| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၄. ပဝာရဏာက္ခန္ဓကော
4. Pavāraṇākkhandhako
၁၂၀. အဖာသုကဝိဟာရော
120. Aphāsukavihāro
၂၀၉. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ကောသလေသု ဇနပဒေ အညတရသ္မိံ အာဝာသေ ဝသ္သံ ဥပဂစ္ဆိံသု။ အထ ခော တေသံ ဘိက္ခူနံ ဧတဒဟောသိ – ‘‘ကေန နု ခော မယံ ဥပာယေန သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသေယ္ယာမ, န စ ပိဏ္ဍကေန ကိလမေယ္ယာမာ’’တိ။ အထ ခော တေသံ ဘိက္ခူနံ ဧတဒဟောသိ – ‘‘သစေ ခော မယံ အညမညံ နေဝ အာလပေယ္ယာမ န သလ္လပေယ္ယာမ – ယော ပဌမံ ဂာမတော ပိဏ္ဍာယ ပဋိက္ကမေယ္ယ သော အာသနံ ပညပေယ္ယ, ပာဒောဒကံ ပာဒပီဌံ ပာဒကထလိကံ ဥပနိက္ခိပေယ္ယ, အဝက္ကာရပာတိံ ဓောဝိတ္ဝာ ဥပဋ္ဌာပေယ္ယ, ပာနီယံ ပရိဘောဇနီယံ ဥပဋ္ဌာပေယ္ယ; ယော ပစ္ဆာ ဂာမတော ပိဏ္ဍာယ ပဋိက္ကမေယ္ယ, သစသ္သ ဘုတ္တာဝသေသော, သစေ အာကင္ခေယ္ယ ဘုဉ္ဇေယ္ယ, နော စေ အာကင္ခေယ္ယ အပ္ပဟရိတေ ဝာ ဆဍ္ဍေယ္ယ, အပ္ပာဏကေ ဝာ ဥဒကေ ဩပိလာပေယ္ယ; သော အာသနံ ဥဒ္ဓရေယ္ယ, ပာဒောဒကံ ပာဒပီဌံ ပာဒကထလိကံ ပဋိသာမေယ္ယ, အဝက္ကာရပာတိံ ဓောဝိတ္ဝာ ပဋိသာမေယ္ယ, ပာနီယံ ပရိဘောဇနီယံ ပဋိသာမေယ္ယ, ဘတ္တဂ္ဂံ သမ္မဇ္ဇေယ္ယ; ယော ပသ္သေယ္ယ ပာနီယဃဋံ ဝာ ပရိဘောဇနီယဃဋံ ဝာ ဝစ္စဃဋံ ဝာ ရိတ္တံ တုစ္ဆံ သော ဥပဋ္ဌာပေယ္ယ; သစသ္သ ဟောတိ အဝိသယ္ဟံ, ဟတ္ထဝိကာရေန ဒုတိယံ အာမန္တေတ္ဝာ ဟတ္ထဝိလင္ဃကေန ဥပဋ္ဌာပေယ္ယ; န တ္ဝေဝ တပ္ပစ္စယာ ဝာစံ ဘိန္ဒေယ္ယ – ဧဝံ ခော မယံ သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသေယ္ယာမ, န စ ပိဏ္ဍကေန ကိလမေယ္ယာမာ’’တိ။ အထ ခော တေ ဘိက္ခူ အညမညံ နေဝ အာလပိံသု, န သလ္လပိံသု။ ယော ပဌမံ ဂာမတော ပိဏ္ဍာယ ပဋိက္ကမတိ, သော အာသနံ ပညပေတိ, ပာဒောဒကံ ပာဒပီဌံ ပာဒကထလိကံ ဥပနိက္ခိပတိ, အဝက္ကာရပာတိံ ဓောဝိတ္ဝာ ဥပဋ္ဌာပေတိ, ပာနီယံ ပရိဘောဇနီယံ ဥပဋ္ဌာပေတိ ။ ယော ပစ္ဆာ ဂာမတော ပိဏ္ဍာယ ပဋိက္ကမတိ, သစေ ဟောတိ ဘုတ္တာဝသေသော, သစေ အာကင္ခတိ ဘုဉ္ဇတိ, နော စေ အာကင္ခတိ အပ္ပဟရိတေ ဝာ ဆဍ္ဍေတိ, အပ္ပာဏကေ ဝာ ဥဒကေ ဩပိလာပေတိ; သော အာသနံ ဥဒ္ဓရတိ, ပာဒောဒကံ ပာဒပီဌံ ပာဒကထလိကံ ပဋိသာမေတိ, အဝက္ကာရပာတိံ ဓောဝိတ္ဝာ ပဋိသာမေတိ, ပာနီယံ ပရိဘောဇနီယံ ပဋိသာမေတိ, ဘတ္တဂ္ဂံ သမ္မဇ္ဇတိ။ ယော ပသ္သတိ ပာနီယဃဋံ ဝာ ပရိဘောဇနီယဃဋံ ဝာ ဝစ္စဃဋံ ဝာ ရိတ္တံ တုစ္ဆံ သော ဥပဋ္ဌာပေတိ။ သစသ္သ ဟောတိ အဝိသယ္ဟံ, ဟတ္ထဝိကာရေန ဒုတိယံ အာမန္တေတ္ဝာ ဟတ္ထဝိလင္ဃကေန ဥပဋ္ဌာပေတိ, န တ္ဝေဝ တပ္ပစ္စယာ ဝာစံ ဘိန္ဒတိ။
209. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā sandiṭṭhā sambhattā bhikkhū kosalesu janapade aññatarasmiṃ āvāse vassaṃ upagacchiṃsu. Atha kho tesaṃ bhikkhūnaṃ etadahosi – ‘‘kena nu kho mayaṃ upāyena samaggā sammodamānā avivadamānā phāsukaṃ vassaṃ vaseyyāma, na ca piṇḍakena kilameyyāmā’’ti. Atha kho tesaṃ bhikkhūnaṃ etadahosi – ‘‘sace kho mayaṃ aññamaññaṃ neva ālapeyyāma na sallapeyyāma – yo paṭhamaṃ gāmato piṇḍāya paṭikkameyya so āsanaṃ paññapeyya, pādodakaṃ pādapīṭhaṃ pādakathalikaṃ upanikkhipeyya, avakkārapātiṃ dhovitvā upaṭṭhāpeyya, pānīyaṃ paribhojanīyaṃ upaṭṭhāpeyya; yo pacchā gāmato piṇḍāya paṭikkameyya, sacassa bhuttāvaseso, sace ākaṅkheyya bhuñjeyya, no ce ākaṅkheyya appaharite vā chaḍḍeyya, appāṇake vā udake opilāpeyya; so āsanaṃ uddhareyya, pādodakaṃ pādapīṭhaṃ pādakathalikaṃ paṭisāmeyya, avakkārapātiṃ dhovitvā paṭisāmeyya, pānīyaṃ paribhojanīyaṃ paṭisāmeyya, bhattaggaṃ sammajjeyya; yo passeyya pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ so upaṭṭhāpeyya; sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpeyya; na tveva tappaccayā vācaṃ bhindeyya – evaṃ kho mayaṃ samaggā sammodamānā avivadamānā phāsukaṃ vassaṃ vaseyyāma, na ca piṇḍakena kilameyyāmā’’ti. Atha kho te bhikkhū aññamaññaṃ neva ālapiṃsu, na sallapiṃsu. Yo paṭhamaṃ gāmato piṇḍāya paṭikkamati, so āsanaṃ paññapeti, pādodakaṃ pādapīṭhaṃ pādakathalikaṃ upanikkhipati, avakkārapātiṃ dhovitvā upaṭṭhāpeti, pānīyaṃ paribhojanīyaṃ upaṭṭhāpeti . Yo pacchā gāmato piṇḍāya paṭikkamati, sace hoti bhuttāvaseso, sace ākaṅkhati bhuñjati, no ce ākaṅkhati appaharite vā chaḍḍeti, appāṇake vā udake opilāpeti; so āsanaṃ uddharati, pādodakaṃ pādapīṭhaṃ pādakathalikaṃ paṭisāmeti, avakkārapātiṃ dhovitvā paṭisāmeti, pānīyaṃ paribhojanīyaṃ paṭisāmeti, bhattaggaṃ sammajjati. Yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ so upaṭṭhāpeti. Sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpeti, na tveva tappaccayā vācaṃ bhindati.
အာစိဏ္ဏံ ခော ပနေတံ ဝသ္သံဝုဋ္ဌာနံ ဘိက္ခူနံ ဘဂဝန္တံ ဒသ္သနာယ ဥပသင္ကမိတုံ။ အထ ခော တေ ဘိက္ခူ ဝသ္သံဝုဋ္ဌာ တေမာသစ္စယေန သေနာသနံ သံသာမေတ္ဝာ ပတ္တစီဝရမာဒာယ ယေန သာဝတ္ထိ တေန ပက္ကမိံသု။ အနုပုဗ္ဗေန ယေန သာဝတ္ထိ ဇေတဝနံ အနာထပိဏ္ဍိကသ္သ အာရာမော ယေန ဘဂဝာ တေနုပသင္ကမိံသု, ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိံသု။ အာစိဏ္ဏံ ခော ပနေတံ ဗုဒ္ဓာနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ခော ဘဂဝာ တေ ဘိက္ခူ ဧတဒဝောစ – ‘‘ကစ္စိ, ဘိက္ခဝေ, ခမနီယံ, ကစ္စိ ယာပနီယံ, ကစ္စိ သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသိတ္ထ, န စ ပိဏ္ဍကေန ကိလမိတ္ထာ’’တိ? ‘‘ခမနီယံ ဘဂဝာ, ယာပနီယံ ဘဂဝာ။ သမဂ္ဂာ စ မယံ, ဘန္တေ, သမ္မောဒမာနာ အဝိဝဒမာနာ ဖာသုကံ ဝသ္သံ ဝသိမ္ဟာ, န စ ပိဏ္ဍကေန ကိလမိမ္ဟာ’’တိ။ ဇာနန္တာပိ တထာဂတာ ပုစ္ဆန္တိ, ဇာနန္တာပိ န ပုစ္ဆန္တိ။ ကာလံ ဝိဒိတ္ဝာ ပုစ္ဆန္တိ, ကာလံ ဝိဒိတ္ဝာ န ပုစ္ဆန္တိ။ အတ္ထသံဟိတံ တထာဂတာ ပုစ္ဆန္တိ, နော အနတ္ထသံဟိတံ။ အနတ္ထသံဟိတေ သေတုဃာတော တထာဂတာနံ။ ဒ္ဝီဟာကာရေဟိ ဗုဒ္ဓာ ဘဂဝန္တော ဘိက္ခူ ပဋိပုစ္ဆန္တိ – ဓမ္မံ ဝာ ဒေသေသ္သာမ, သာဝကာနံ ဝာ သိက္ခာပဒံ ပညပေသ္သာမာတိ။ အထ ခော ဘဂဝာ တေ ဘိက္ခူ ဧတဒဝောစ – ‘‘ယထာကထံ ပန တုမ္ဟေ, ဘိက္ခဝေ, သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသိတ္ထ, န စ ပိဏ္ဍကေန ကိလမိတ္ထာ’’တိ။
Āciṇṇaṃ kho panetaṃ vassaṃvuṭṭhānaṃ bhikkhūnaṃ bhagavantaṃ dassanāya upasaṅkamituṃ. Atha kho te bhikkhū vassaṃvuṭṭhā temāsaccayena senāsanaṃ saṃsāmetvā pattacīvaramādāya yena sāvatthi tena pakkamiṃsu. Anupubbena yena sāvatthi jetavanaṃ anāthapiṇḍikassa ārāmo yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā te bhikkhū etadavoca – ‘‘kacci, bhikkhave, khamanīyaṃ, kacci yāpanīyaṃ, kacci samaggā sammodamānā avivadamānā phāsukaṃ vassaṃ vasittha, na ca piṇḍakena kilamitthā’’ti? ‘‘Khamanīyaṃ bhagavā, yāpanīyaṃ bhagavā. Samaggā ca mayaṃ, bhante, sammodamānā avivadamānā phāsukaṃ vassaṃ vasimhā, na ca piṇḍakena kilamimhā’’ti. Jānantāpi tathāgatā pucchanti, jānantāpi na pucchanti. Kālaṃ viditvā pucchanti, kālaṃ viditvā na pucchanti. Atthasaṃhitaṃ tathāgatā pucchanti, no anatthasaṃhitaṃ. Anatthasaṃhite setughāto tathāgatānaṃ. Dvīhākārehi buddhā bhagavanto bhikkhū paṭipucchanti – dhammaṃ vā desessāma, sāvakānaṃ vā sikkhāpadaṃ paññapessāmāti. Atha kho bhagavā te bhikkhū etadavoca – ‘‘yathākathaṃ pana tumhe, bhikkhave, samaggā sammodamānā avivadamānā phāsukaṃ vassaṃ vasittha, na ca piṇḍakena kilamitthā’’ti.
ဣဓ မယံ, ဘန္တေ, သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ကောသလေသု ဇနပဒေ အညတရသ္မိံ အာဝာသေ ဝသ္သံ ဥပဂစ္ဆိမ္ဟာ။ တေသံ နော, ဘန္တေ, အမ္ဟာကံ ဧတဒဟောသိ – ‘‘ကေန နု ခော မယံ ဥပာယေန သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသေယ္ယာမ, န စ ပိဏ္ဍကေန ကိလမေယ္ယာမာ’’တိ။ တေသံ နော, ဘန္တေ, အမ္ဟာကံ ဧတဒဟောသိ – ‘‘သစေ ခော မယံ အညမညံ နေဝ အာလပေယ္ယာမ န သလ္လပေယ္ယာမ – ယော ပဌမံ ဂာမတော ပိဏ္ဍာယ ပဋိက္ကမေယ္ယ သော အာသနံ ပညပေယ္ယ, ပာဒောဒကံ ပာဒပီဌံ ပာဒကထလိကံ ဥပနိက္ခိပေယ္ယ, အဝက္ကာရပာတိံ ဓောဝိတ္ဝာ ဥပဋ္ဌာပေယ္ယ, ပာနီယံ ပရိဘောဇနီယံ ဥပဋ္ဌာပေယ္ယ; ယော ပစ္ဆာ ဂာမတော ပိဏ္ဍာယ ပဋိက္ကမေယ္ယ, သစသ္သ ဘုတ္တာဝသေသော , သစေ အာကင္ခေယ္ယ ဘုဉ္ဇေယ္ယ, နော စေ အာကင္ခေယ္ယ အပ္ပဟရိတေ ဝာ ဆဍ္ဍေယ္ယ, အပ္ပာဏကေ ဝာ ဥဒကေ ဩပိလာပေယ္ယ; သော အာသနံ ဥဒ္ဓရေယ္ယ, ပာဒောဒကံ ပာဒပီဌံ ပာဒကထလိကံ ပဋိသာမေယ္ယ , အဝက္ကာရပာတိံ ဓောဝိတ္ဝာ ပဋိသာမေယ္ယ, ပာနီယံ ပရိဘောဇနီယံ ပဋိသာမေယ္ယ, ဘတ္တဂ္ဂံ သမ္မဇ္ဇေယ္ယ; ယော ပသ္သေယ္ယ ပာနီယဃဋံ ဝာ ပရိဘောဇနီယဃဋံ ဝာ ဝစ္စဃဋံ ဝာ ရိတ္တံ တုစ္ဆံ သော ဥပဋ္ဌာပေယ္ယ; သစသ္သ ဟောတိ အဝိသယ္ဟံ, ဟတ္ထဝိကာရေန ဒုတိယံ အာမန္တေတ္ဝာ ဟတ္ထဝိလင္ဃကေန ဥပဋ္ဌာပေယ္ယ; န တ္ဝေဝ တပ္ပစ္စယာ ဝာစံ ဘိန္ဒေယ္ယ – ဧဝံ ခော မယံ သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသေယ္ယာမ, န စ ပိဏ္ဍကေန ကိလမေယ္ယာမာ’’တိ။ အထ ခော မယံ, ဘန္တေ, အညမညံ နေဝ အာလပိမ္ဟာ န သလ္လဝိမ္ဟာ။ ယော ပဌမံ ဂာမတော ပိဏ္ဍာယ ပဋိက္ကမတိ သော အာသနံ ပညပေတိ, ပာဒောဒကံ ပာဒပီဌံ ပာဒကထလိကံ ဥပနိက္ခိပတိ, အဝက္ကာရပာတိံ ဓောဝိတ္ဝာ ဥပဋ္ဌာပေတိ, ပာနီယံ ပရိဘောဇနီယံ ဥပဋ္ဌာပေတိ။ ယော ပစ္ဆာ ဂာမတော ပိဏ္ဍာယ ပဋိက္ကမတိ, သစေ ဟောတိ ဘုတ္တာဝသေသော, သစေ အာကင္ခတိ ဘုဉ္ဇတိ, နော စေ အာကင္ခတိ အပ္ပဟရိတေ ဝာ ဆဍ္ဍေတိ, အပ္ပာဏကေ ဝာ ဥဒကေ ဩပိလာပေတိ, သော အာသနံ ဥဒ္ဓရတိ, ပာဒောဒကံ ပာဒပီဌံ ပာဒကထလိကံ ပဋိသာမေတိ, အဝက္ကာရပာတိံ ဓောဝိတ္ဝာ ပဋိသာမေတိ, ပာနီယံ ပရိဘောဇနီယံ ပဋိသာမေတိ, ဘတ္တဂ္ဂံ သမ္မဇ္ဇတိ။ ယော ပသ္သတိ ပာနီယဃဋံ ဝာ ပရိဘောဇနီယဃဋံ ဝာ ဝစ္စဃဋံ ဝာ ရိတ္တံ တုစ္ဆံ သော ဥပဋ္ဌာပေတိ။ သစသ္သ ဟောတိ အဝိသယ္ဟံ, ဟတ္ထဝိကာရေန ဒုတိယံ အာမန္တေတ္ဝာ ဟတ္ထဝိလင္ဃကေန ဥပဋ္ဌာပေတိ, န တ္ဝေဝ တပ္ပစ္စယာ ဝာစံ ဘိန္ဒတိ။ ဧဝံ ခော မယံ, ဘန္တေ, သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသိမ္ဟာ, န စ ပိဏ္ဍကေန ကိလမိမ္ဟာတိ။
Idha mayaṃ, bhante, sambahulā sandiṭṭhā sambhattā bhikkhū kosalesu janapade aññatarasmiṃ āvāse vassaṃ upagacchimhā. Tesaṃ no, bhante, amhākaṃ etadahosi – ‘‘kena nu kho mayaṃ upāyena samaggā sammodamānā avivadamānā phāsukaṃ vassaṃ vaseyyāma, na ca piṇḍakena kilameyyāmā’’ti. Tesaṃ no, bhante, amhākaṃ etadahosi – ‘‘sace kho mayaṃ aññamaññaṃ neva ālapeyyāma na sallapeyyāma – yo paṭhamaṃ gāmato piṇḍāya paṭikkameyya so āsanaṃ paññapeyya, pādodakaṃ pādapīṭhaṃ pādakathalikaṃ upanikkhipeyya, avakkārapātiṃ dhovitvā upaṭṭhāpeyya, pānīyaṃ paribhojanīyaṃ upaṭṭhāpeyya; yo pacchā gāmato piṇḍāya paṭikkameyya, sacassa bhuttāvaseso , sace ākaṅkheyya bhuñjeyya, no ce ākaṅkheyya appaharite vā chaḍḍeyya, appāṇake vā udake opilāpeyya; so āsanaṃ uddhareyya, pādodakaṃ pādapīṭhaṃ pādakathalikaṃ paṭisāmeyya , avakkārapātiṃ dhovitvā paṭisāmeyya, pānīyaṃ paribhojanīyaṃ paṭisāmeyya, bhattaggaṃ sammajjeyya; yo passeyya pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ so upaṭṭhāpeyya; sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpeyya; na tveva tappaccayā vācaṃ bhindeyya – evaṃ kho mayaṃ samaggā sammodamānā avivadamānā phāsukaṃ vassaṃ vaseyyāma, na ca piṇḍakena kilameyyāmā’’ti. Atha kho mayaṃ, bhante, aññamaññaṃ neva ālapimhā na sallavimhā. Yo paṭhamaṃ gāmato piṇḍāya paṭikkamati so āsanaṃ paññapeti, pādodakaṃ pādapīṭhaṃ pādakathalikaṃ upanikkhipati, avakkārapātiṃ dhovitvā upaṭṭhāpeti, pānīyaṃ paribhojanīyaṃ upaṭṭhāpeti. Yo pacchā gāmato piṇḍāya paṭikkamati, sace hoti bhuttāvaseso, sace ākaṅkhati bhuñjati, no ce ākaṅkhati appaharite vā chaḍḍeti, appāṇake vā udake opilāpeti, so āsanaṃ uddharati, pādodakaṃ pādapīṭhaṃ pādakathalikaṃ paṭisāmeti, avakkārapātiṃ dhovitvā paṭisāmeti, pānīyaṃ paribhojanīyaṃ paṭisāmeti, bhattaggaṃ sammajjati. Yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ so upaṭṭhāpeti. Sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpeti, na tveva tappaccayā vācaṃ bhindati. Evaṃ kho mayaṃ, bhante, samaggā sammodamānā avivadamānā phāsukaṃ vassaṃ vasimhā, na ca piṇḍakena kilamimhāti.
အထ ခော ဘဂဝာ ဘိက္ခူ အာမန္တေသိ – ‘‘အဖာသုညေဝ 1 ကိရမေ 2, ဘိက္ခဝေ, မောဃပုရိသာ ဝုဋ္ဌာ 3 သမာနာ ဖာသုမ္ဟာ 4 ဝုဋ္ဌာတိ ပဋိဇာနန္တိ။ ပသုသံဝာသညေဝ ကိရမေ, ဘိက္ခဝေ, မောဃပုရိသာ ဝုဋ္ဌာ သမာနာ ဖာသုမ္ဟာ ဝုဋ္ဌာတိ ပဋိဇာနန္တိ။ ဧဠကသံဝာသညေဝ ကိရမေ, ဘိက္ခဝေ, မောဃပုရိသာ ဝုဋ္ဌာ သမာနာ ဖာသုမ္ဟာ ဝုဋ္ဌာတိ ပဋိဇာနန္တိ။ သပတ္တသံဝာသညေဝ ကိရမေ, ဘိက္ခဝေ, မောဃပုရိသာ ဝုဋ္ဌာ သမာနာ ဖာသုမ္ဟာ ဝုဋ္ဌာတိ ပဋိဇာနန္တိ။ ကထဉ္ဟိ နာမိမေ, ဘိက္ခဝေ, မောဃပုရိသာ မူဂဗ္ဗတံ တိတ္ထိယသမာဒာနံ သမာဒိယိသ္သ’’န္တိ။ နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ ဓမ္မိံ ကထံ ကတ္ဝာ ဘိက္ခူ အာမန္တေသိ – န, ဘိက္ခဝေ, မူဂဗ္ဗတံ တိတ္ထိယသမာဒာနံ သမာဒိယိတဗ္ဗံ။ ယော သမာဒိယေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, ဝသ္သံဝုဋ္ဌာနံ ဘိက္ခူနံ တီဟိ ဌာနေဟိ ပဝာရေတုံ – ဒိဋ္ဌေန ဝာ သုတေန ဝာ ပရိသင္ကာယ ဝာ။ သာ ဝော ဘဝိသ္သတိ အညမညာနုလောမတာ အာပတ္တိဝုဋ္ဌာနတာ ဝိနယပုရေက္ခာရတာ။ ဧဝဉ္စ ပန, ဘိက္ခဝေ, ပဝာရေတဗ္ဗံ။ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
Atha kho bhagavā bhikkhū āmantesi – ‘‘aphāsuññeva 5 kirame 6, bhikkhave, moghapurisā vuṭṭhā 7 samānā phāsumhā 8 vuṭṭhāti paṭijānanti. Pasusaṃvāsaññeva kirame, bhikkhave, moghapurisā vuṭṭhā samānā phāsumhā vuṭṭhāti paṭijānanti. Eḷakasaṃvāsaññeva kirame, bhikkhave, moghapurisā vuṭṭhā samānā phāsumhā vuṭṭhāti paṭijānanti. Sapattasaṃvāsaññeva kirame, bhikkhave, moghapurisā vuṭṭhā samānā phāsumhā vuṭṭhāti paṭijānanti. Kathañhi nāmime, bhikkhave, moghapurisā mūgabbataṃ titthiyasamādānaṃ samādiyissa’’nti. Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – na, bhikkhave, mūgabbataṃ titthiyasamādānaṃ samādiyitabbaṃ. Yo samādiyeyya, āpatti dukkaṭassa. Anujānāmi, bhikkhave, vassaṃvuṭṭhānaṃ bhikkhūnaṃ tīhi ṭhānehi pavāretuṃ – diṭṭhena vā sutena vā parisaṅkāya vā. Sā vo bhavissati aññamaññānulomatā āpattivuṭṭhānatā vinayapurekkhāratā. Evañca pana, bhikkhave, pavāretabbaṃ. Byattena bhikkhunā paṭibalena saṅgho ñāpetabbo –
၂၁၀. ‘‘သုဏာတု မေ, ဘန္တေ, သင္ဃော။ အဇ္ဇ ပဝာရဏာ။ ယဒိ သင္ဃသ္သ ပတ္တကလ္လံ, သင္ဃော ပဝာရေယ္ယာ’’တိ။
210. ‘‘Suṇātu me, bhante, saṅgho. Ajja pavāraṇā. Yadi saṅghassa pattakallaṃ, saṅgho pavāreyyā’’ti.
ထေရေန ဘိက္ခုနာ ဧကံသံ ဥတ္တရာသင္ဂံ ကရိတ္ဝာ ဥက္ကုဋိကံ နိသီဒိတ္ဝာ အဉ္ဇလိံ ပဂ္ဂဟေတ္ဝာ ဧဝမသ္သ ဝစနီယော – ‘‘သင္ဃံ, အာဝုသော, ပဝာရေမိ ဒိဋ္ဌေန ဝာ သုတေန ဝာ ပရိသင္ကာယ ဝာ။ ဝဒန္တု မံ အာယသ္မန္တော အနုကမ္ပံ ဥပာဒာယ။ ပသ္သန္တော ပဋိကရိသ္သာမိ။ ဒုတိယမ္ပိ, အာဝုသော, သင္ဃံ ပဝာရေမိ ဒိဋ္ဌေန ဝာ သုတေန ဝာ ပရိသင္ကာယ ဝာ။ ဝဒန္တု မံ အာယသ္မန္တော အနုကမ္ပံ ဥပာဒာယ။ ပသ္သန္တော ပဋိကရိသ္သာမိ။ တတိယမ္ပိ, အာဝုသော, သင္ဃံ ပဝာရေမိ ဒိဋ္ဌေန ဝာ သုတေန ဝာ ပရိသင္ကာယ ဝာ။ ဝဒန္တု မံ အာယသ္မန္တော အနုကမ္ပံ ဥပာဒာယ။ ပသ္သန္တော ပဋိကရိသ္သာမီ’’တိ။
Therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘saṅghaṃ, āvuso, pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmi. Dutiyampi, āvuso, saṅghaṃ pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmi. Tatiyampi, āvuso, saṅghaṃ pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmī’’ti.
နဝကေန ဘိက္ခုနာ ဧကံသံ ဥတ္တရာသင္ဂံ ကရိတ္ဝာ ဥက္ကုဋိကံ နိသီဒိတ္ဝာ အဉ္ဇလိံ ပဂ္ဂဟေတ္ဝာ ဧဝမသ္သ ဝစနီယော – ‘‘သင္ဃံ, ဘန္တေ, ပဝာရေမိ ဒိဋ္ဌေန ဝာ သုတေန ဝာ ပရိသင္ကာယ ဝာ။ ဝဒန္တု မံ အာယသ္မန္တော အနုကမ္ပံ ဥပာဒာယ။ ပသ္သန္တော ပဋိကရိသ္သာမိ။ ဒုတိယမ္ပိ, ဘန္တေ, သင္ဃံ။ပေ.။ တတိယမ္ပိ, ဘန္တေ, သင္ဃံ ပဝာရေမိ ဒိဋ္ဌေန ဝာ သုတေန ဝာ ပရိသင္ကာယ ဝာ။ ဝဒန္တု မံ အာယသ္မန္တော အနုကမ္ပံ ဥပာဒာယ။ ပသ္သန္တော ပဋိကရိသ္သာမီ’’တိ။
Navakena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘saṅghaṃ, bhante, pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmi. Dutiyampi, bhante, saṅghaṃ…pe… tatiyampi, bhante, saṅghaṃ pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmī’’ti.
၂၁၁. တေန ခော ပန သမယေန ဆဗ္ဗဂ္ဂိယာ ဘိက္ခူ ထေရေသု ဘိက္ခူသု ဥက္ကုဋိကံ နိသိန္နေသု ပဝာရယမာနေသု အာသနေသု အစ္ဆန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ ထေရေသု ဘိက္ခူသု ဥက္ကုဋိကံ နိသိန္နေသု ပဝာရယမာနေသု အာသနေသု အစ္ဆိသ္သန္တီ’’တိ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခူ ထေရေသု ဘိက္ခူသု ဥက္ကုဋိကံ နိသိန္နေသု ပဝာရယမာနေသု အာသနေသု အစ္ဆန္တီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ‘‘ကထဉ္ဟိ နာမ တေ, ဘိက္ခဝေ, မောဃပုရိသာ ထေရေသု ဘိက္ခူသု ဥက္ကုဋိကံ နိသိန္နေသု ပဝာရယမာနေသု အာသနေသု အစ္ဆိသ္သ’’န္တိ။ နေတံ, ဘိက္ခဝေ, အပ္ပသန္နာနံ ဝာ ပသာဒာယ, ပသန္နာနံ ဝာ ဘိယ္ယောဘာဝာယ။ပေ.။ ဝိဂရဟိတ္ဝာ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘န, ဘိက္ခဝေ, ထေရေသု ဘိက္ခူသု ဥက္ကုဋိကံ နိသိန္နေသု ပဝာရယမာနေသု အာသနေသု အစ္ဆိတဗ္ဗံ။ ယော အစ္ဆေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, သဗ္ဗေဟေဝ ဥက္ကုဋိကံ နိသိန္နေဟိ ပဝာရေတု’’န္တိ။
211. Tena kho pana samayena chabbaggiyā bhikkhū theresu bhikkhūsu ukkuṭikaṃ nisinnesu pavārayamānesu āsanesu acchanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū theresu bhikkhūsu ukkuṭikaṃ nisinnesu pavārayamānesu āsanesu acchissantī’’ti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū theresu bhikkhūsu ukkuṭikaṃ nisinnesu pavārayamānesu āsanesu acchantī’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā theresu bhikkhūsu ukkuṭikaṃ nisinnesu pavārayamānesu āsanesu acchissa’’nti. Netaṃ, bhikkhave, appasannānaṃ vā pasādāya, pasannānaṃ vā bhiyyobhāvāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, theresu bhikkhūsu ukkuṭikaṃ nisinnesu pavārayamānesu āsanesu acchitabbaṃ. Yo accheyya, āpatti dukkaṭassa. Anujānāmi, bhikkhave, sabbeheva ukkuṭikaṃ nisinnehi pavāretu’’nti.
တေန ခော ပန သမယေန အညတရော ထေရော ဇရာဒုဗ္ဗလော ယာဝ သဗ္ဗေ ပဝာရေန္တီတိ 9 ဥက္ကုဋိကံ နိသိန္နော အာဂမယမာနော မုစ္ဆိတော ပပတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, တဒမန္တရာ ဥက္ကုဋိကံ နိသီဒိတုံ ယာဝ ပဝာရေတိ, ပဝာရေတ္ဝာ အာသနေ နိသီဒိတုန္တိ။
Tena kho pana samayena aññataro thero jarādubbalo yāva sabbe pavārentīti 10 ukkuṭikaṃ nisinno āgamayamāno mucchito papati. Bhagavato etamatthaṃ ārocesuṃ. Anujānāmi, bhikkhave, tadamantarā ukkuṭikaṃ nisīdituṃ yāva pavāreti, pavāretvā āsane nisīditunti.
အဖာသုကဝိဟာရော နိဋ္ဌိတော။
Aphāsukavihāro niṭṭhito.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အဖာသုကဝိဟာရကထာ • Aphāsukavihārakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အဖာသုကဝိဟာရကထာဝဏ္ဏနာ • Aphāsukavihārakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အဖာသုကဝိဟာရကထာဝဏ္ဏနာ • Aphāsukavihārakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အဖာသုဝိဟာရကထာဒိဝဏ္ဏနာ • Aphāsuvihārakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၂၀. အဖာသုကဝိဟာရကထာ • 120. Aphāsukavihārakathā
