| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. අප්‌පමාදසුත්‌තං
6. Appamādasuttaṃ
116. ‘‘චතූහි, භික්‌ඛවෙ, ඨානෙහි අප්‌පමාදො කරණීයො. කතමෙහි චතූහි? කායදුච්‌චරිතං, භික්‌ඛවෙ, පජහථ, කායසුචරිතං භාවෙථ; තත්‌ථ ච මා පමාදත්‌ථ. වචීදුච්‌චරිතං, භික්‌ඛවෙ, පජහථ, වචීසුචරිතං භාවෙථ; තත්‌ථ ච මා පමාදත්‌ථ. මනොදුච්‌චරිතං, භික්‌ඛවෙ, පජහථ, මනොසුචරිතං භාවෙථ; තත්‌ථ ච මා පමාදත්‌ථ. මිච්‌ඡාදිට්‌ඨිං, භික්‌ඛවෙ, පජහථ, සම්‌මාදිට්‌ඨිං භාවෙථ ; තත්‌ථ ච මා පමාදත්‌ථ.
116. ‘‘Catūhi, bhikkhave, ṭhānehi appamādo karaṇīyo. Katamehi catūhi? Kāyaduccaritaṃ, bhikkhave, pajahatha, kāyasucaritaṃ bhāvetha; tattha ca mā pamādattha. Vacīduccaritaṃ, bhikkhave, pajahatha, vacīsucaritaṃ bhāvetha; tattha ca mā pamādattha. Manoduccaritaṃ, bhikkhave, pajahatha, manosucaritaṃ bhāvetha; tattha ca mā pamādattha. Micchādiṭṭhiṃ, bhikkhave, pajahatha, sammādiṭṭhiṃ bhāvetha ; tattha ca mā pamādattha.
‘‘යතො ඛො, භික්‌ඛවෙ, භික්‌ඛුනො කායදුච්‌චරිතං පහීනං හොති කායසුචරිතං භාවිතං, වචීදුච්‌චරිතං පහීනං හොති වචීසුචරිතං භාවිතං, මනොදුච්‌චරිතං පහීනං හොති මනොසුචරිතං භාවිතං, මිච්‌ඡාදිට්‌ඨි පහීනා හොති සම්‌මාදිට්‌ඨි භාවිතා, සො න භායති සම්‌පරායිකස්‌ස මරණස්‌සා’’ති. ඡට්‌ඨං.
‘‘Yato kho, bhikkhave, bhikkhuno kāyaduccaritaṃ pahīnaṃ hoti kāyasucaritaṃ bhāvitaṃ, vacīduccaritaṃ pahīnaṃ hoti vacīsucaritaṃ bhāvitaṃ, manoduccaritaṃ pahīnaṃ hoti manosucaritaṃ bhāvitaṃ, micchādiṭṭhi pahīnā hoti sammādiṭṭhi bhāvitā, so na bhāyati samparāyikassa maraṇassā’’ti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 6. අප්‌පමාදසුත්‌තවණ්‌ණනා • 6. Appamādasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-7. කෙසිසුත්‌තාදිවණ්‌ණනා • 1-7. Kesisuttādivaṇṇanā
