| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៥-៦. អប្បមាទសុត្តាទិវណ្ណនា
5-6. Appamādasuttādivaṇṇanā
១៥-១៦. បញ្ចមេ ការាបកអប្បមាទោ នាម ‘‘ឥមេ អកុសលា ធម្មា បហាតព្ពា, ឥមេ កុសលា ធម្មា ឧបសម្បាទេតព្ពា’’តិ តំតំបរិវជ្ជេតព្ពវជ្ជនសម្បាទេតព្ពសម្បាទនវសេន បវត្តោ អប្បមាទោ។ ឯសាតិ អប្បមាទោ។ លោកិយោវ ន លោកុត្តរោ។ អយញ្ចាតិ ច ឯសាតិ ច អប្បមាទមេវ វទតិ។ តេសន្តិ ចាតុភូមកធម្មានំ។ បដិលាភកត្តេនាតិ បដិលាភាបនកត្តេន។
15-16. Pañcame kārāpakaappamādo nāma ‘‘ime akusalā dhammā pahātabbā, ime kusalā dhammā upasampādetabbā’’ti taṃtaṃparivajjetabbavajjanasampādetabbasampādanavasena pavatto appamādo. Esāti appamādo. Lokiyova na lokuttaro. Ayañcāti ca esāti ca appamādameva vadati. Tesanti cātubhūmakadhammānaṃ. Paṭilābhakattenāti paṭilābhāpanakattena.
ជង្គលានន្តិ ជង្គលចារីនំ។ ជង្គល-សទ្ទោ ចេត្ថ ខរភាវសាមញ្ញេន បថវីបរិយាយោ, ន អនុបដ្ឋានវិទូរទេសវាចី។ តេនាហ ‘‘បថវីតលចារីន’’ន្តិ។ បទានំ វុច្ចមានត្តា ‘‘សបាទកបាណាន’’ន្តិ វិសេសេត្វា វុត្តំ។ សមោធានន្តិ អន្តោគធភាវំ។ តេនាហ ‘‘ឱធានំ បក្ខេប’’ន្តិ។ ‘‘ឧបក្ខេប’’ន្តិបិ បឋន្តិ, ឧបនេត្វា បក្ខិបិតព្ពន្តិ អត្ថោ។ វស្សិកាយ បុប្ផំ វស្សិកំ យថា ‘‘អាមលកិយា ផលំ អាមលក’’ន្តិ។ មហាតលស្មិន្តិ ឧបរិបាសាទេ។ ឆដ្ឋំ ឧត្តានមេវ។
Jaṅgalānanti jaṅgalacārīnaṃ. Jaṅgala-saddo cettha kharabhāvasāmaññena pathavīpariyāyo, na anupaṭṭhānavidūradesavācī. Tenāha ‘‘pathavītalacārīna’’nti. Padānaṃ vuccamānattā ‘‘sapādakapāṇāna’’nti visesetvā vuttaṃ. Samodhānanti antogadhabhāvaṃ. Tenāha ‘‘odhānaṃ pakkhepa’’nti. ‘‘Upakkhepa’’ntipi paṭhanti, upanetvā pakkhipitabbanti attho. Vassikāya pupphaṃ vassikaṃ yathā ‘‘āmalakiyā phalaṃ āmalaka’’nti. Mahātalasminti uparipāsāde. Chaṭṭhaṃ uttānameva.
អប្បមាទសុត្តាទិវណ្ណនា និដ្ឋិតា។
Appamādasuttādivaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya
៥. អប្បមាទសុត្តំ • 5. Appamādasuttaṃ
៦. អាហុនេយ្យសុត្តំ • 6. Āhuneyyasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā)
៥. អប្បមាទសុត្តវណ្ណនា • 5. Appamādasuttavaṇṇanā
៦. អាហុនេយ្យសុត្តវណ្ណនា • 6. Āhuneyyasuttavaṇṇanā
