| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៣. អប្បមេយ្យសុត្តវណ្ណនា
3. Appameyyasuttavaṇṇanā
១១៦. តតិយេ សុខេន មេតព្ពោតិ យថា បរិត្តស្ស ឧទកស្ស សុខេន បមាណំ គយ្ហតិ, ឯវមេវ ‘‘ឧទ្ធតោ’’តិអាទិនា យថាវុត្តេហិ អគុណង្គេហិ សមន្នាគតស្ស សុខេន បមាណំ គយ្ហតីតិ, សុខេន មេតព្ពោ។ ទុក្ខេន មេតព្ពោតិ យថា មហាសមុទ្ទស្ស ទុក្ខេន បមាណំ គយ្ហតិ, ឯវមេវ ‘‘អនុទ្ធតោ’’តិអាទិនា ទស្សិតេហិ គុណង្គេហិ សមន្នាគតស្ស ទុក្ខេន បមាណំ គយ្ហតិ, ‘‘អនាគាមី នុ ខោ ខីណាសវោ នុ ខោ’’តិ វត្តព្ពតំ គច្ឆតិ, តេនេស ទុក្ខេន មេតព្ពោ។ បមេតុំ ន សក្កោតីតិ យថា អាកាសស្ស ន សក្កា បមាណំ គហេតុំ, ឯវំ ខីណាសវស្ស, តេនេស បមេតុំ ន សក្កាតិ អប្បមេយ្យោ។
116. Tatiye sukhena metabboti yathā parittassa udakassa sukhena pamāṇaṃ gayhati, evameva ‘‘uddhato’’tiādinā yathāvuttehi aguṇaṅgehi samannāgatassa sukhena pamāṇaṃ gayhatīti, sukhena metabbo. Dukkhena metabboti yathā mahāsamuddassa dukkhena pamāṇaṃ gayhati, evameva ‘‘anuddhato’’tiādinā dassitehi guṇaṅgehi samannāgatassa dukkhena pamāṇaṃ gayhati, ‘‘anāgāmī nu kho khīṇāsavo nu kho’’ti vattabbataṃ gacchati, tenesa dukkhena metabbo. Pametuṃ na sakkotīti yathā ākāsassa na sakkā pamāṇaṃ gahetuṃ, evaṃ khīṇāsavassa, tenesa pametuṃ na sakkāti appameyyo.
សារាភាវេន តុច្ឆត្តា នឡោ វិយ នឡោ, មានោតិ អាហ ‘‘ឧន្នឡោតិ ឧគ្គតនឡោ’’តិ, ឧដ្ឋិតតុច្ឆមានោតិ វុត្តំ ហោតិ។ តេនាហ ‘‘តុច្ឆមានំ ឧក្ខិបិត្វា ឋិតោតិ អត្ថោ’’តិ។ មនោ ហិ សេយ្យស្ស សេយ្យោតិ សទិសោតិ ច បវត្តិយា វិសេសតោ តុច្ឆោ។ ចាបល្លេនាតិ ចបលភាវេន, តណ្ហាលោលុប្បេនាតិ អត្ថោ។ មុខរោតិ មុខេន ផរុសោ, ផរុសវាចោតិ អត្ថោ។ វិកិណ្ណវាចោតិ វិសដវចនោ សម្ផប្បលាបិតាយ អបរិយន្តវចនោ។ តេនាហ ‘‘អសញ្ញតវចនោ’’តិ, ទិវសម្បិ និរត្ថកវចនំ បលាបីតិ វុត្តំ ហោតិ។ ចិត្តេកគ្គតារហិតោតិ ឧបចារប្បនាសមាធិរហិតោ ចណ្ឌសោតេ ពទ្ធនាវា វិយ អនវដ្ឋិតកិរិយោ។ ភន្តចិត្តោតិ អនវដ្ឋិតចិត្តោ បណ្ណារុឡ្ហវាលមិគសទិសោ។ វិវដិន្ទ្រិយោតិ សំវរាភាវេន គិហិកាលេ វិយ អសំវុតចក្ខាទិឥន្ទ្រិយោ។
Sārābhāvena tucchattā naḷo viya naḷo, mānoti āha ‘‘unnaḷoti uggatanaḷo’’ti, uṭṭhitatucchamānoti vuttaṃ hoti. Tenāha ‘‘tucchamānaṃ ukkhipitvā ṭhitoti attho’’ti. Mano hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukharoti mukhena pharuso, pharusavācoti attho. Vikiṇṇavācoti visaṭavacano samphappalāpitāya apariyantavacano. Tenāha ‘‘asaññatavacano’’ti, divasampi niratthakavacanaṃ palāpīti vuttaṃ hoti. Cittekaggatārahitoti upacārappanāsamādhirahito caṇḍasote baddhanāvā viya anavaṭṭhitakiriyo. Bhantacittoti anavaṭṭhitacitto paṇṇāruḷhavālamigasadiso. Vivaṭindriyoti saṃvarābhāvena gihikāle viya asaṃvutacakkhādiindriyo.
អប្បមេយ្យសុត្តវណ្ណនា និដ្ឋិតា។
Appameyyasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៣. អប្បមេយ្យសុត្តំ • 3. Appameyyasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៣. អប្បមេយ្យសុត្តវណ្ណនា • 3. Appameyyasuttavaṇṇanā
