| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
7. අප්‌පමාදසුත්‌තවණ්‌ණනා
7. Appamādasuttavaṇṇanā
128. සමධිග්‌ගය්‌හාති සම්‌මා අතිවිය ගහෙත්‌වා, ඤායෙන විසෙසතො ගණ්‌හිත්‌වා. කාරාපකඅප්‌පමාදොති තිණ්‌ණං පුඤ්‌ඤකිරියවත්‌ථූනං පවත්‌තකඅප්‌පමාදො. සමවධානන්‌ති සමවරොධං අන්‌තොගධං. උපක්‌ඛෙපන්‌ති බහි අහුත්‌වා පක්‌ඛිපිතබ්‌බතං. සෙසපදජාතානි විය අව…පෙ.… ධම්‌මා සප්‌පදෙසත්‌තා. අප්‌පමාදෙ සමොධානං ගච්‌ඡන්‌ති තස්‌ස නිප්‌පදෙසත්‌තා. අග්‌ගං සෙට්‌ඨං මහන්‌තං සෙසධම්‌මානං අප්‌පමාදො. පටිලාභකට්‌ඨෙනාති අධිගමහෙතුතාය. ලොකියොපි සමානොති කාමාවචරොපි සමානො. මහග්‌ගතානුත්‌තරානං පුබ්‌බභාගෙ පවත්‌තඅප්‌පමාදො හි ඉධාධිප්‌පෙතො.
128.Samadhiggayhāti sammā ativiya gahetvā, ñāyena visesato gaṇhitvā. Kārāpakaappamādoti tiṇṇaṃ puññakiriyavatthūnaṃ pavattakaappamādo. Samavadhānanti samavarodhaṃ antogadhaṃ. Upakkhepanti bahi ahutvā pakkhipitabbataṃ. Sesapadajātāni viya ava…pe… dhammā sappadesattā. Appamāde samodhānaṃ gacchanti tassa nippadesattā. Aggaṃ seṭṭhaṃ mahantaṃ sesadhammānaṃappamādo. Paṭilābhakaṭṭhenāti adhigamahetutāya. Lokiyopi samānoti kāmāvacaropi samāno. Mahaggatānuttarānaṃ pubbabhāge pavattaappamādo hi idhādhippeto.
පසංසන්‌ති පණ්‌ඩිතාති යොජනා. අප්‌පමාදස්‌ස පාසංසභාවෙ එකන්‌තතො කත්‌තබ්‌බතාය පන ‘‘එතානී’’තිආදිනා කාරණං ආහ. ඉමිස්‌සා යොජනාය ‘‘පුඤ්‌ඤකිරියාසූ’’ති පදස්‌ස ‘‘අප්‌පමත්‌තො’’ති ඉමිනා සම්‌බන්‌ධො. යස්‌මා පණ්‌ඩිතා අප්‌පමාදං පසංසන්‌ති, යස්‌මා ච පුඤ්‌ඤකිරියාසු අප්‌පමත්‌තො උභො අත්‌ථෙ අධිග්‌ගණ්‌හාති, තස්‌මා ආයුආදීනි පත්‌ථයන්‌තෙන අප්‌පමාදොව කාතබ්‌බොති. දුතියයොජනාය පන පණ්‌ඩිතා අප්‌පමාදං පසංසන්‌ති. කත්‌ථ? පුඤ්‌ඤකිරියාසු. කස්‌මාති චෙ? අප්‌පමත්‌තොතිආදි. තෙනාහ ‘‘යස්‌මා…පෙ.… අත්‌ථො’’ති. අත්‌ථපටිලාභාති දිට්‌ඨධම්‌මිකාදිහිතපටිලාභා.
Pasaṃsanti paṇḍitāti yojanā. Appamādassa pāsaṃsabhāve ekantato kattabbatāya pana ‘‘etānī’’tiādinā kāraṇaṃ āha. Imissā yojanāya ‘‘puññakiriyāsū’’ti padassa ‘‘appamatto’’ti iminā sambandho. Yasmā paṇḍitā appamādaṃ pasaṃsanti, yasmā ca puññakiriyāsu appamatto ubho atthe adhiggaṇhāti, tasmā āyuādīni patthayantena appamādova kātabboti. Dutiyayojanāya pana paṇḍitā appamādaṃ pasaṃsanti. Kattha? Puññakiriyāsu. Kasmāti ce? Appamattotiādi. Tenāha ‘‘yasmā…pe… attho’’ti. Atthapaṭilābhāti diṭṭhadhammikādihitapaṭilābhā.
අප්‌පමාදසුත්‌තවණ්‌ණනා නිට්‌ඨිතා.
Appamādasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. අප්‌පමාදසුත්‌තං • 7. Appamādasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. අප්‌පමාදසුත්‌තවණ්‌ණනා • 7. Appamādasuttavaṇṇanā
