| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. අප්‌පමාදසුත්‌තං
5. Appamādasuttaṃ
15. ‘‘යාවතා, භික්‌ඛවෙ, සත්‌තා අපදා වා ද්‌විපදා වා චතුප්‌පදා වා බහුප්‌පදා වා රූපිනො වා අරූපිනො වා සඤ්‌ඤිනො වා අසඤ්‌ඤිනො වා නෙවසඤ්‌ඤිනාසඤ්‌ඤිනො වා, තථාගතො තෙසං අග්‌ගමක්‌ඛායති අරහං සම්‌මාසම්‌බුද්‌ධො; එවමෙවං ඛො, භික්‌ඛවෙ, යෙ කෙචි කුසලා ධම්‌මා, සබ්‌බෙ තෙ අප්‌පමාදමූලකා අප්‌පමාදසමොසරණා. අප්‌පමාදො තෙසං 1 අග්‌ගමක්‌ඛායති.
15. ‘‘Yāvatā, bhikkhave, sattā apadā vā dvipadā vā catuppadā vā bahuppadā vā rūpino vā arūpino vā saññino vā asaññino vā nevasaññināsaññino vā, tathāgato tesaṃ aggamakkhāyati arahaṃ sammāsambuddho; evamevaṃ kho, bhikkhave, ye keci kusalā dhammā, sabbe te appamādamūlakā appamādasamosaraṇā. Appamādo tesaṃ 2 aggamakkhāyati.
‘‘සෙය්‍යථාපි, භික්‌ඛවෙ, යානි කානිචි ජඞ්‌ගලානං 3 පාණානං පදජාතානි, සබ්‌බානි තානි හත්‌ථිපදෙ සමොධානං ගච්‌ඡන්‌ති, හත්‌ථිපදං තෙසං අග්‌ගමක්‌ඛායති, යදිදං මහන්‌තත්‌තෙන; එවමෙවං ඛො, භික්‌ඛවෙ , යෙ කෙචි කුසලා ධම්‌මා, සබ්‌බෙ තෙ අප්‌පමාදමූලකා අප්‌පමාදසමොසරණා. අප්‌පමාදො තෙසං අග්‌ගමක්‌ඛායති.
‘‘Seyyathāpi, bhikkhave, yāni kānici jaṅgalānaṃ 4 pāṇānaṃ padajātāni, sabbāni tāni hatthipade samodhānaṃ gacchanti, hatthipadaṃ tesaṃ aggamakkhāyati, yadidaṃ mahantattena; evamevaṃ kho, bhikkhave , ye keci kusalā dhammā, sabbe te appamādamūlakā appamādasamosaraṇā. Appamādo tesaṃ aggamakkhāyati.
‘‘සෙය්‍යථාපි, භික්‌ඛවෙ, කූටාගාරස්‌ස යා කාචි ගොපානසියො සබ්‌බා තා කූටඞ්‌ගමා කූටනින්‌නා කූටසමොසරණා, කූටො තාසං අග්‌ගමක්‌ඛායති; එවමෙවං ඛො, භික්‌ඛවෙ, යෙ කෙචි කුසලා ධම්‌මා, සබ්‌බෙ තෙ අප්‌පමාදමූලකා අප්‌පමාදසමොසරණා. අප්‌පමාදො තෙසං අග්‌ගමක්‌ඛායති.
‘‘Seyyathāpi, bhikkhave, kūṭāgārassa yā kāci gopānasiyo sabbā tā kūṭaṅgamā kūṭaninnā kūṭasamosaraṇā, kūṭo tāsaṃ aggamakkhāyati; evamevaṃ kho, bhikkhave, ye keci kusalā dhammā, sabbe te appamādamūlakā appamādasamosaraṇā. Appamādo tesaṃ aggamakkhāyati.
‘‘සෙය්‍යථාපි , භික්‌ඛවෙ, යෙ කෙචි මූලගන්‌ධා, කාළානුසාරියං තෙසං අග්‌ගමක්‌ඛායති; එවමෙවං ඛො භික්‌ඛවෙ…පෙ.….
‘‘Seyyathāpi , bhikkhave, ye keci mūlagandhā, kāḷānusāriyaṃ tesaṃ aggamakkhāyati; evamevaṃ kho bhikkhave…pe….
‘‘සෙය්‍යථාපි, භික්‌ඛවෙ, යෙ කෙචි සාරගන්‌ධා, ලොහිතචන්‌දනං තෙසං අග්‌ගමක්‌ඛායති; එවමෙවං ඛො භික්‌ඛවෙ…පෙ.….
‘‘Seyyathāpi, bhikkhave, ye keci sāragandhā, lohitacandanaṃ tesaṃ aggamakkhāyati; evamevaṃ kho bhikkhave…pe….
‘‘සෙය්‍යථාපි, භික්‌ඛවෙ, යෙ කෙචි පුප්‌ඵගන්‌ධා, වස්‌සිකං තෙසං අග්‌ගමක්‌ඛායති; එවමෙවං ඛො භික්‌ඛවෙ…පෙ.….
‘‘Seyyathāpi, bhikkhave, ye keci pupphagandhā, vassikaṃ tesaṃ aggamakkhāyati; evamevaṃ kho bhikkhave…pe….
‘‘සෙය්‍යථාපි, භික්‌ඛවෙ, යෙ කෙචි ඛුද්‌දරාජානො 5, සබ්‌බෙ තෙ රඤ්‌ඤො චක්‌කවත්‌තිස්‌ස අනුයන්‌තා භවන්‌ති, රාජා තෙසං චක්‌කවත්‌තී අග්‌ගමක්‌ඛායති; එවමෙවං ඛො, භික්‌ඛවෙ…පෙ.….
‘‘Seyyathāpi, bhikkhave, ye keci khuddarājāno 6, sabbe te rañño cakkavattissa anuyantā bhavanti, rājā tesaṃ cakkavattī aggamakkhāyati; evamevaṃ kho, bhikkhave…pe….
‘‘සෙය්‍යථාපි, භික්‌ඛවෙ, යා කාචි තාරකරූපානං පභා, සබ්‌බා තා චන්‌දප්‌පභාය කලං නාග්‌ඝන්‌ති සොළසිං, චන්‌දප්‌පභා තාසං අග්‌ගමක්‌ඛායති; එවමෙවං ඛො, භික්‌ඛවෙ…පෙ.….
‘‘Seyyathāpi, bhikkhave, yā kāci tārakarūpānaṃ pabhā, sabbā tā candappabhāya kalaṃ nāgghanti soḷasiṃ, candappabhā tāsaṃ aggamakkhāyati; evamevaṃ kho, bhikkhave…pe….
‘‘සෙය්‍යථාපි, භික්‌ඛවෙ, සරදසමයෙ විද්‌ධෙ විගතවලාහකෙ දෙවෙ ආදිච්‌චො නභං අබ්‌භුස්‌සක්‌කමානො 7 සබ්‌බං ආකාසගතං තමගතං අභිවිහච්‌ච භාසතෙ ච තපතෙ ච විරොචති ච; එවමෙවං ඛො, භික්‌ඛවෙ…පෙ.….
‘‘Seyyathāpi, bhikkhave, saradasamaye viddhe vigatavalāhake deve ādicco nabhaṃ abbhussakkamāno 8 sabbaṃ ākāsagataṃ tamagataṃ abhivihacca bhāsate ca tapate ca virocati ca; evamevaṃ kho, bhikkhave…pe….
‘‘සෙය්‍යථාපි , භික්‌ඛවෙ, යා කාචි මහානදියො, සෙය්‍යථිදං – ගඞ්‌ගා, යමුනා, අචිරවතී, සරභූ, මහී, සබ්‌බා තා සමුද්‌දඞ්‌ගමා සමුද්‌දනින්‌නා සමුද්‌දපොණා සමුද්‌දපබ්‌භාරා, මහාසමුද්‌දො තාසං අග්‌ගමක්‌ඛායති; එවමෙවං ඛො, භික්‌ඛවෙ, යෙ කෙචි කුසලා ධම්‌මා, සබ්‌බෙ තෙ අප්‌පමාදමූලකා අප්‌පමාදසමොසරණා. අප්‌පමාදො තෙසං අග්‌ගමක්‌ඛායතී’’ති. පඤ්‌චමං.
‘‘Seyyathāpi , bhikkhave, yā kāci mahānadiyo, seyyathidaṃ – gaṅgā, yamunā, aciravatī, sarabhū, mahī, sabbā tā samuddaṅgamā samuddaninnā samuddapoṇā samuddapabbhārā, mahāsamuddo tāsaṃ aggamakkhāyati; evamevaṃ kho, bhikkhave, ye keci kusalā dhammā, sabbe te appamādamūlakā appamādasamosaraṇā. Appamādo tesaṃ aggamakkhāyatī’’ti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. අප්‌පමාදසුත්‌තවණ්‌ණනා • 5. Appamādasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-6. අප්‌පමාදසුත්‌තාදිවණ්‌ණනා • 5-6. Appamādasuttādivaṇṇanā
