| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. அப்பமாத³ஸுத்தவண்ணனா
5. Appamādasuttavaṇṇanā
15. பஞ்சமே ஏவமேவ கோ²தி யதா² ஸப்³ப³ஸத்தானங் ஸம்மாஸம்பு³த்³தோ⁴ அக்³கோ³, ஏவங் ஸப்³பே³ஸங் குஸலத⁴ம்மானங் காராபகஅப்பமாதோ³ அக்³கோ³தி த³ட்ட²ப்³போ³. நனு சேஸ லோகியோவ, குஸலத⁴ம்மா பன லோகுத்தராபி. அயஞ்ச காமாவசரோவ, குஸலத⁴ம்மா பன சதுபூ⁴மகா. கத²மேஸ தேஸங் அக்³கோ³தி? படிலாப⁴கத்தேன. அப்பமாதே³ன ஹி தே படிலப⁴ந்தி, தஸ்மா ஸோ தேஸங் அக்³கோ³. தேனேவ வுத்தங் – ஸப்³பே³ தே அப்பமாத³மூலகாதி.
15. Pañcame evameva khoti yathā sabbasattānaṃ sammāsambuddho aggo, evaṃ sabbesaṃ kusaladhammānaṃ kārāpakaappamādo aggoti daṭṭhabbo. Nanu cesa lokiyova, kusaladhammā pana lokuttarāpi. Ayañca kāmāvacarova, kusaladhammā pana catubhūmakā. Kathamesa tesaṃ aggoti? Paṭilābhakattena. Appamādena hi te paṭilabhanti, tasmā so tesaṃ aggo. Teneva vuttaṃ – sabbe te appamādamūlakāti.
ஜங்க³லானந்தி பத²விதலசாரீனங். பாணானந்தி ஸபாத³கபாணானங். பத³ஜாதானீதி பதா³னி. ஸமோதா⁴னங் க³ச்ச²ந்தீதி ஓதா⁴னங் பக்கே²பங் க³ச்ச²ந்தி. அக்³க³மக்கா²யதீதி ஸெட்ட²மக்கா²யதி. யதி³த³ங் மஹந்தத்தேனாதி மஹந்தபா⁴வேன அக்³க³மக்கா²யதி, ந கு³ணக்³கே³னாதி அத்தோ². வஸ்ஸிகந்தி ஸுமனபுப்ப²ங். இத³ங் கிர ஸுத்தங் ஸுத்வா பா⁴தியமஹாராஜா வீமங்ஸிதுகாமதாய ஏகஸ்மிங் க³ப்³பே⁴ சதுஜாதிக³ந்தே⁴ஹி பரிப⁴ண்ட³ங் கத்வா ஸுக³ந்த⁴புப்பா²னி ஆஹராபெத்வா ஏகஸ்ஸ ஸமுக்³க³ஸ்ஸ மஜ்ஜே² ஸுமனபுப்ப²முட்டி²ங் ட²பெத்வா ஸேஸானி தஸ்ஸ ஸமந்ததோ முட்டி²ங் கத்வா ட²பெத்வா த்³வாரங் பிதா⁴ய ப³ஹி நிக்க²ந்தோ. அத²ஸ்ஸ முஹுத்தங் ப³ஹி வீதினாமெத்வா த்³வாரங் விவரித்வா பவிஸந்தஸ்ஸ ஸப்³ப³பட²மங் ஸுமனபுப்ப²க³ந்தோ⁴ கா⁴னங் பஹரி. ஸோ மஹாதலஸ்மிங்யேவ மஹாசேதியாபி⁴முகோ² நிபஜ்ஜித்வா ‘‘வஸ்ஸிகங் தேஸங் அக்³க³ந்தி கதெ²ந்தேன ஸுகதி²தங் ஸம்மாஸம்பு³த்³தே⁴னா’’தி சேதியங் வந்தி³. கு²த்³த³ராஜானோதி கு²த்³த³கராஜானோ. கூடராஜானோதிபி பாடோ².
Jaṅgalānanti pathavitalacārīnaṃ. Pāṇānanti sapādakapāṇānaṃ. Padajātānīti padāni. Samodhānaṃ gacchantīti odhānaṃ pakkhepaṃ gacchanti. Aggamakkhāyatīti seṭṭhamakkhāyati. Yadidaṃmahantattenāti mahantabhāvena aggamakkhāyati, na guṇaggenāti attho. Vassikanti sumanapupphaṃ. Idaṃ kira suttaṃ sutvā bhātiyamahārājā vīmaṃsitukāmatāya ekasmiṃ gabbhe catujātigandhehi paribhaṇḍaṃ katvā sugandhapupphāni āharāpetvā ekassa samuggassa majjhe sumanapupphamuṭṭhiṃ ṭhapetvā sesāni tassa samantato muṭṭhiṃ katvā ṭhapetvā dvāraṃ pidhāya bahi nikkhanto. Athassa muhuttaṃ bahi vītināmetvā dvāraṃ vivaritvā pavisantassa sabbapaṭhamaṃ sumanapupphagandho ghānaṃ pahari. So mahātalasmiṃyeva mahācetiyābhimukho nipajjitvā ‘‘vassikaṃ tesaṃ agganti kathentena sukathitaṃ sammāsambuddhenā’’ti cetiyaṃ vandi. Khuddarājānoti khuddakarājāno. Kūṭarājānotipi pāṭho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. அப்பமாத³ஸுத்தங் • 5. Appamādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5-6. அப்பமாத³ஸுத்தாதி³வண்ணனா • 5-6. Appamādasuttādivaṇṇanā
