| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
அப்பமத்தகவிஸ்ஸஜ்ஜகஸம்முதி
Appamattakavissajjakasammuti
328. தேன கோ² பன ஸமயேன ஸங்க⁴ஸ்ஸ ப⁴ண்டா³கா³ரே அப்பமத்தகோ பரிக்கா²ரோ உப்பன்னோ 1 ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தங் பி⁴க்கு²ங் அப்பமத்தகவிஸ்ஸஜ்ஜகங் ஸம்மன்னிதுங் – யோ ந ச²ந்தா³க³திங் க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங் க³ச்செ²ய்ய, ந ப⁴யாக³திங் க³ச்செ²ய்ய, விஸ்ஸஜ்ஜிதாவிஸ்ஸஜ்ஜிதஞ்ச ஜானெய்ய. ஏவஞ்ச பன, பி⁴க்க²வே, ஸம்மன்னிதப்³போ³. பட²மங் பி⁴க்கு² யாசிதப்³போ³, யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
328. Tena kho pana samayena saṅghassa bhaṇḍāgāre appamattako parikkhāro uppanno 2 hoti. Bhagavato etamatthaṃ ārocesuṃ. ‘‘Anujānāmi, bhikkhave, pañcahaṅgehi samannāgataṃ bhikkhuṃ appamattakavissajjakaṃ sammannituṃ – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, vissajjitāvissajjitañca jāneyya. Evañca pana, bhikkhave, sammannitabbo. Paṭhamaṃ bhikkhu yācitabbo, yācitvā byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் அப்பமத்தகவிஸ்ஸஜ்ஜகங் ஸம்மன்னெய்ய. ஏஸா ஞத்தி.
‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ appamattakavissajjakaṃ sammanneyya. Esā ñatti.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங் பி⁴க்கு²ங் அப்பமத்தகவிஸ்ஸஜ்ஜகங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ அப்பமத்தகவிஸ்ஸஜ்ஜகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Saṅgho itthannāmaṃ bhikkhuṃ appamattakavissajjakaṃ sammannati. Yassāyasmato khamati itthannāmassa bhikkhuno appamattakavissajjakassa sammuti, so tuṇhassa; yassa nakkhamati, so bhāseyya.
‘‘ஸம்மதோ ஸங்கே⁴ன இத்த²ன்னாமோ பி⁴க்கு² அப்பமத்தகவிஸ்ஸஜ்ஜகோ. க²மதி ஸங்க⁴ஸ்ஸ, தஸ்மா துண்ஹீ , ஏவமேதங் தா⁴ரயாமீ’’தி.
‘‘Sammato saṅghena itthannāmo bhikkhu appamattakavissajjako. Khamati saṅghassa, tasmā tuṇhī , evametaṃ dhārayāmī’’ti.
தேன அப்பமத்தகவிஸ்ஸஜ்ஜகேன பி⁴க்கு²னா ஏகா 3 ஸூசி தா³தப்³பா³, ஸத்த²கங் தா³தப்³ப³ங், உபாஹனா தா³தப்³பா³, காயப³ந்த⁴னங் தா³தப்³ப³ங், அங்ஸப³ந்த⁴கோ தா³தப்³போ³, பரிஸ்ஸாவனங் தா³தப்³ப³ங், த⁴ம்மகரணோ தா³தப்³போ³, குஸி தா³தப்³பா³, அட்³ட⁴குஸி தா³தப்³பா³, மண்ட³லங் தா³தப்³ப³ங், அட்³ட⁴மண்ட³லங் தா³தப்³ப³ங், அனுவாதோ தா³தப்³போ³, பரிப⁴ண்ட³ங் தா³தப்³ப³ங். ஸசே ஹோதி ஸங்க⁴ஸ்ஸ ஸப்பி வா தேலங் வா மது⁴ வா பா²ணிதங் வா, ஸகிங் படிஸாயிதுங் தா³தப்³ப³ங். ஸசே புனபி அத்தோ² ஹோதி, புனபி தா³தப்³ப³ங்.
Tena appamattakavissajjakena bhikkhunā ekā 4 sūci dātabbā, satthakaṃ dātabbaṃ, upāhanā dātabbā, kāyabandhanaṃ dātabbaṃ, aṃsabandhako dātabbo, parissāvanaṃ dātabbaṃ, dhammakaraṇo dātabbo, kusi dātabbā, aḍḍhakusi dātabbā, maṇḍalaṃ dātabbaṃ, aḍḍhamaṇḍalaṃ dātabbaṃ, anuvāto dātabbo, paribhaṇḍaṃ dātabbaṃ. Sace hoti saṅghassa sappi vā telaṃ vā madhu vā phāṇitaṃ vā, sakiṃ paṭisāyituṃ dātabbaṃ. Sace punapi attho hoti, punapi dātabbaṃ.
Footnotes:
