| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. அப்பமெய்யஸுத்தவண்ணனா
3. Appameyyasuttavaṇṇanā
116. ததியே ஸுகே²ன மேதப்³போ³தி யதா² பரித்தஸ்ஸ உத³கஸ்ஸ ஸுகே²ன பமாணங் க³ய்ஹதி, ஏவமேவ ‘‘உத்³த⁴தோ’’திஆதி³னா யதா²வுத்தேஹி அகு³ணங்கே³ஹி ஸமன்னாக³தஸ்ஸ ஸுகே²ன பமாணங் க³ய்ஹதீதி, ஸுகே²ன மேதப்³போ³. து³க்கே²ன மேதப்³போ³தி யதா² மஹாஸமுத்³த³ஸ்ஸ து³க்கே²ன பமாணங் க³ய்ஹதி, ஏவமேவ ‘‘அனுத்³த⁴தோ’’திஆதி³னா த³ஸ்ஸிதேஹி கு³ணங்கே³ஹி ஸமன்னாக³தஸ்ஸ து³க்கே²ன பமாணங் க³ய்ஹதி, ‘‘அனாகா³மீ நு கோ² கீ²ணாஸவோ நு கோ²’’தி வத்தப்³ப³தங் க³ச்ச²தி, தேனேஸ து³க்கே²ன மேதப்³போ³. பமேதுங் ந ஸக்கோதீதி யதா² ஆகாஸஸ்ஸ ந ஸக்கா பமாணங் க³ஹேதுங், ஏவங் கீ²ணாஸவஸ்ஸ, தேனேஸ பமேதுங் ந ஸக்காதி அப்பமெய்யோ.
116. Tatiye sukhena metabboti yathā parittassa udakassa sukhena pamāṇaṃ gayhati, evameva ‘‘uddhato’’tiādinā yathāvuttehi aguṇaṅgehi samannāgatassa sukhena pamāṇaṃ gayhatīti, sukhena metabbo. Dukkhena metabboti yathā mahāsamuddassa dukkhena pamāṇaṃ gayhati, evameva ‘‘anuddhato’’tiādinā dassitehi guṇaṅgehi samannāgatassa dukkhena pamāṇaṃ gayhati, ‘‘anāgāmī nu kho khīṇāsavo nu kho’’ti vattabbataṃ gacchati, tenesa dukkhena metabbo. Pametuṃ na sakkotīti yathā ākāsassa na sakkā pamāṇaṃ gahetuṃ, evaṃ khīṇāsavassa, tenesa pametuṃ na sakkāti appameyyo.
ஸாராபா⁴வேன துச்ச²த்தா நளோ விய நளோ, மானோதி ஆஹ ‘‘உன்னளோதி உக்³க³தனளோ’’தி, உட்டி²ததுச்ச²மானோதி வுத்தங் ஹோதி. தேனாஹ ‘‘துச்ச²மானங் உக்கி²பித்வா டி²தோதி அத்தோ²’’தி. மனோ ஹி ஸெய்யஸ்ஸ ஸெய்யோதி ஸதி³ஸோதி ச பவத்தியா விஸேஸதோ துச்சோ². சாபல்லேனாதி சபலபா⁴வேன, தண்ஹாலோலுப்பேனாதி அத்தோ². முக²ரோதி முகே²ன ப²ருஸோ, ப²ருஸவாசோதி அத்தோ². விகிண்ணவாசோதி விஸடவசனோ ஸம்ப²ப்பலாபிதாய அபரியந்தவசனோ. தேனாஹ ‘‘அஸஞ்ஞதவசனோ’’தி, தி³வஸம்பி நிரத்த²கவசனங் பலாபீதி வுத்தங் ஹோதி. சித்தேகக்³க³தாரஹிதோதி உபசாரப்பனாஸமாதி⁴ரஹிதோ சண்ட³ஸோதே ப³த்³த⁴னாவா விய அனவட்டி²தகிரியோ. ப⁴ந்தசித்தோதி அனவட்டி²தசித்தோ பண்ணாருள்ஹவாலமிக³ஸதி³ஸோ. விவடிந்த்³ரியோதி ஸங்வராபா⁴வேன கி³ஹிகாலே விய அஸங்வுதசக்கா²தி³இந்த்³ரியோ.
Sārābhāvena tucchattā naḷo viya naḷo, mānoti āha ‘‘unnaḷoti uggatanaḷo’’ti, uṭṭhitatucchamānoti vuttaṃ hoti. Tenāha ‘‘tucchamānaṃ ukkhipitvā ṭhitoti attho’’ti. Mano hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukharoti mukhena pharuso, pharusavācoti attho. Vikiṇṇavācoti visaṭavacano samphappalāpitāya apariyantavacano. Tenāha ‘‘asaññatavacano’’ti, divasampi niratthakavacanaṃ palāpīti vuttaṃ hoti. Cittekaggatārahitoti upacārappanāsamādhirahito caṇḍasote baddhanāvā viya anavaṭṭhitakiriyo. Bhantacittoti anavaṭṭhitacitto paṇṇāruḷhavālamigasadiso. Vivaṭindriyoti saṃvarābhāvena gihikāle viya asaṃvutacakkhādiindriyo.
அப்பமெய்யஸுத்தவண்ணனா நிட்டி²தா.
Appameyyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. அப்பமெய்யஸுத்தங் • 3. Appameyyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. அப்பமெய்யஸுத்தவண்ணனா • 3. Appameyyasuttavaṇṇanā
