อผาสุวิหารกถาทิวณฺณนา

Aphāsuvihārakathādivaṇṇanā

๒๐๙. ปวารณากฺขนฺธเก ปาฬิยํ ปิณฺฑาย ปฎิกฺกเมยฺยาติ ปิณฺฑาย จริตฺวา ปฎิกฺกเมยฺยฯ อวกฺการปาตินฺติ อติเรกปิณฺฑปาตฐปนกํ เอกํ ภาชนํฯ อวิสยฺหนฺติ อุกฺขิปิตุํ อสกฺกุเณยฺยํฯ วิลงฺฆนํ อุกฺขิปนํ วิลโงฺฆ, โส เอว วิลงฺฆโก, หเตฺถหิ วิลงฺฆโก หตฺถวิลงฺฆโกติ อาห ‘‘หตฺถุเกฺขปเกนา’’ติฯ อถ วา วิลงฺฆเกน อุเกฺขปเกน หเตฺถนาติปิ อโตฺถ, อญฺญมญฺญํ สํสิพฺพิตหเตฺถหีติ วุตฺตํ โหติฯ

209. Pavāraṇākkhandhake pāḷiyaṃ piṇḍāya paṭikkameyyāti piṇḍāya caritvā paṭikkameyya. Avakkārapātinti atirekapiṇḍapātaṭhapanakaṃ ekaṃ bhājanaṃ. Avisayhanti ukkhipituṃ asakkuṇeyyaṃ. Vilaṅghanaṃ ukkhipanaṃ vilaṅgho, so eva vilaṅghako, hatthehi vilaṅghako hatthavilaṅghakoti āha ‘‘hatthukkhepakenā’’ti. Atha vā vilaṅghakena ukkhepakena hatthenātipi attho, aññamaññaṃ saṃsibbitahatthehīti vuttaṃ hoti.

๒๑๓. สเจ ปน วุฑฺฒตโร โหตีติ ปวารณาทายโก ภิกฺขุ วุฑฺฒตโร โหติฯ เอวญฺหิ เตน ตสฺสตฺถาย ปวาริตํ โหตีติ เอตฺถ เอวํ เตน อปฺปวาริโตปิ ตสฺส สงฺฆปฺปตฺติมเตฺตน สงฺฆปวารณากมฺมํ สมคฺคกมฺมเมว โหตีติ ทฎฺฐพฺพํฯ เตน จ ภิกฺขุนาติ ปวารณาทายเกน ภิกฺขุนาฯ

213.Sace pana vuḍḍhataro hotīti pavāraṇādāyako bhikkhu vuḍḍhataro hoti. Evañhi tena tassatthāya pavāritaṃ hotīti ettha evaṃ tena appavāritopi tassa saṅghappattimattena saṅghapavāraṇākammaṃ samaggakammameva hotīti daṭṭhabbaṃ. Tena ca bhikkhunāti pavāraṇādāyakena bhikkhunā.

๒๓๔. พหูปิ สมานวสฺสา เอกโต ปวาเรตุํ ลภนฺตีติ เอกสฺมิํ สํวจฺฉเร ลทฺธูปสมฺปทตาย สมานุปสมฺปนฺนวสฺสา สเพฺพ เอกโต ปวาเรตุํ ลภนฺตีติ อโตฺถฯ

234.Bahūpi samānavassā ekato pavāretuṃ labhantīti ekasmiṃ saṃvacchare laddhūpasampadatāya samānupasampannavassā sabbe ekato pavāretuṃ labhantīti attho.

๒๓๗. ปาฬิยํ มิจฺฉาทิฎฺฐีติ ‘‘นตฺถิ ทินฺน’’นฺติอาทิ (ที. นิ. ๑.๑๗๑; ม. นิ. ๑.๔๔๕; ๒.๙๔, ๙๕, ๒๒๕; ๓.๙๑, ๑๑๖, ๑๓๖; สํ. นิ. ๓.๒๑๐; ธ. ส. ๑๒๒๑) นยปฺปวตฺตาฯ อนฺตคฺคาหิกาติ สสฺสตุเจฺฉทสงฺขาตสฺส อนฺตสฺส คาหิกาฯ ยํ โข ตฺวนฺติอาทีสุ ยํ ปวารณํ ฐเปสิ, ตํ ทิเฎฺฐน ฐเปสีติ ตํ-สทฺทํ อชฺฌาหริตฺวา โยเชตพฺพํฯ

237. Pāḷiyaṃ micchādiṭṭhīti ‘‘natthi dinna’’ntiādi (dī. ni. 1.171; ma. ni. 1.445; 2.94, 95, 225; 3.91, 116, 136; saṃ. ni. 3.210; dha. sa. 1221) nayappavattā. Antaggāhikāti sassatucchedasaṅkhātassa antassa gāhikā. Yaṃ kho tvantiādīsu yaṃ pavāraṇaṃ ṭhapesi, taṃ diṭṭhena ṭhapesīti taṃ-saddaṃ ajjhāharitvā yojetabbaṃ.

๒๓๙. วตฺถุํ ปกาเสโนฺตติ ปุคฺคเล ปริสงฺกุปฺปตฺติยา นิมิตฺตภูตํ วตฺถุมตฺตํเยว สนฺธาย วุตฺตํ ฯ ยํ ปน วตฺถุํ สนฺธาย ‘‘ปุคฺคโล ปญฺญายติ, น วตฺถู’’ติ อาห, น ตํ สนฺธาเยตํ วุตฺตํฯ ยทิ ปน ตสฺส ภิกฺขุโน วสนฎฺฐาเน โปกฺขรณิโต มจฺฉคฺคหณาทิ ทิเสฺสยฺย, ตทา ‘‘วตฺถุ จ ปุคฺคโล จ ปญฺญายตี’’ติ วตฺตพฺพํ ภเวยฺยฯ เตนาห ‘‘ปุริมนเยเนว โจเรหี’’ติอาทิฯ ภิกฺขุโน สรีเร มาลาคนฺธญฺจ อริฎฺฐคนฺธญฺจ ทิสฺวา เอวํ ‘‘วตฺถุ จ ปุคฺคโล จ ปญฺญายตี’’ติ วุตฺตนฺติ เวทิตพฺพํฯ

239.Vatthuṃ pakāsentoti puggale parisaṅkuppattiyā nimittabhūtaṃ vatthumattaṃyeva sandhāya vuttaṃ . Yaṃ pana vatthuṃ sandhāya ‘‘puggalo paññāyati, na vatthū’’ti āha, na taṃ sandhāyetaṃ vuttaṃ. Yadi pana tassa bhikkhuno vasanaṭṭhāne pokkharaṇito macchaggahaṇādi disseyya, tadā ‘‘vatthu ca puggalo ca paññāyatī’’ti vattabbaṃ bhaveyya. Tenāha ‘‘purimanayeneva corehī’’tiādi. Bhikkhuno sarīre mālāgandhañca ariṭṭhagandhañca disvā evaṃ ‘‘vatthu ca puggalo ca paññāyatī’’ti vuttanti veditabbaṃ.

อผาสุวิหารกถาทิวณฺณนา นิฎฺฐิตาฯ

Aphāsuvihārakathādivaṇṇanā niṭṭhitā.

Next: ภณฺฑนการกวตฺถุกถาวณฺณนา • Bhaṇḍanakārakavatthukathāvaṇṇanā

อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā
อผาสุกวิหารกถา • Aphāsukavihārakathā
ปวารณาทานานุชานนกถา • Pavāraṇādānānujānanakathā
เทฺววาจิกาทิปวารณากถา • Dvevācikādipavāraṇākathā
ปวารณาฐปนกถา • Pavāraṇāṭhapanakathā
วตฺถุฐปนาทิกถา • Vatthuṭhapanādikathā

ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā
อผาสุกวิหารกถาวณฺณนา • Aphāsukavihārakathāvaṇṇanā
ปวารณาทานานุชานนกถาวณฺณนา • Pavāraṇādānānujānanakathāvaṇṇanā
ปวารณาฐปนกถาวณฺณนา • Pavāraṇāṭhapanakathāvaṇṇanā

ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā
ปวารณาทานานุชานนกถาวณฺณนา • Pavāraṇādānānujānanakathāvaṇṇanā
อนาปตฺติปนฺนรสกาทิกถาวณฺณนา • Anāpattipannarasakādikathāvaṇṇanā

ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi
๑๒๐. อผาสุกวิหารกถา • 120. Aphāsukavihārakathā
๑๒๑. ปวารณาเภทกถา • 121. Pavāraṇābhedakathā
๑๔๐. เทฺววาจิกาทิปวารณากถา • 140. Dvevācikādipavāraṇākathā
๑๔๑. ปวารณาฎฺฐปนกถา • 141. Pavāraṇāṭṭhapanakathā
๑๔๓. วตฺถุฎฺฐปนาทิกถา • 143. Vatthuṭṭhapanādikathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact