| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
৪. পৰারণাক্খন্ধকং
4. Pavāraṇākkhandhakaṃ
অফাসুকৰিহারকথা
Aphāsukavihārakathā
২০৯. পৰারণাক্খন্ধকে – নেৰ আলপেয্যাম ন সল্লপেয্যামাতি এত্থ আলাপো নাম পঠমৰচনং; সল্লাপো পচ্ছিমৰচনং। হত্থৰিলঙ্ঘকেনাতি হত্থুক্খেপকেন। পসুসংৰাসন্তি পসূনং ৰিয সংৰাসং। পসৰোপি হি অত্তনো উপ্পন্নং সুখদুক্খং অঞ্ঞমঞ্ঞস্স ন আরোচেন্তি, পটিসন্থারং ন করোন্তি, তথা এতেপি ন অকংসু; তস্মা নেসং সংৰাসো ‘‘পসুসংৰাসো’’তি ৰুচ্চতি। এস নযো সব্বত্থ। ন ভিক্খৰে মূগব্বতং তিত্থিযসমাদানন্তি ‘‘ইমং তেমাসং ন কথেতব্ব’’ন্তি এৰরূপং ৰতসমাদানং ন কাতব্বং; অধম্মকতিকা হেসা। অঞ্ঞমঞ্ঞানুলোমতাতি অঞ্ঞমঞ্ঞং ৰত্তুং অনুলোমভাৰো। ‘‘ৰদন্তু মং আযস্মন্তো’’তি হি ৰদন্তং সক্কা হোতি কিঞ্চি ৰত্তুং; ন ইতরং। আপত্তিৰুট্ঠানতা ৰিনযপুরেক্খারতাতি আপত্তীহি ৰুট্ঠানভাৰো ৰিনযং পুরতো কত্ৰা চরণভাৰো। ‘‘ৰদন্তু মং আযস্মন্তো’’তি হি এৰং ৰদন্তো আপত্তীহি ৰুট্ঠহিস্সতি, ৰিনযঞ্চ পুরক্খত্ৰা ৰিহরিস্সতীতি ৰুচ্চতি।
209. Pavāraṇākkhandhake – neva ālapeyyāma na sallapeyyāmāti ettha ālāpo nāma paṭhamavacanaṃ; sallāpo pacchimavacanaṃ. Hatthavilaṅghakenāti hatthukkhepakena. Pasusaṃvāsanti pasūnaṃ viya saṃvāsaṃ. Pasavopi hi attano uppannaṃ sukhadukkhaṃ aññamaññassa na ārocenti, paṭisanthāraṃ na karonti, tathā etepi na akaṃsu; tasmā nesaṃ saṃvāso ‘‘pasusaṃvāso’’ti vuccati. Esa nayo sabbattha. Na bhikkhave mūgabbataṃ titthiyasamādānanti ‘‘imaṃ temāsaṃ na kathetabba’’nti evarūpaṃ vatasamādānaṃ na kātabbaṃ; adhammakatikā hesā. Aññamaññānulomatāti aññamaññaṃ vattuṃ anulomabhāvo. ‘‘Vadantu maṃ āyasmanto’’ti hi vadantaṃ sakkā hoti kiñci vattuṃ; na itaraṃ. Āpattivuṭṭhānatā vinayapurekkhāratāti āpattīhi vuṭṭhānabhāvo vinayaṃ purato katvā caraṇabhāvo. ‘‘Vadantu maṃ āyasmanto’’ti hi evaṃ vadanto āpattīhi vuṭṭhahissati, vinayañca purakkhatvā viharissatīti vuccati.
২১০. সুণাতু মে ভন্তে সঙ্ঘো অজ্জ পৰারণা, যদি সঙ্ঘস্স পত্তকল্লং, সঙ্ঘো পৰারেয্যাতি অযং সব্বসঙ্গাহিকা নাম ঞত্তি; এৰঞ্হি ৰুত্তে তেৰাচিকং দ্ৰেৰাচিকং একৰাচিকঞ্চ পৰারেতুং ৰট্টতি। সমানৰস্সিকং ন ৰট্টতি। ‘‘তেৰাচিকং পৰারেয্যা’’তি ৰুত্তে পন তেৰাচিকমেৰ ৰট্টতি, অঞ্ঞং ন ৰট্টতি। ‘‘দ্ৰেৰাচিকং পৰারেয্যা’’তি ৰুত্তে দ্ৰেৰাচিকঞ্চ তেৰাচিকঞ্চ ৰট্টতি, একৰাচিকঞ্চ সমানৰস্সিকঞ্চ ন ৰট্টতি। ‘‘একৰাচিকং পৰারেয্যা’’তি ৰুত্তে পন একৰাচিক-দ্ৰেৰাচিক-তেৰাচিকানি ৰট্টন্তি, সমানৰস্সিকমেৰ ন ৰট্টতি। ‘‘সমানৰস্সিক’’ন্তি ৰুত্তে সব্বং ৰট্টতি।
210.Suṇātu me bhante saṅgho ajja pavāraṇā, yadi saṅghassa pattakallaṃ, saṅgho pavāreyyāti ayaṃ sabbasaṅgāhikā nāma ñatti; evañhi vutte tevācikaṃ dvevācikaṃ ekavācikañca pavāretuṃ vaṭṭati. Samānavassikaṃ na vaṭṭati. ‘‘Tevācikaṃ pavāreyyā’’ti vutte pana tevācikameva vaṭṭati, aññaṃ na vaṭṭati. ‘‘Dvevācikaṃ pavāreyyā’’ti vutte dvevācikañca tevācikañca vaṭṭati, ekavācikañca samānavassikañca na vaṭṭati. ‘‘Ekavācikaṃ pavāreyyā’’ti vutte pana ekavācika-dvevācika-tevācikāni vaṭṭanti, samānavassikameva na vaṭṭati. ‘‘Samānavassika’’nti vutte sabbaṃ vaṭṭati.
২১১. অচ্ছন্তীতি নিসিন্নাৰ হোন্তি, ন উট্ঠহন্তি। তদমন্তরাতি তদন্তরা; তাৰতকং কালন্তি অত্থো।
211.Acchantīti nisinnāva honti, na uṭṭhahanti. Tadamantarāti tadantarā; tāvatakaṃ kālanti attho.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১২০. অফাসুকৰিহারো • 120. Aphāsukavihāro
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অফাসুকৰিহারকথাৰণ্ণনা • Aphāsukavihārakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অফাসুকৰিহারকথাৰণ্ণনা • Aphāsukavihārakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অফাসুৰিহারকথাদিৰণ্ণনা • Aphāsuvihārakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১২০. অফাসুকৰিহারকথা • 120. Aphāsukavihārakathā
