| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੩. ਅਪ੍ਪਮੇਯ੍ਯਸੁਤ੍ਤવਣ੍ਣਨਾ
3. Appameyyasuttavaṇṇanā
੧੧੬. ਤਤਿਯੇ ਸੁਖੇਨ ਮੇਤਬ੍ਬੋਤਿ ਯਥਾ ਪਰਿਤ੍ਤਸ੍ਸ ਉਦਕਸ੍ਸ ਸੁਖੇਨ ਪਮਾਣਂ ਗਯ੍ਹਤਿ, ਏવਮੇવ ‘‘ਉਦ੍ਧਤੋ’’ਤਿਆਦਿਨਾ ਯਥਾવੁਤ੍ਤੇਹਿ ਅਗੁਣਙ੍ਗੇਹਿ ਸਮਨ੍ਨਾਗਤਸ੍ਸ ਸੁਖੇਨ ਪਮਾਣਂ ਗਯ੍ਹਤੀਤਿ, ਸੁਖੇਨ ਮੇਤਬ੍ਬੋ। ਦੁਕ੍ਖੇਨ ਮੇਤਬ੍ਬੋਤਿ ਯਥਾ ਮਹਾਸਮੁਦ੍ਦਸ੍ਸ ਦੁਕ੍ਖੇਨ ਪਮਾਣਂ ਗਯ੍ਹਤਿ, ਏવਮੇવ ‘‘ਅਨੁਦ੍ਧਤੋ’’ਤਿਆਦਿਨਾ ਦਸ੍ਸਿਤੇਹਿ ਗੁਣਙ੍ਗੇਹਿ ਸਮਨ੍ਨਾਗਤਸ੍ਸ ਦੁਕ੍ਖੇਨ ਪਮਾਣਂ ਗਯ੍ਹਤਿ, ‘‘ਅਨਾਗਾਮੀ ਨੁ ਖੋ ਖੀਣਾਸવੋ ਨੁ ਖੋ’’ਤਿ વਤ੍ਤਬ੍ਬਤਂ ਗਚ੍ਛਤਿ, ਤੇਨੇਸ ਦੁਕ੍ਖੇਨ ਮੇਤਬ੍ਬੋ। ਪਮੇਤੁਂ ਨ ਸਕ੍ਕੋਤੀਤਿ ਯਥਾ ਆਕਾਸਸ੍ਸ ਨ ਸਕ੍ਕਾ ਪਮਾਣਂ ਗਹੇਤੁਂ, ਏવਂ ਖੀਣਾਸવਸ੍ਸ, ਤੇਨੇਸ ਪਮੇਤੁਂ ਨ ਸਕ੍ਕਾਤਿ ਅਪ੍ਪਮੇਯ੍ਯੋ।
116. Tatiye sukhena metabboti yathā parittassa udakassa sukhena pamāṇaṃ gayhati, evameva ‘‘uddhato’’tiādinā yathāvuttehi aguṇaṅgehi samannāgatassa sukhena pamāṇaṃ gayhatīti, sukhena metabbo. Dukkhena metabboti yathā mahāsamuddassa dukkhena pamāṇaṃ gayhati, evameva ‘‘anuddhato’’tiādinā dassitehi guṇaṅgehi samannāgatassa dukkhena pamāṇaṃ gayhati, ‘‘anāgāmī nu kho khīṇāsavo nu kho’’ti vattabbataṃ gacchati, tenesa dukkhena metabbo. Pametuṃ na sakkotīti yathā ākāsassa na sakkā pamāṇaṃ gahetuṃ, evaṃ khīṇāsavassa, tenesa pametuṃ na sakkāti appameyyo.
ਸਾਰਾਭਾવੇਨ ਤੁਚ੍ਛਤ੍ਤਾ ਨਲ਼ੋ વਿਯ ਨਲ਼ੋ, ਮਾਨੋਤਿ ਆਹ ‘‘ਉਨ੍ਨਲ਼ੋਤਿ ਉਗ੍ਗਤਨਲ਼ੋ’’ਤਿ, ਉਟ੍ਠਿਤਤੁਚ੍ਛਮਾਨੋਤਿ વੁਤ੍ਤਂ ਹੋਤਿ। ਤੇਨਾਹ ‘‘ਤੁਚ੍ਛਮਾਨਂ ਉਕ੍ਖਿਪਿਤ੍વਾ ਠਿਤੋਤਿ ਅਤ੍ਥੋ’’ਤਿ। ਮਨੋ ਹਿ ਸੇਯ੍ਯਸ੍ਸ ਸੇਯ੍ਯੋਤਿ ਸਦਿਸੋਤਿ ਚ ਪવਤ੍ਤਿਯਾ વਿਸੇਸਤੋ ਤੁਚ੍ਛੋ। ਚਾਪਲ੍ਲੇਨਾਤਿ ਚਪਲਭਾવੇਨ, ਤਣ੍ਹਾਲੋਲੁਪ੍ਪੇਨਾਤਿ ਅਤ੍ਥੋ। ਮੁਖਰੋਤਿ ਮੁਖੇਨ ਫਰੁਸੋ, ਫਰੁਸવਾਚੋਤਿ ਅਤ੍ਥੋ। વਿਕਿਣ੍ਣવਾਚੋਤਿ વਿਸਟવਚਨੋ ਸਮ੍ਫਪ੍ਪਲਾਪਿਤਾਯ ਅਪਰਿਯਨ੍ਤવਚਨੋ। ਤੇਨਾਹ ‘‘ਅਸਞ੍ਞਤવਚਨੋ’’ਤਿ, ਦਿવਸਮ੍ਪਿ ਨਿਰਤ੍ਥਕવਚਨਂ ਪਲਾਪੀਤਿ વੁਤ੍ਤਂ ਹੋਤਿ। ਚਿਤ੍ਤੇਕਗ੍ਗਤਾਰਹਿਤੋਤਿ ਉਪਚਾਰਪ੍ਪਨਾਸਮਾਧਿਰਹਿਤੋ ਚਣ੍ਡਸੋਤੇ ਬਦ੍ਧਨਾવਾ વਿਯ ਅਨવਟ੍ਠਿਤਕਿਰਿਯੋ। ਭਨ੍ਤਚਿਤ੍ਤੋਤਿ ਅਨવਟ੍ਠਿਤਚਿਤ੍ਤੋ ਪਣ੍ਣਾਰੁਲ਼੍ਹવਾਲਮਿਗਸਦਿਸੋ। વਿવਟਿਨ੍ਦ੍ਰਿਯੋਤਿ ਸਂવਰਾਭਾવੇਨ ਗਿਹਿਕਾਲੇ વਿਯ ਅਸਂવੁਤਚਕ੍ਖਾਦਿਇਨ੍ਦ੍ਰਿਯੋ।
Sārābhāvena tucchattā naḷo viya naḷo, mānoti āha ‘‘unnaḷoti uggatanaḷo’’ti, uṭṭhitatucchamānoti vuttaṃ hoti. Tenāha ‘‘tucchamānaṃ ukkhipitvā ṭhitoti attho’’ti. Mano hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukharoti mukhena pharuso, pharusavācoti attho. Vikiṇṇavācoti visaṭavacano samphappalāpitāya apariyantavacano. Tenāha ‘‘asaññatavacano’’ti, divasampi niratthakavacanaṃ palāpīti vuttaṃ hoti. Cittekaggatārahitoti upacārappanāsamādhirahito caṇḍasote baddhanāvā viya anavaṭṭhitakiriyo. Bhantacittoti anavaṭṭhitacitto paṇṇāruḷhavālamigasadiso. Vivaṭindriyoti saṃvarābhāvena gihikāle viya asaṃvutacakkhādiindriyo.
ਅਪ੍ਪਮੇਯ੍ਯਸੁਤ੍ਤવਣ੍ਣਨਾ ਨਿਟ੍ਠਿਤਾ।
Appameyyasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੩. ਅਪ੍ਪਮੇਯ੍ਯਸੁਤ੍ਤਂ • 3. Appameyyasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੩. ਅਪ੍ਪਮੇਯ੍ਯਸੁਤ੍ਤવਣ੍ਣਨਾ • 3. Appameyyasuttavaṇṇanā
