமூஹத்த²ஞ்ச நிவத்தேதி. ‘‘அஞ்ஞமஞ்ஞங் வத்து’’ந்தி வசனஸ்ஸ யுத்திங் த³ஸ்ஸெந்தோ ஆஹ ‘‘வத³ந்து ம’’ந்திஆதி³. வத³ந்தங் பி⁴க்கு²ங் வத்துந்தி யோஜனா. ‘‘ஆபத்தீஹி வுட்டா²னபா⁴வோ’’தி இமினா ஆபத்திவுட்டா²னதாதி பத³ஸ்ஸ பஞ்சமீஸமாஸஞ்ச தாபச்சயஸ்ஸ பா⁴வத்த²ஞ்ச த³ஸ்ஸேதி. ‘‘வினய’’ந்திஆதி³னா புரதோ கத்வா கரணங் புரெக்கா²ரோ, தஸ்ஸ பா⁴வோ புரெக்கா²ரதா, வினயங் புரெக்கா²ரதா வினயபுரெக்கா²ரதாதி வசனத்த²ங் த³ஸ்ஸேதி. எத்த² புரஸத்³த³ஸ்ஸ ஏகாரத்தங் ஸத்³த³ஸத்தே²ஸு (மொக்³க³ல்லானப்³யாகரணே 5.134 ஸுத்தே) வத³ந்தி. தஸ்ஸ யுத்திங் த³ஸ்ஸெந்தோ ஆஹ ‘‘வத³ந்தும’’ந்திஆதி³ (மொக்³க³ல்லானப்³யாகரணே 5.134 ஸுத்தே).
209. Pavāraṇākkhandhake allāpoti ettha ātyūpasaggassa ādikammatthaṃ, lapadhātuyā ca kathanatthaṃ dassento āha ‘‘paṭhamavacana’’nti. Ādito, ādimhi vā lapanaṃ kathanaṃ, lapati anenāti vā allāpo saṃyoge pare rasso. Saṃ puna lapanaṃ, lapati vā anenāti sallāpo. Hatthavilaṅghakenāti ettha vipubbo laghidhātu ukkhipanatthoti āha ‘‘hatthukkhepakenā’’ti. Pasusaṃvāsanti ettha pasūti sabbacatuppadā. Te hi aññamaññaṃ pasanti bādhanti, manussādīhi vā pasīyanti bādhīyantīti pasavoti vuccanti. Pasūnaṃ viya saṃvāsanti pasūnaṃ saṃvāso viya saṃvāsoti pasusaṃvāso, taṃ pasusaṃvāsaṃ. Tamatthaṃ vitthārento āha ‘‘pasavopi hī’’tiādi. Tathāti yathā na karonti, tathāti attho. Etepīti bhikkhavopi. Tasmāti yasmā akaṃsu, tasmā. Nesanti bhikkhūnaṃ. Sabbatthāti sabbesu eḷakasaṃvāsasapattasaṃvāsesu. Mūgabbatanti mūgassa vataṃ viya vatanti mūgabbataṃ, suññavacanavatanti attho. Titthiyasamādānanti titthiyehi samādātabbaṃ. Vatasamādānanti samādātabbaṃ vataṃ. Aññamaññānulomatāti ettha tāsaddassa bhāvatthaṃ dassento āha ‘‘anulomabhāvo’’ti. Iminā ‘‘devatā’’tiādīsu (saṃ. ni. aṭṭha. 1.1.1; khu. pā. aṭṭha. 5.evamiccādipāṭhavaṇṇanā; su. ni. aṭṭha. 2.aṅgalasuttavaṇṇanā) viya tāpaccayassa svatthaṃ ‘‘janatā’’tiādīsu (pe. va. aṭṭha. 460) viya samūhatthañca nivatteti. ‘‘Aññamaññaṃ vattu’’nti vacanassa yuttiṃ dassento āha ‘‘vadantu ma’’ntiādi. Vadantaṃ bhikkhuṃ vattunti yojanā. ‘‘Āpattīhi vuṭṭhānabhāvo’’ti iminā āpattivuṭṭhānatāti padassa pañcamīsamāsañca tāpaccayassa bhāvatthañca dasseti. ‘‘Vinaya’’ntiādinā purato katvā karaṇaṃ purekkhāro, tassa bhāvo purekkhāratā, vinayaṃ purekkhāratā vinayapurekkhāratāti vacanatthaṃ dasseti. Ettha purasaddassa ekārattaṃ saddasatthesu (moggallānabyākaraṇe 5.134 sutte) vadanti. Tassa yuttiṃ dassento āha ‘‘vadantuma’’ntiādi (moggallānabyākaraṇe 5.134 sutte).
210. ஸப்³ப³ஸங்கா³ஹிகாதி ‘‘ஸங்கோ⁴ பவாரெய்யா’’தி ஸாமஞ்ஞதோ வுத்தத்தா ஸப்³பே³ஸங் தேவாசிகாதீ³னங் ஸங்கா³ஹகா. ஞத்தீதி ஞாபேதி ஸங்க⁴ங் ஏதாய வசனாயாதி ஞத்தி. ஸப்³ப³ஸங்கா³ஹிகபா⁴வங் வித்தா²ரெந்தோ ஆஹ ‘‘ஏவஞ்ஹி வுத்தே’’திஆதி³. தேவாசிகந்தி திஸ்ஸோ வாசா ஏதஸ்ஸாதி தேவாசிகங், தீஹி வாசாஹி கத்தப்³ப³ந்தி வா தேவாசிகங். ஏஸேவ நயோ ஸேஸேஸுபி. ஸமானவஸ்ஸிகந்தி ஸமானங் வஸ்ஸங் ஏதேஸந்தி ஸமானவஸ்ஸா, தேஹி கத்தப்³ப³ந்தி ஸமானவஸ்ஸிகங். அஞ்ஞந்தி த்³வேவாசிகஏகவாசிகங்.
210.Sabbasaṅgāhikāti ‘‘saṅgho pavāreyyā’’ti sāmaññato vuttattā sabbesaṃ tevācikādīnaṃ saṅgāhakā. Ñattīti ñāpeti saṅghaṃ etāya vacanāyāti ñatti. Sabbasaṅgāhikabhāvaṃ vitthārento āha ‘‘evañhi vutte’’tiādi. Tevācikanti tisso vācā etassāti tevācikaṃ, tīhi vācāhi kattabbanti vā tevācikaṃ. Eseva nayo sesesupi. Samānavassikanti samānaṃ vassaṃ etesanti samānavassā, tehi kattabbanti samānavassikaṃ. Aññanti dvevācikaekavācikaṃ.
211. அச்ச²ந்தீதி எத்த² ஆஸதா⁴துயா உபவேஸனத்த²ங் த³ஸ்ஸெந்தோ ஆஹ ‘‘நிஸின்னாவ ஹொந்தீ’’தி. ‘‘ந உட்ட²ஹந்தீ’’தி இமினா ஏவப²லங் த³ஸ்ஸேதி. தத³மந்தராதி எத்த² ‘‘தத³ந்தரா’’தி வத்தப்³பே³ வாசாஸிலிட்ட²வஸேன மகாராக³மங் கத்வா வுத்தந்தி ஆஹ ‘‘தத³ந்தரா’’தி. தஸ்ஸ அத்தனோ பவாரிதகாலஸ்ஸ அந்தரா. ‘‘யாவ பவாரெந்தீ’’தி பத³ஸ்ஸ நியமத்த²ங் த³ஸ்ஸேதுங் வுத்தங் ‘‘தாவதகங் கால’’ந்தி. யாவாதி நிபாதஸ்ஸ பயோக³த்தா ‘‘தத³மந்தரா’’தி எத்த² அபி⁴விதி⁴அவத்⁴யத்தே² பஞ்சமீவிப⁴த்தி ஹோதீதி த³ட்ட²ப்³ப³ங்.
211.Acchantīti ettha āsadhātuyā upavesanatthaṃ dassento āha ‘‘nisinnāva hontī’’ti. ‘‘Na uṭṭhahantī’’ti iminā evaphalaṃ dasseti. Tadamantarāti ettha ‘‘tadantarā’’ti vattabbe vācāsiliṭṭhavasena makārāgamaṃ katvā vuttanti āha ‘‘tadantarā’’ti. Tassa attano pavāritakālassa antarā. ‘‘Yāva pavārentī’’ti padassa niyamatthaṃ dassetuṃ vuttaṃ ‘‘tāvatakaṃ kāla’’nti. Yāvāti nipātassa payogattā ‘‘tadamantarā’’ti ettha abhividhiavadhyatthe pañcamīvibhatti hotīti daṭṭhabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 120. அபா²ஸுகவிஹாரோ • 120. Aphāsukavihāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அபா²ஸுகவிஹாரகதா² • Aphāsukavihārakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அபா²ஸுகவிஹாரகதா²வண்ணனா • Aphāsukavihārakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அபா²ஸுகவிஹாரகதா²வண்ணனா • Aphāsukavihārakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அபா²ஸுவிஹாரகதா²தி³வண்ணனா • Aphāsuvihārakathādivaṇṇanā
