| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
အပ္ပမတ္တကဝိသ္သဇ္ဇကသမ္မုတိ
Appamattakavissajjakasammuti
၃၂၈. တေန ခော ပန သမယေန သင္ဃသ္သ ဘဏ္ဍာဂာရေ အပ္ပမတ္တကော ပရိက္ခာရော ဥပ္ပန္နော 1 ဟောတိ။ ဘဂဝတော ဧတမတ္ထံ အာရောစေသုံ။ ‘‘အနုဇာနာမိ, ဘိက္ခဝေ, ပဉ္စဟင္ဂေဟိ သမန္နာဂတံ ဘိက္ခုံ အပ္ပမတ္တကဝိသ္သဇ္ဇကံ သမ္မန္နိတုံ – ယော န ဆန္ဒာဂတိံ ဂစ္ဆေယ္ယ, န ဒောသာဂတိံ ဂစ္ဆေယ္ယ, န မောဟာဂတိံ ဂစ္ဆေယ္ယ, န ဘယာဂတိံ ဂစ္ဆေယ္ယ, ဝိသ္သဇ္ဇိတာဝိသ္သဇ္ဇိတဉ္စ ဇာနေယ္ယ။ ဧဝဉ္စ ပန, ဘိက္ခဝေ, သမ္မန္နိတဗ္ဗော။ ပဌမံ ဘိက္ခု ယာစိတဗ္ဗော, ယာစိတ္ဝာ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
328. Tena kho pana samayena saṅghassa bhaṇḍāgāre appamattako parikkhāro uppanno 2 hoti. Bhagavato etamatthaṃ ārocesuṃ. ‘‘Anujānāmi, bhikkhave, pañcahaṅgehi samannāgataṃ bhikkhuṃ appamattakavissajjakaṃ sammannituṃ – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, vissajjitāvissajjitañca jāneyya. Evañca pana, bhikkhave, sammannitabbo. Paṭhamaṃ bhikkhu yācitabbo, yācitvā byattena bhikkhunā paṭibalena saṅgho ñāpetabbo –
‘‘သုဏာတု မေ, ဘန္တေ, သင္ဃော။ ယဒိ သင္ဃသ္သ ပတ္တကလ္လံ, သင္ဃော ဣတ္ထန္နာမံ ဘိက္ခုံ အပ္ပမတ္တကဝိသ္သဇ္ဇကံ သမ္မန္နေယ္ယ။ ဧသာ ဉတ္တိ။
‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ appamattakavissajjakaṃ sammanneyya. Esā ñatti.
‘‘သုဏာတု မေ, ဘန္တေ, သင္ဃော။ သင္ဃော ဣတ္ထန္နာမံ ဘိက္ခုံ အပ္ပမတ္တကဝိသ္သဇ္ဇကံ သမ္မန္နတိ။ ယသ္သာယသ္မတော ခမတိ ဣတ္ထန္နာမသ္သ ဘိက္ခုနော အပ္ပမတ္တကဝိသ္သဇ္ဇကသ္သ သမ္မုတိ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Suṇātu me, bhante, saṅgho. Saṅgho itthannāmaṃ bhikkhuṃ appamattakavissajjakaṃ sammannati. Yassāyasmato khamati itthannāmassa bhikkhuno appamattakavissajjakassa sammuti, so tuṇhassa; yassa nakkhamati, so bhāseyya.
‘‘သမ္မတော သင္ဃေန ဣတ္ထန္နာမော ဘိက္ခု အပ္ပမတ္တကဝိသ္သဇ္ဇကော။ ခမတိ သင္ဃသ္သ, တသ္မာ တုဏ္ဟီ , ဧဝမေတံ ဓာရယာမီ’’တိ။
‘‘Sammato saṅghena itthannāmo bhikkhu appamattakavissajjako. Khamati saṅghassa, tasmā tuṇhī , evametaṃ dhārayāmī’’ti.
တေန အပ္ပမတ္တကဝိသ္သဇ္ဇကေန ဘိက္ခုနာ ဧကာ 3 သူစိ ဒာတဗ္ဗာ, သတ္ထကံ ဒာတဗ္ဗံ, ဥပာဟနာ ဒာတဗ္ဗာ, ကာယဗန္ဓနံ ဒာတဗ္ဗံ, အံသဗန္ဓကော ဒာတဗ္ဗော, ပရိသ္သာဝနံ ဒာတဗ္ဗံ, ဓမ္မကရဏော ဒာတဗ္ဗော, ကုသိ ဒာတဗ္ဗာ, အဍ္ဎကုသိ ဒာတဗ္ဗာ, မဏ္ဍလံ ဒာတဗ္ဗံ, အဍ္ဎမဏ္ဍလံ ဒာတဗ္ဗံ, အနုဝာတော ဒာတဗ္ဗော, ပရိဘဏ္ဍံ ဒာတဗ္ဗံ။ သစေ ဟောတိ သင္ဃသ္သ သပ္ပိ ဝာ တေလံ ဝာ မဓု ဝာ ဖာဏိတံ ဝာ, သကိံ ပဋိသာယိတုံ ဒာတဗ္ဗံ။ သစေ ပုနပိ အတ္ထော ဟောတိ, ပုနပိ ဒာတဗ္ဗံ။
Tena appamattakavissajjakena bhikkhunā ekā 4 sūci dātabbā, satthakaṃ dātabbaṃ, upāhanā dātabbā, kāyabandhanaṃ dātabbaṃ, aṃsabandhako dātabbo, parissāvanaṃ dātabbaṃ, dhammakaraṇo dātabbo, kusi dātabbā, aḍḍhakusi dātabbā, maṇḍalaṃ dātabbaṃ, aḍḍhamaṇḍalaṃ dātabbaṃ, anuvāto dātabbo, paribhaṇḍaṃ dātabbaṃ. Sace hoti saṅghassa sappi vā telaṃ vā madhu vā phāṇitaṃ vā, sakiṃ paṭisāyituṃ dātabbaṃ. Sace punapi attho hoti, punapi dātabbaṃ.
Footnotes:
