| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៦. អប្បកសុត្តំ
6. Appakasuttaṃ
១១៧. សាវត្ថិនិទានំ។ ឯកមន្តំ និសិន្នោ ខោ រាជា បសេនទិ កោសលោ ភគវន្តំ ឯតទវោច – ‘‘ឥធ មយ្ហំ, ភន្តេ, រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ – ‘អប្បកា តេ សត្តា លោកស្មិំ យេ ឧឡារេ ឧឡារេ ភោគេ លភិត្វា ន ចេវ មជ្ជន្តិ, ន ច បមជ្ជន្តិ, ន ច កាមេសុ គេធំ អាបជ្ជន្តិ, ន ច សត្តេសុ វិប្បដិបជ្ជន្តិ។ អថ ខោ ឯតេវ ពហុតរា សត្តា លោកស្មិំ យេ ឧឡារេ ឧឡារេ ភោគេ លភិត្វា មជ្ជន្តិ ចេវ បមជ្ជន្តិ , ច កាមេសុ ច គេធំ អាបជ្ជន្តិ, សត្តេសុ ច វិប្បដិបជ្ជន្តី’’’តិ។
117. Sāvatthinidānaṃ. Ekamantaṃ nisinno kho rājā pasenadi kosalo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘appakā te sattā lokasmiṃ ye uḷāre uḷāre bhoge labhitvā na ceva majjanti, na ca pamajjanti, na ca kāmesu gedhaṃ āpajjanti, na ca sattesu vippaṭipajjanti. Atha kho eteva bahutarā sattā lokasmiṃ ye uḷāre uḷāre bhoge labhitvā majjanti ceva pamajjanti , ca kāmesu ca gedhaṃ āpajjanti, sattesu ca vippaṭipajjantī’’’ti.
‘‘ឯវមេតំ, មហារាជ, ឯវមេតំ, មហារាជ! អប្បកា តេ, មហារាជ, សត្តា លោកស្មិំ, យេ ឧឡារេ ឧឡារេ ភោគេ លភិត្វា ន ចេវ មជ្ជន្តិ, ន ច បមជ្ជន្តិ, ន ច កាមេសុ គេធំ អាបជ្ជន្តិ, ន ច សត្តេសុ វិប្បដិបជ្ជន្តិ។ អថ ខោ ឯតេវ ពហុតរា សត្តា លោកស្មិំ, យេ ឧឡារេ ឧឡារេ ភោគេ លភិត្វា មជ្ជន្តិ ចេវ បមជ្ជន្តិ ច កាមេសុ ច គេធំ អាបជ្ជន្តិ, សត្តេសុ ច វិប្បដិបជ្ជន្តី’’តិ។ ឥទមវោច…បេ.…
‘‘Evametaṃ, mahārāja, evametaṃ, mahārāja! Appakā te, mahārāja, sattā lokasmiṃ, ye uḷāre uḷāre bhoge labhitvā na ceva majjanti, na ca pamajjanti, na ca kāmesu gedhaṃ āpajjanti, na ca sattesu vippaṭipajjanti. Atha kho eteva bahutarā sattā lokasmiṃ, ye uḷāre uḷāre bhoge labhitvā majjanti ceva pamajjanti ca kāmesu ca gedhaṃ āpajjanti, sattesu ca vippaṭipajjantī’’ti. Idamavoca…pe…
‘‘សារត្តា កាមភោគេសុ, គិទ្ធា កាមេសុ មុច្ឆិតា;
‘‘Sārattā kāmabhogesu, giddhā kāmesu mucchitā;
អតិសារំ ន ពុជ្ឈន្តិ, មិគា កូដំវ ឱឌ្ឌិតំ;
Atisāraṃ na bujjhanti, migā kūṭaṃva oḍḍitaṃ;
បច្ឆាសំ កដុកំ ហោតិ, វិបាកោ ហិស្ស បាបកោ’’តិ។
Pacchāsaṃ kaṭukaṃ hoti, vipāko hissa pāpako’’ti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦. អប្បកសុត្តវណ្ណនា • 6. Appakasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៦. អប្បកសុត្តវណ្ណនា • 6. Appakasuttavaṇṇanā
