| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၃. အပ္ပမေယ္ယသုတ္တဝဏ္ဏနာ
3. Appameyyasuttavaṇṇanā
၁၁၆. တတိယေ သုခေန မေတဗ္ဗောတိ ယထာ ပရိတ္တသ္သ ဥဒကသ္သ သုခေန ပမာဏံ ဂယ္ဟတိ, ဧဝမေဝ ‘‘ဥဒ္ဓတော’’တိအာဒိနာ ယထာဝုတ္တေဟိ အဂုဏင္ဂေဟိ သမန္နာဂတသ္သ သုခေန ပမာဏံ ဂယ္ဟတီတိ, သုခေန မေတဗ္ဗော။ ဒုက္ခေန မေတဗ္ဗောတိ ယထာ မဟာသမုဒ္ဒသ္သ ဒုက္ခေန ပမာဏံ ဂယ္ဟတိ, ဧဝမေဝ ‘‘အနုဒ္ဓတော’’တိအာဒိနာ ဒသ္သိတေဟိ ဂုဏင္ဂေဟိ သမန္နာဂတသ္သ ဒုက္ခေန ပမာဏံ ဂယ္ဟတိ, ‘‘အနာဂာမီ နု ခော ခီဏာသဝော နု ခော’’တိ ဝတ္တဗ္ဗတံ ဂစ္ဆတိ, တေနေသ ဒုက္ခေန မေတဗ္ဗော။ ပမေတုံ န သက္ကောတီတိ ယထာ အာကာသသ္သ န သက္ကာ ပမာဏံ ဂဟေတုံ, ဧဝံ ခီဏာသဝသ္သ, တေနေသ ပမေတုံ န သက္ကာတိ အပ္ပမေယ္ယော။
116. Tatiye sukhena metabboti yathā parittassa udakassa sukhena pamāṇaṃ gayhati, evameva ‘‘uddhato’’tiādinā yathāvuttehi aguṇaṅgehi samannāgatassa sukhena pamāṇaṃ gayhatīti, sukhena metabbo. Dukkhena metabboti yathā mahāsamuddassa dukkhena pamāṇaṃ gayhati, evameva ‘‘anuddhato’’tiādinā dassitehi guṇaṅgehi samannāgatassa dukkhena pamāṇaṃ gayhati, ‘‘anāgāmī nu kho khīṇāsavo nu kho’’ti vattabbataṃ gacchati, tenesa dukkhena metabbo. Pametuṃ na sakkotīti yathā ākāsassa na sakkā pamāṇaṃ gahetuṃ, evaṃ khīṇāsavassa, tenesa pametuṃ na sakkāti appameyyo.
သာရာဘာဝေန တုစ္ဆတ္တာ နဠော ဝိယ နဠော, မာနောတိ အာဟ ‘‘ဥန္နဠောတိ ဥဂ္ဂတနဠော’’တိ, ဥဋ္ဌိတတုစ္ဆမာနောတိ ဝုတ္တံ ဟောတိ။ တေနာဟ ‘‘တုစ္ဆမာနံ ဥက္ခိပိတ္ဝာ ဌိတောတိ အတ္ထော’’တိ။ မနော ဟိ သေယ္ယသ္သ သေယ္ယောတိ သဒိသောတိ စ ပဝတ္တိယာ ဝိသေသတော တုစ္ဆော။ စာပလ္လေနာတိ စပလဘာဝေန, တဏ္ဟာလောလုပ္ပေနာတိ အတ္ထော။ မုခရောတိ မုခေန ဖရုသော, ဖရုသဝာစောတိ အတ္ထော။ ဝိကိဏ္ဏဝာစောတိ ဝိသဋဝစနော သမ္ဖပ္ပလာပိတာယ အပရိယန္တဝစနော။ တေနာဟ ‘‘အသညတဝစနော’’တိ, ဒိဝသမ္ပိ နိရတ္ထကဝစနံ ပလာပီတိ ဝုတ္တံ ဟောတိ။ စိတ္တေကဂ္ဂတာရဟိတောတိ ဥပစာရပ္ပနာသမာဓိရဟိတော စဏ္ဍသောတေ ဗဒ္ဓနာဝာ ဝိယ အနဝဋ္ဌိတကိရိယော။ ဘန္တစိတ္တောတိ အနဝဋ္ဌိတစိတ္တော ပဏ္ဏာရုဠ္ဟဝာလမိဂသဒိသော။ ဝိဝဋိန္ဒ္ရိယောတိ သံဝရာဘာဝေန ဂိဟိကာလေ ဝိယ အသံဝုတစက္ခာဒိဣန္ဒ္ရိယော။
Sārābhāvena tucchattā naḷo viya naḷo, mānoti āha ‘‘unnaḷoti uggatanaḷo’’ti, uṭṭhitatucchamānoti vuttaṃ hoti. Tenāha ‘‘tucchamānaṃ ukkhipitvā ṭhitoti attho’’ti. Mano hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukharoti mukhena pharuso, pharusavācoti attho. Vikiṇṇavācoti visaṭavacano samphappalāpitāya apariyantavacano. Tenāha ‘‘asaññatavacano’’ti, divasampi niratthakavacanaṃ palāpīti vuttaṃ hoti. Cittekaggatārahitoti upacārappanāsamādhirahito caṇḍasote baddhanāvā viya anavaṭṭhitakiriyo. Bhantacittoti anavaṭṭhitacitto paṇṇāruḷhavālamigasadiso. Vivaṭindriyoti saṃvarābhāvena gihikāle viya asaṃvutacakkhādiindriyo.
အပ္ပမေယ္ယသုတ္တဝဏ္ဏနာ နိဋ္ဌိတာ။
Appameyyasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. အပ္ပမေယ္ယသုတ္တံ • 3. Appameyyasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. အပ္ပမေယ္ယသုတ္တဝဏ္ဏနာ • 3. Appameyyasuttavaṇṇanā
