| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
೪. ಪವಾರಣಾಕ್ಖನ್ಧಕಂ
4. Pavāraṇākkhandhakaṃ
ಅಫಾಸುಕವಿಹಾರಕಥಾ
Aphāsukavihārakathā
೨೦೯. ಪವಾರಣಾಕ್ಖನ್ಧಕೇ – ನೇವ ಆಲಪೇಯ್ಯಾಮ ನ ಸಲ್ಲಪೇಯ್ಯಾಮಾತಿ ಏತ್ಥ ಆಲಾಪೋ ನಾಮ ಪಠಮವಚನಂ; ಸಲ್ಲಾಪೋ ಪಚ್ಛಿಮವಚನಂ। ಹತ್ಥವಿಲಙ್ಘಕೇನಾತಿ ಹತ್ಥುಕ್ಖೇಪಕೇನ। ಪಸುಸಂವಾಸನ್ತಿ ಪಸೂನಂ ವಿಯ ಸಂವಾಸಂ। ಪಸವೋಪಿ ಹಿ ಅತ್ತನೋ ಉಪ್ಪನ್ನಂ ಸುಖದುಕ್ಖಂ ಅಞ್ಞಮಞ್ಞಸ್ಸ ನ ಆರೋಚೇನ್ತಿ, ಪಟಿಸನ್ಥಾರಂ ನ ಕರೋನ್ತಿ, ತಥಾ ಏತೇಪಿ ನ ಅಕಂಸು; ತಸ್ಮಾ ನೇಸಂ ಸಂವಾಸೋ ‘‘ಪಸುಸಂವಾಸೋ’’ತಿ ವುಚ್ಚತಿ। ಏಸ ನಯೋ ಸಬ್ಬತ್ಥ। ನ ಭಿಕ್ಖವೇ ಮೂಗಬ್ಬತಂ ತಿತ್ಥಿಯಸಮಾದಾನನ್ತಿ ‘‘ಇಮಂ ತೇಮಾಸಂ ನ ಕಥೇತಬ್ಬ’’ನ್ತಿ ಏವರೂಪಂ ವತಸಮಾದಾನಂ ನ ಕಾತಬ್ಬಂ; ಅಧಮ್ಮಕತಿಕಾ ಹೇಸಾ। ಅಞ್ಞಮಞ್ಞಾನುಲೋಮತಾತಿ ಅಞ್ಞಮಞ್ಞಂ ವತ್ತುಂ ಅನುಲೋಮಭಾವೋ। ‘‘ವದನ್ತು ಮಂ ಆಯಸ್ಮನ್ತೋ’’ತಿ ಹಿ ವದನ್ತಂ ಸಕ್ಕಾ ಹೋತಿ ಕಿಞ್ಚಿ ವತ್ತುಂ; ನ ಇತರಂ। ಆಪತ್ತಿವುಟ್ಠಾನತಾ ವಿನಯಪುರೇಕ್ಖಾರತಾತಿ ಆಪತ್ತೀಹಿ ವುಟ್ಠಾನಭಾವೋ ವಿನಯಂ ಪುರತೋ ಕತ್ವಾ ಚರಣಭಾವೋ। ‘‘ವದನ್ತು ಮಂ ಆಯಸ್ಮನ್ತೋ’’ತಿ ಹಿ ಏವಂ ವದನ್ತೋ ಆಪತ್ತೀಹಿ ವುಟ್ಠಹಿಸ್ಸತಿ, ವಿನಯಞ್ಚ ಪುರಕ್ಖತ್ವಾ ವಿಹರಿಸ್ಸತೀತಿ ವುಚ್ಚತಿ।
209. Pavāraṇākkhandhake – neva ālapeyyāma na sallapeyyāmāti ettha ālāpo nāma paṭhamavacanaṃ; sallāpo pacchimavacanaṃ. Hatthavilaṅghakenāti hatthukkhepakena. Pasusaṃvāsanti pasūnaṃ viya saṃvāsaṃ. Pasavopi hi attano uppannaṃ sukhadukkhaṃ aññamaññassa na ārocenti, paṭisanthāraṃ na karonti, tathā etepi na akaṃsu; tasmā nesaṃ saṃvāso ‘‘pasusaṃvāso’’ti vuccati. Esa nayo sabbattha. Na bhikkhave mūgabbataṃ titthiyasamādānanti ‘‘imaṃ temāsaṃ na kathetabba’’nti evarūpaṃ vatasamādānaṃ na kātabbaṃ; adhammakatikā hesā. Aññamaññānulomatāti aññamaññaṃ vattuṃ anulomabhāvo. ‘‘Vadantu maṃ āyasmanto’’ti hi vadantaṃ sakkā hoti kiñci vattuṃ; na itaraṃ. Āpattivuṭṭhānatā vinayapurekkhāratāti āpattīhi vuṭṭhānabhāvo vinayaṃ purato katvā caraṇabhāvo. ‘‘Vadantu maṃ āyasmanto’’ti hi evaṃ vadanto āpattīhi vuṭṭhahissati, vinayañca purakkhatvā viharissatīti vuccati.
೨೧೦. ಸುಣಾತು ಮೇ ಭನ್ತೇ ಸಙ್ಘೋ ಅಜ್ಜ ಪವಾರಣಾ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಪವಾರೇಯ್ಯಾತಿ ಅಯಂ ಸಬ್ಬಸಙ್ಗಾಹಿಕಾ ನಾಮ ಞತ್ತಿ; ಏವಞ್ಹಿ ವುತ್ತೇ ತೇವಾಚಿಕಂ ದ್ವೇವಾಚಿಕಂ ಏಕವಾಚಿಕಞ್ಚ ಪವಾರೇತುಂ ವಟ್ಟತಿ। ಸಮಾನವಸ್ಸಿಕಂ ನ ವಟ್ಟತಿ। ‘‘ತೇವಾಚಿಕಂ ಪವಾರೇಯ್ಯಾ’’ತಿ ವುತ್ತೇ ಪನ ತೇವಾಚಿಕಮೇವ ವಟ್ಟತಿ, ಅಞ್ಞಂ ನ ವಟ್ಟತಿ। ‘‘ದ್ವೇವಾಚಿಕಂ ಪವಾರೇಯ್ಯಾ’’ತಿ ವುತ್ತೇ ದ್ವೇವಾಚಿಕಞ್ಚ ತೇವಾಚಿಕಞ್ಚ ವಟ್ಟತಿ, ಏಕವಾಚಿಕಞ್ಚ ಸಮಾನವಸ್ಸಿಕಞ್ಚ ನ ವಟ್ಟತಿ। ‘‘ಏಕವಾಚಿಕಂ ಪವಾರೇಯ್ಯಾ’’ತಿ ವುತ್ತೇ ಪನ ಏಕವಾಚಿಕ-ದ್ವೇವಾಚಿಕ-ತೇವಾಚಿಕಾನಿ ವಟ್ಟನ್ತಿ, ಸಮಾನವಸ್ಸಿಕಮೇವ ನ ವಟ್ಟತಿ। ‘‘ಸಮಾನವಸ್ಸಿಕ’’ನ್ತಿ ವುತ್ತೇ ಸಬ್ಬಂ ವಟ್ಟತಿ।
210.Suṇātu me bhante saṅgho ajja pavāraṇā, yadi saṅghassa pattakallaṃ, saṅgho pavāreyyāti ayaṃ sabbasaṅgāhikā nāma ñatti; evañhi vutte tevācikaṃ dvevācikaṃ ekavācikañca pavāretuṃ vaṭṭati. Samānavassikaṃ na vaṭṭati. ‘‘Tevācikaṃ pavāreyyā’’ti vutte pana tevācikameva vaṭṭati, aññaṃ na vaṭṭati. ‘‘Dvevācikaṃ pavāreyyā’’ti vutte dvevācikañca tevācikañca vaṭṭati, ekavācikañca samānavassikañca na vaṭṭati. ‘‘Ekavācikaṃ pavāreyyā’’ti vutte pana ekavācika-dvevācika-tevācikāni vaṭṭanti, samānavassikameva na vaṭṭati. ‘‘Samānavassika’’nti vutte sabbaṃ vaṭṭati.
೨೧೧. ಅಚ್ಛನ್ತೀತಿ ನಿಸಿನ್ನಾವ ಹೋನ್ತಿ, ನ ಉಟ್ಠಹನ್ತಿ। ತದಮನ್ತರಾತಿ ತದನ್ತರಾ; ತಾವತಕಂ ಕಾಲನ್ತಿ ಅತ್ಥೋ।
211.Acchantīti nisinnāva honti, na uṭṭhahanti. Tadamantarāti tadantarā; tāvatakaṃ kālanti attho.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧೨೦. ಅಫಾಸುಕವಿಹಾರೋ • 120. Aphāsukavihāro
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಫಾಸುಕವಿಹಾರಕಥಾವಣ್ಣನಾ • Aphāsukavihārakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅಫಾಸುಕವಿಹಾರಕಥಾವಣ್ಣನಾ • Aphāsukavihārakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಫಾಸುವಿಹಾರಕಥಾದಿವಣ್ಣನಾ • Aphāsuvihārakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೨೦. ಅಫಾಸುಕವಿಹಾರಕಥಾ • 120. Aphāsukavihārakathā
