| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. අප්‌පමෙය්‍යසුත්‌තං
3. Appameyyasuttaṃ
116. ‘‘තයොමෙ, භික්‌ඛවෙ, පුග්‌ගලා සන්‌තො සංවිජ්‌ජමානා ලොකස්‌මිං. කතමෙ තයො? සුප්‌පමෙය්‍යො, දුප්‌පමෙය්‍යො, අප්‌පමෙය්‍යො. කතමො ච, භික්‌ඛවෙ, පුග්‌ගලො සුප්‌පමෙය්‍යො? ඉධ, භික්‌ඛවෙ, එකච්‌චො පුග්‌ගලො උද්‌ධතො හොති උන්‌නළො චපලො මුඛරො විකිණ්‌ණවාචො මුට්‌ඨස්‌සති අසම්‌පජානො අසමාහිතො විබ්‌භන්‌තචිත්‌තො පාකතින්‌ද්‍රියො. අයං වුච්‌චති, භික්‌ඛවෙ, පුග්‌ගලො සුප්‌පමෙය්‍යො.
116. ‘‘Tayome, bhikkhave, puggalā santo saṃvijjamānā lokasmiṃ. Katame tayo? Suppameyyo, duppameyyo, appameyyo. Katamo ca, bhikkhave, puggalo suppameyyo? Idha, bhikkhave, ekacco puggalo uddhato hoti unnaḷo capalo mukharo vikiṇṇavāco muṭṭhassati asampajāno asamāhito vibbhantacitto pākatindriyo. Ayaṃ vuccati, bhikkhave, puggalo suppameyyo.
‘‘කතමො ච, භික්‌ඛවෙ, පුග්‌ගලො දුප්‌පමෙය්‍යො? ඉධ, භික්‌ඛවෙ, එකච්‌චො පුග්‌ගලො අනුද්‌ධතො හොති අනුන්‌නළො අචපලො අමුඛරො අවිකිණ්‌ණවාචො උපට්‌ඨිතස්‌සති සම්‌පජානො සමාහිතො එකග්‌ගචිත්‌තො සංවුතින්‌ද්‍රියො. අයං වුච්‌චති, භික්‌ඛවෙ, පුග්‌ගලො දුප්‌පමෙය්‍යො.
‘‘Katamo ca, bhikkhave, puggalo duppameyyo? Idha, bhikkhave, ekacco puggalo anuddhato hoti anunnaḷo acapalo amukharo avikiṇṇavāco upaṭṭhitassati sampajāno samāhito ekaggacitto saṃvutindriyo. Ayaṃ vuccati, bhikkhave, puggalo duppameyyo.
‘‘කතමො ච, භික්‌ඛවෙ, පුග්‌ගලො අප්‌පමෙය්‍යො? ඉධ, භික්‌ඛවෙ, භික්‌ඛු අරහං හොති ඛීණාසවො. අයං වුච්‌චති, භික්‌ඛවෙ, පුග්‌ගලො අප්‌පමෙය්‍යො. ඉමෙ ඛො, භික්‌ඛවෙ, තයො පුග්‌ගලා සන්‌තො සංවිජ්‌ජමානා ලොකස්‌මි’’න්‌ති. තතියං.
‘‘Katamo ca, bhikkhave, puggalo appameyyo? Idha, bhikkhave, bhikkhu arahaṃ hoti khīṇāsavo. Ayaṃ vuccati, bhikkhave, puggalo appameyyo. Ime kho, bhikkhave, tayo puggalā santo saṃvijjamānā lokasmi’’nti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. අප්‌පමෙය්‍යසුත්‌තවණ්‌ණනා • 3. Appameyyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3. අප්‌පමෙය්‍යසුත්‌තවණ්‌ණනා • 3. Appameyyasuttavaṇṇanā
