| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
අප්‌පමත්‌තකවිස්‌සජ්‌ජකසම්‌මුති
Appamattakavissajjakasammuti
328. තෙන ඛො පන සමයෙන සඞ්‌ඝස්‌ස භණ්‌ඩාගාරෙ අප්‌පමත්‌තකො පරික්‌ඛාරො උප්‌පන්‌නො 1 හොති. භගවතො එතමත්‌ථං ආරොචෙසුං. ‘‘අනුජානාමි, භික්‌ඛවෙ, පඤ්‌චහඞ්‌ගෙහි සමන්‌නාගතං භික්‌ඛුං අප්‌පමත්‌තකවිස්‌සජ්‌ජකං සම්‌මන්‌නිතුං – යො න ඡන්‌දාගතිං ගච්‌ඡෙය්‍ය, න දොසාගතිං ගච්‌ඡෙය්‍ය, න මොහාගතිං ගච්‌ඡෙය්‍ය, න භයාගතිං ගච්‌ඡෙය්‍ය, විස්‌සජ්‌ජිතාවිස්‌සජ්‌ජිතඤ්‌ච ජානෙය්‍ය. එවඤ්‌ච පන, භික්‌ඛවෙ, සම්‌මන්‌නිතබ්‌බො. පඨමං භික්‌ඛු යාචිතබ්‌බො, යාචිත්‌වා බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
328. Tena kho pana samayena saṅghassa bhaṇḍāgāre appamattako parikkhāro uppanno 2 hoti. Bhagavato etamatthaṃ ārocesuṃ. ‘‘Anujānāmi, bhikkhave, pañcahaṅgehi samannāgataṃ bhikkhuṃ appamattakavissajjakaṃ sammannituṃ – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, vissajjitāvissajjitañca jāneyya. Evañca pana, bhikkhave, sammannitabbo. Paṭhamaṃ bhikkhu yācitabbo, yācitvā byattena bhikkhunā paṭibalena saṅgho ñāpetabbo –
‘‘සුණාතු මෙ, භන්‌තෙ, සඞ්‌ඝො. යදි සඞ්‌ඝස්‌ස පත්‌තකල්‌ලං, සඞ්‌ඝො ඉත්‌ථන්‌නාමං භික්‌ඛුං අප්‌පමත්‌තකවිස්‌සජ්‌ජකං සම්‌මන්‌නෙය්‍ය. එසා ඤත්‌ති.
‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ appamattakavissajjakaṃ sammanneyya. Esā ñatti.
‘‘සුණාතු මෙ, භන්‌තෙ, සඞ්‌ඝො. සඞ්‌ඝො ඉත්‌ථන්‌නාමං භික්‌ඛුං අප්‌පමත්‌තකවිස්‌සජ්‌ජකං සම්‌මන්‌නති. යස්‌සායස්‌මතො ඛමති ඉත්‌ථන්‌නාමස්‌ස භික්‌ඛුනො අප්‌පමත්‌තකවිස්‌සජ්‌ජකස්‌ස සම්‌මුති, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Saṅgho itthannāmaṃ bhikkhuṃ appamattakavissajjakaṃ sammannati. Yassāyasmato khamati itthannāmassa bhikkhuno appamattakavissajjakassa sammuti, so tuṇhassa; yassa nakkhamati, so bhāseyya.
‘‘සම්‌මතො සඞ්‌ඝෙන ඉත්‌ථන්‌නාමො භික්‌ඛු අප්‌පමත්‌තකවිස්‌සජ්‌ජකො. ඛමති සඞ්‌ඝස්‌ස, තස්‌මා තුණ්‌හී , එවමෙතං ධාරයාමී’’ති.
‘‘Sammato saṅghena itthannāmo bhikkhu appamattakavissajjako. Khamati saṅghassa, tasmā tuṇhī , evametaṃ dhārayāmī’’ti.
තෙන අප්‌පමත්‌තකවිස්‌සජ්‌ජකෙන භික්‌ඛුනා එකා 3 සූචි දාතබ්‌බා, සත්‌ථකං දාතබ්‌බං, උපාහනා දාතබ්‌බා, කායබන්‌ධනං දාතබ්‌බං, අංසබන්‌ධකො දාතබ්‌බො, පරිස්‌සාවනං දාතබ්‌බං, ධම්‌මකරණො දාතබ්‌බො, කුසි දාතබ්‌බා, අඩ්‌ඪකුසි දාතබ්‌බා, මණ්‌ඩලං දාතබ්‌බං, අඩ්‌ඪමණ්‌ඩලං දාතබ්‌බං, අනුවාතො දාතබ්‌බො, පරිභණ්‌ඩං දාතබ්‌බං. සචෙ හොති සඞ්‌ඝස්‌ස සප්‌පි වා තෙලං වා මධු වා ඵාණිතං වා, සකිං පටිසායිතුං දාතබ්‌බං. සචෙ පුනපි අත්‌ථො හොති, පුනපි දාතබ්‌බං.
Tena appamattakavissajjakena bhikkhunā ekā 4 sūci dātabbā, satthakaṃ dātabbaṃ, upāhanā dātabbā, kāyabandhanaṃ dātabbaṃ, aṃsabandhako dātabbo, parissāvanaṃ dātabbaṃ, dhammakaraṇo dātabbo, kusi dātabbā, aḍḍhakusi dātabbā, maṇḍalaṃ dātabbaṃ, aḍḍhamaṇḍalaṃ dātabbaṃ, anuvāto dātabbo, paribhaṇḍaṃ dātabbaṃ. Sace hoti saṅghassa sappi vā telaṃ vā madhu vā phāṇitaṃ vā, sakiṃ paṭisāyituṃ dātabbaṃ. Sace punapi attho hoti, punapi dātabbaṃ.
Footnotes:
