| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೩. ಅಪ್ಪಮೇಯ್ಯಸುತ್ತವಣ್ಣನಾ
3. Appameyyasuttavaṇṇanā
೧೧೬. ತತಿಯೇ ಸುಖೇನ ಮೇತಬ್ಬೋತಿ ಯಥಾ ಪರಿತ್ತಸ್ಸ ಉದಕಸ್ಸ ಸುಖೇನ ಪಮಾಣಂ ಗಯ್ಹತಿ, ಏವಮೇವ ‘‘ಉದ್ಧತೋ’’ತಿಆದಿನಾ ಯಥಾವುತ್ತೇಹಿ ಅಗುಣಙ್ಗೇಹಿ ಸಮನ್ನಾಗತಸ್ಸ ಸುಖೇನ ಪಮಾಣಂ ಗಯ್ಹತೀತಿ, ಸುಖೇನ ಮೇತಬ್ಬೋ। ದುಕ್ಖೇನ ಮೇತಬ್ಬೋತಿ ಯಥಾ ಮಹಾಸಮುದ್ದಸ್ಸ ದುಕ್ಖೇನ ಪಮಾಣಂ ಗಯ್ಹತಿ, ಏವಮೇವ ‘‘ಅನುದ್ಧತೋ’’ತಿಆದಿನಾ ದಸ್ಸಿತೇಹಿ ಗುಣಙ್ಗೇಹಿ ಸಮನ್ನಾಗತಸ್ಸ ದುಕ್ಖೇನ ಪಮಾಣಂ ಗಯ್ಹತಿ, ‘‘ಅನಾಗಾಮೀ ನು ಖೋ ಖೀಣಾಸವೋ ನು ಖೋ’’ತಿ ವತ್ತಬ್ಬತಂ ಗಚ್ಛತಿ, ತೇನೇಸ ದುಕ್ಖೇನ ಮೇತಬ್ಬೋ। ಪಮೇತುಂ ನ ಸಕ್ಕೋತೀತಿ ಯಥಾ ಆಕಾಸಸ್ಸ ನ ಸಕ್ಕಾ ಪಮಾಣಂ ಗಹೇತುಂ, ಏವಂ ಖೀಣಾಸವಸ್ಸ, ತೇನೇಸ ಪಮೇತುಂ ನ ಸಕ್ಕಾತಿ ಅಪ್ಪಮೇಯ್ಯೋ।
116. Tatiye sukhena metabboti yathā parittassa udakassa sukhena pamāṇaṃ gayhati, evameva ‘‘uddhato’’tiādinā yathāvuttehi aguṇaṅgehi samannāgatassa sukhena pamāṇaṃ gayhatīti, sukhena metabbo. Dukkhena metabboti yathā mahāsamuddassa dukkhena pamāṇaṃ gayhati, evameva ‘‘anuddhato’’tiādinā dassitehi guṇaṅgehi samannāgatassa dukkhena pamāṇaṃ gayhati, ‘‘anāgāmī nu kho khīṇāsavo nu kho’’ti vattabbataṃ gacchati, tenesa dukkhena metabbo. Pametuṃ na sakkotīti yathā ākāsassa na sakkā pamāṇaṃ gahetuṃ, evaṃ khīṇāsavassa, tenesa pametuṃ na sakkāti appameyyo.
ಸಾರಾಭಾವೇನ ತುಚ್ಛತ್ತಾ ನಳೋ ವಿಯ ನಳೋ, ಮಾನೋತಿ ಆಹ ‘‘ಉನ್ನಳೋತಿ ಉಗ್ಗತನಳೋ’’ತಿ, ಉಟ್ಠಿತತುಚ್ಛಮಾನೋತಿ ವುತ್ತಂ ಹೋತಿ। ತೇನಾಹ ‘‘ತುಚ್ಛಮಾನಂ ಉಕ್ಖಿಪಿತ್ವಾ ಠಿತೋತಿ ಅತ್ಥೋ’’ತಿ। ಮನೋ ಹಿ ಸೇಯ್ಯಸ್ಸ ಸೇಯ್ಯೋತಿ ಸದಿಸೋತಿ ಚ ಪವತ್ತಿಯಾ ವಿಸೇಸತೋ ತುಚ್ಛೋ। ಚಾಪಲ್ಲೇನಾತಿ ಚಪಲಭಾವೇನ, ತಣ್ಹಾಲೋಲುಪ್ಪೇನಾತಿ ಅತ್ಥೋ। ಮುಖರೋತಿ ಮುಖೇನ ಫರುಸೋ, ಫರುಸವಾಚೋತಿ ಅತ್ಥೋ। ವಿಕಿಣ್ಣವಾಚೋತಿ ವಿಸಟವಚನೋ ಸಮ್ಫಪ್ಪಲಾಪಿತಾಯ ಅಪರಿಯನ್ತವಚನೋ। ತೇನಾಹ ‘‘ಅಸಞ್ಞತವಚನೋ’’ತಿ, ದಿವಸಮ್ಪಿ ನಿರತ್ಥಕವಚನಂ ಪಲಾಪೀತಿ ವುತ್ತಂ ಹೋತಿ। ಚಿತ್ತೇಕಗ್ಗತಾರಹಿತೋತಿ ಉಪಚಾರಪ್ಪನಾಸಮಾಧಿರಹಿತೋ ಚಣ್ಡಸೋತೇ ಬದ್ಧನಾವಾ ವಿಯ ಅನವಟ್ಠಿತಕಿರಿಯೋ। ಭನ್ತಚಿತ್ತೋತಿ ಅನವಟ್ಠಿತಚಿತ್ತೋ ಪಣ್ಣಾರುಳ್ಹವಾಲಮಿಗಸದಿಸೋ। ವಿವಟಿನ್ದ್ರಿಯೋತಿ ಸಂವರಾಭಾವೇನ ಗಿಹಿಕಾಲೇ ವಿಯ ಅಸಂವುತಚಕ್ಖಾದಿಇನ್ದ್ರಿಯೋ।
Sārābhāvena tucchattā naḷo viya naḷo, mānoti āha ‘‘unnaḷoti uggatanaḷo’’ti, uṭṭhitatucchamānoti vuttaṃ hoti. Tenāha ‘‘tucchamānaṃ ukkhipitvā ṭhitoti attho’’ti. Mano hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukharoti mukhena pharuso, pharusavācoti attho. Vikiṇṇavācoti visaṭavacano samphappalāpitāya apariyantavacano. Tenāha ‘‘asaññatavacano’’ti, divasampi niratthakavacanaṃ palāpīti vuttaṃ hoti. Cittekaggatārahitoti upacārappanāsamādhirahito caṇḍasote baddhanāvā viya anavaṭṭhitakiriyo. Bhantacittoti anavaṭṭhitacitto paṇṇāruḷhavālamigasadiso. Vivaṭindriyoti saṃvarābhāvena gihikāle viya asaṃvutacakkhādiindriyo.
ಅಪ್ಪಮೇಯ್ಯಸುತ್ತವಣ್ಣನಾ ನಿಟ್ಠಿತಾ।
Appameyyasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೩. ಅಪ್ಪಮೇಯ್ಯಸುತ್ತಂ • 3. Appameyyasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೩. ಅಪ್ಪಮೇಯ್ಯಸುತ್ತವಣ್ಣನಾ • 3. Appameyyasuttavaṇṇanā
