| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5. අප්‌පමාදසුත්‌තවණ්‌ණනා
5. Appamādasuttavaṇṇanā
15. පඤ්‌චමෙ එවමෙව ඛොති යථා සබ්‌බසත්‌තානං සම්‌මාසම්‌බුද්‌ධො අග්‌ගො, එවං සබ්‌බෙසං කුසලධම්‌මානං කාරාපකඅප්‌පමාදො අග්‌ගොති දට්‌ඨබ්‌බො. නනු චෙස ලොකියොව, කුසලධම්‌මා පන ලොකුත්‌තරාපි. අයඤ්‌ච කාමාවචරොව, කුසලධම්‌මා පන චතුභූමකා. කථමෙස තෙසං අග්‌ගොති? පටිලාභකත්‌තෙන. අප්‌පමාදෙන හි තෙ පටිලභන්‌ති, තස්‌මා සො තෙසං අග්‌ගො. තෙනෙව වුත්‌තං – සබ්‌බෙ තෙ අප්‌පමාදමූලකාති.
15. Pañcame evameva khoti yathā sabbasattānaṃ sammāsambuddho aggo, evaṃ sabbesaṃ kusaladhammānaṃ kārāpakaappamādo aggoti daṭṭhabbo. Nanu cesa lokiyova, kusaladhammā pana lokuttarāpi. Ayañca kāmāvacarova, kusaladhammā pana catubhūmakā. Kathamesa tesaṃ aggoti? Paṭilābhakattena. Appamādena hi te paṭilabhanti, tasmā so tesaṃ aggo. Teneva vuttaṃ – sabbe te appamādamūlakāti.
ජඞ්‌ගලානන්‌ති පථවිතලචාරීනං. පාණානන්‌ති සපාදකපාණානං. පදජාතානීති පදානි. සමොධානං ගච්‌ඡන්‌තීති ඔධානං පක්‌ඛෙපං ගච්‌ඡන්‌ති. අග්‌ගමක්‌ඛායතීති සෙට්‌ඨමක්‌ඛායති. යදිදං මහන්‌තත්‌තෙනාති මහන්‌තභාවෙන අග්‌ගමක්‌ඛායති, න ගුණග්‌ගෙනාති අත්‌ථො. වස්‌සිකන්‌ති සුමනපුප්‌ඵං. ඉදං කිර සුත්‌තං සුත්‌වා භාතියමහාරාජා වීමංසිතුකාමතාය එකස්‌මිං ගබ්‌භෙ චතුජාතිගන්‌ධෙහි පරිභණ්‌ඩං කත්‌වා සුගන්‌ධපුප්‌ඵානි ආහරාපෙත්‌වා එකස්‌ස සමුග්‌ගස්‌ස මජ්‌ඣෙ සුමනපුප්‌ඵමුට්‌ඨිං ඨපෙත්‌වා සෙසානි තස්‌ස සමන්‌තතො මුට්‌ඨිං කත්‌වා ඨපෙත්‌වා ද්‌වාරං පිධාය බහි නික්‌ඛන්‌තො. අථස්‌ස මුහුත්‌තං බහි වීතිනාමෙත්‌වා ද්‌වාරං විවරිත්‌වා පවිසන්‌තස්‌ස සබ්‌බපඨමං සුමනපුප්‌ඵගන්‌ධො ඝානං පහරි. සො මහාතලස්‌මිංයෙව මහාචෙතියාභිමුඛො නිපජ්‌ජිත්‌වා ‘‘වස්‌සිකං තෙසං අග්‌ගන්‌ති කථෙන්‌තෙන සුකථිතං සම්‌මාසම්‌බුද්‌ධෙනා’’ති චෙතියං වන්‌දි. ඛුද්‌දරාජානොති ඛුද්‌දකරාජානො. කූටරාජානොතිපි පාඨො.
Jaṅgalānanti pathavitalacārīnaṃ. Pāṇānanti sapādakapāṇānaṃ. Padajātānīti padāni. Samodhānaṃ gacchantīti odhānaṃ pakkhepaṃ gacchanti. Aggamakkhāyatīti seṭṭhamakkhāyati. Yadidaṃmahantattenāti mahantabhāvena aggamakkhāyati, na guṇaggenāti attho. Vassikanti sumanapupphaṃ. Idaṃ kira suttaṃ sutvā bhātiyamahārājā vīmaṃsitukāmatāya ekasmiṃ gabbhe catujātigandhehi paribhaṇḍaṃ katvā sugandhapupphāni āharāpetvā ekassa samuggassa majjhe sumanapupphamuṭṭhiṃ ṭhapetvā sesāni tassa samantato muṭṭhiṃ katvā ṭhapetvā dvāraṃ pidhāya bahi nikkhanto. Athassa muhuttaṃ bahi vītināmetvā dvāraṃ vivaritvā pavisantassa sabbapaṭhamaṃ sumanapupphagandho ghānaṃ pahari. So mahātalasmiṃyeva mahācetiyābhimukho nipajjitvā ‘‘vassikaṃ tesaṃ agganti kathentena sukathitaṃ sammāsambuddhenā’’ti cetiyaṃ vandi. Khuddarājānoti khuddakarājāno. Kūṭarājānotipi pāṭho.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. අප්‌පමාදසුත්‌තං • 5. Appamādasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-6. අප්‌පමාදසුත්‌තාදිවණ්‌ණනා • 5-6. Appamādasuttādivaṇṇanā
