| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৩. অপ্পমেয্যসুত্তৰণ্ণনা
3. Appameyyasuttavaṇṇanā
১১৬. ততিযে সুখেন মেতব্বোতি যথা পরিত্তস্স উদকস্স সুখেন পমাণং গয্হতি, এৰমেৰ ‘‘উদ্ধতো’’তিআদিনা যথাৰুত্তেহি অগুণঙ্গেহি সমন্নাগতস্স সুখেন পমাণং গয্হতীতি, সুখেন মেতব্বো। দুক্খেন মেতব্বোতি যথা মহাসমুদ্দস্স দুক্খেন পমাণং গয্হতি, এৰমেৰ ‘‘অনুদ্ধতো’’তিআদিনা দস্সিতেহি গুণঙ্গেহি সমন্নাগতস্স দুক্খেন পমাণং গয্হতি, ‘‘অনাগামী নু খো খীণাসৰো নু খো’’তি ৰত্তব্বতং গচ্ছতি, তেনেস দুক্খেন মেতব্বো। পমেতুং ন সক্কোতীতি যথা আকাসস্স ন সক্কা পমাণং গহেতুং, এৰং খীণাসৰস্স, তেনেস পমেতুং ন সক্কাতি অপ্পমেয্যো।
116. Tatiye sukhena metabboti yathā parittassa udakassa sukhena pamāṇaṃ gayhati, evameva ‘‘uddhato’’tiādinā yathāvuttehi aguṇaṅgehi samannāgatassa sukhena pamāṇaṃ gayhatīti, sukhena metabbo. Dukkhena metabboti yathā mahāsamuddassa dukkhena pamāṇaṃ gayhati, evameva ‘‘anuddhato’’tiādinā dassitehi guṇaṅgehi samannāgatassa dukkhena pamāṇaṃ gayhati, ‘‘anāgāmī nu kho khīṇāsavo nu kho’’ti vattabbataṃ gacchati, tenesa dukkhena metabbo. Pametuṃ na sakkotīti yathā ākāsassa na sakkā pamāṇaṃ gahetuṃ, evaṃ khīṇāsavassa, tenesa pametuṃ na sakkāti appameyyo.
সারাভাৰেন তুচ্ছত্তা নল়ো ৰিয নল়ো, মানোতি আহ ‘‘উন্নল়োতি উগ্গতনল়ো’’তি, উট্ঠিততুচ্ছমানোতি ৰুত্তং হোতি। তেনাহ ‘‘তুচ্ছমানং উক্খিপিত্ৰা ঠিতোতি অত্থো’’তি। মনো হি সেয্যস্স সেয্যোতি সদিসোতি চ পৰত্তিযা ৰিসেসতো তুচ্ছো। চাপল্লেনাতি চপলভাৰেন, তণ্হালোলুপ্পেনাতি অত্থো। মুখরোতি মুখেন ফরুসো, ফরুসৰাচোতি অত্থো। ৰিকিণ্ণৰাচোতি ৰিসটৰচনো সম্ফপ্পলাপিতায অপরিযন্তৰচনো। তেনাহ ‘‘অসঞ্ঞতৰচনো’’তি, দিৰসম্পি নিরত্থকৰচনং পলাপীতি ৰুত্তং হোতি। চিত্তেকগ্গতারহিতোতি উপচারপ্পনাসমাধিরহিতো চণ্ডসোতে বদ্ধনাৰা ৰিয অনৰট্ঠিতকিরিযো। ভন্তচিত্তোতি অনৰট্ঠিতচিত্তো পণ্ণারুল়্হৰালমিগসদিসো। ৰিৰটিন্দ্রিযোতি সংৰরাভাৰেন গিহিকালে ৰিয অসংৰুতচক্খাদিইন্দ্রিযো।
Sārābhāvena tucchattā naḷo viya naḷo, mānoti āha ‘‘unnaḷoti uggatanaḷo’’ti, uṭṭhitatucchamānoti vuttaṃ hoti. Tenāha ‘‘tucchamānaṃ ukkhipitvā ṭhitoti attho’’ti. Mano hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukharoti mukhena pharuso, pharusavācoti attho. Vikiṇṇavācoti visaṭavacano samphappalāpitāya apariyantavacano. Tenāha ‘‘asaññatavacano’’ti, divasampi niratthakavacanaṃ palāpīti vuttaṃ hoti. Cittekaggatārahitoti upacārappanāsamādhirahito caṇḍasote baddhanāvā viya anavaṭṭhitakiriyo. Bhantacittoti anavaṭṭhitacitto paṇṇāruḷhavālamigasadiso. Vivaṭindriyoti saṃvarābhāvena gihikāle viya asaṃvutacakkhādiindriyo.
অপ্পমেয্যসুত্তৰণ্ণনা নিট্ঠিতা।
Appameyyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৩. অপ্পমেয্যসুত্তং • 3. Appameyyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩. অপ্পমেয্যসুত্তৰণ্ণনা • 3. Appameyyasuttavaṇṇanā
