| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. අප්‌පකසුත්‌තං
6. Appakasuttaṃ
117. සාවත්‌ථිනිදානං. එකමන්‌තං නිසින්‌නො ඛො රාජා පසෙනදි කොසලො භගවන්‌තං එතදවොච – ‘‘ඉධ මය්‌හං, භන්‌තෙ, රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි – ‘අප්‌පකා තෙ සත්‌තා ලොකස්‌මිං යෙ උළාරෙ උළාරෙ භොගෙ ලභිත්‌වා න චෙව මජ්‌ජන්‌ති, න ච පමජ්‌ජන්‌ති, න ච කාමෙසු ගෙධං ආපජ්‌ජන්‌ති, න ච සත්‌තෙසු විප්‌පටිපජ්‌ජන්‌ති. අථ ඛො එතෙව බහුතරා සත්‌තා ලොකස්‌මිං යෙ උළාරෙ උළාරෙ භොගෙ ලභිත්‌වා මජ්‌ජන්‌ති චෙව පමජ්‌ජන්‌ති , ච කාමෙසු ච ගෙධං ආපජ්‌ජන්‌ති, සත්‌තෙසු ච විප්‌පටිපජ්‌ජන්‌තී’’’ති.
117. Sāvatthinidānaṃ. Ekamantaṃ nisinno kho rājā pasenadi kosalo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘appakā te sattā lokasmiṃ ye uḷāre uḷāre bhoge labhitvā na ceva majjanti, na ca pamajjanti, na ca kāmesu gedhaṃ āpajjanti, na ca sattesu vippaṭipajjanti. Atha kho eteva bahutarā sattā lokasmiṃ ye uḷāre uḷāre bhoge labhitvā majjanti ceva pamajjanti , ca kāmesu ca gedhaṃ āpajjanti, sattesu ca vippaṭipajjantī’’’ti.
‘‘එවමෙතං, මහාරාජ, එවමෙතං, මහාරාජ! අප්‌පකා තෙ, මහාරාජ, සත්‌තා ලොකස්‌මිං, යෙ උළාරෙ උළාරෙ භොගෙ ලභිත්‌වා න චෙව මජ්‌ජන්‌ති, න ච පමජ්‌ජන්‌ති, න ච කාමෙසු ගෙධං ආපජ්‌ජන්‌ති, න ච සත්‌තෙසු විප්‌පටිපජ්‌ජන්‌ති. අථ ඛො එතෙව බහුතරා සත්‌තා ලොකස්‌මිං, යෙ උළාරෙ උළාරෙ භොගෙ ලභිත්‌වා මජ්‌ජන්‌ති චෙව පමජ්‌ජන්‌ති ච කාමෙසු ච ගෙධං ආපජ්‌ජන්‌ති, සත්‌තෙසු ච විප්‌පටිපජ්‌ජන්‌තී’’ති. ඉදමවොච…පෙ.…
‘‘Evametaṃ, mahārāja, evametaṃ, mahārāja! Appakā te, mahārāja, sattā lokasmiṃ, ye uḷāre uḷāre bhoge labhitvā na ceva majjanti, na ca pamajjanti, na ca kāmesu gedhaṃ āpajjanti, na ca sattesu vippaṭipajjanti. Atha kho eteva bahutarā sattā lokasmiṃ, ye uḷāre uḷāre bhoge labhitvā majjanti ceva pamajjanti ca kāmesu ca gedhaṃ āpajjanti, sattesu ca vippaṭipajjantī’’ti. Idamavoca…pe…
‘‘සාරත්‌තා කාමභොගෙසු, ගිද්‌ධා කාමෙසු මුච්‌ඡිතා;
‘‘Sārattā kāmabhogesu, giddhā kāmesu mucchitā;
අතිසාරං න බුජ්‌ඣන්‌ති, මිගා කූටංව ඔඩ්‌ඩිතං;
Atisāraṃ na bujjhanti, migā kūṭaṃva oḍḍitaṃ;
පච්‌ඡාසං කටුකං හොති, විපාකො හිස්‌ස පාපකො’’ති.
Pacchāsaṃ kaṭukaṃ hoti, vipāko hissa pāpako’’ti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. අප්‌පකසුත්‌තවණ්‌ණනා • 6. Appakasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. අප්‌පකසුත්‌තවණ්‌ණනා • 6. Appakasuttavaṇṇanā
