| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. அப்பஸ்ஸுதஸுத்தவண்ணனா
6. Appassutasuttavaṇṇanā
6. ச²ட்டே² அனுபபன்னோதி அனுபாக³தோ. ஸுத்தந்திஆதீ³ஸு உப⁴தோவிப⁴ங்க³னித்³தே³ஸக²ந்த⁴கபரிவாரஸுத்தனிபாதமங்க³லஸுத்தரதனஸுத்த- நாளகஸுத்ததுவடகஸுத்தானி, அஞ்ஞம்பி ச ஸுத்தனாமகங் ததா²க³தவசனங் ஸுத்தந்தி வேதி³தப்³ப³ங். ஸப்³ப³ம்பி ஸகா³த²கங் ஸுத்தங் கெ³ய்யந்தி வேதி³தப்³ப³ங், விஸேஸேன ஸங்யுத்தகே ஸகலோபி ஸகா³தா²வக்³கோ³. ஸகலம்பி அபி⁴த⁴ம்மபிடகங், நிக்³கா³த²கஸுத்தங், யஞ்ச அஞ்ஞம்பி அட்ட²ஹி அங்கே³ஹி அஸங்க³ஹிதங் பு³த்³த⁴வசனங், தங் வெய்யாகரணந்தி வேதி³தப்³ப³ங். த⁴ம்மபத³-தே²ரகா³தா²-தே²ரிகா³தா² ஸுத்தனிபாதே நோஸுத்தனாமிகா ஸுத்³தி⁴ககா³தா² ச கா³தா²தி வேதி³தப்³பா³. ஸோமனஸ்ஸஞாணமயிககா³தா²படிஸங்யுத்தா த்³வேஅஸீதி ஸுத்தந்தா உதா³னந்தி வேதி³தப்³பா³. ‘‘வுத்தஞ்ஹேதங் ப⁴க³வதா’’திஆதி³னயப்பவத்தா த³ஸுத்தரஸதஸுத்தந்தா இதிவுத்தகந்தி வேதி³தப்³பா³. அபண்ணகஜாதகாதீ³னி பஞ்ஞாஸாதி⁴கானி பஞ்ச ஜாதகஸதானி ஜாதகந்தி வேதி³தப்³பா³னி. ‘‘சத்தாரோமே, பி⁴க்க²வே, அச்ச²ரியா அப்³பு⁴தா த⁴ம்மா ஆனந்தே³’’திஆதி³னயப்பவத்தா ஸப்³பே³பி அச்ச²ரியஅப்³பு⁴தத⁴ம்மபடிஸங்யுத்தா ஸுத்தந்தா அப்³பு⁴தத⁴ம்மந்தி வேதி³தப்³பா³. சூளவேத³ல்லமஹாவேத³ல்லஸம்மாதி³ட்டி²ஸக்கபஞ்ஹஸங்கா²ரபா⁴ஜனியமஹாபுண்ணமஸுத்தாத³யோ ஸப்³பே³பி வேத³ஞ்ச துட்டி²ஞ்ச லத்³தா⁴ லத்³தா⁴ புச்சி²தா ஸுத்தந்தா வேத³ல்லந்தி வேதி³தப்³பா³. ந அத்த²மஞ்ஞாய ந த⁴ம்மமஞ்ஞாயாதி அட்ட²கத²ஞ்ச பாளிஞ்ச அஜானித்வா. த⁴ம்மானுத⁴ம்மப்படிபன்னோதி நவலோகுத்தரத⁴ம்மஸ்ஸ அனுரூபத⁴ம்மங் ஸஹஸீலங் புப்³ப³பா⁴க³படிபத³ங் ந படிபன்னோ ஹோதி. இமினா உபாயேன ஸப்³ப³வாரேஸு அத்தோ² வேதி³தப்³போ³. பட²மவாரே பனெத்த² அப்பஸ்ஸுதது³ஸ்ஸீலோ கதி²தோ, து³தியே அப்பஸ்ஸுதகீ²ணாஸவோ, ததியே ப³ஹுஸ்ஸுதது³ஸ்ஸீலோ, சதுத்தே² ப³ஹுஸ்ஸுதகீ²ணாஸவோ.
6. Chaṭṭhe anupapannoti anupāgato. Suttantiādīsu ubhatovibhaṅganiddesakhandhakaparivārasuttanipātamaṅgalasuttaratanasutta- nāḷakasuttatuvaṭakasuttāni, aññampi ca suttanāmakaṃ tathāgatavacanaṃ suttanti veditabbaṃ. Sabbampi sagāthakaṃ suttaṃ geyyanti veditabbaṃ, visesena saṃyuttake sakalopi sagāthāvaggo. Sakalampi abhidhammapiṭakaṃ, niggāthakasuttaṃ, yañca aññampi aṭṭhahi aṅgehi asaṅgahitaṃ buddhavacanaṃ, taṃ veyyākaraṇanti veditabbaṃ. Dhammapada-theragāthā-therigāthā suttanipāte nosuttanāmikā suddhikagāthā ca gāthāti veditabbā. Somanassañāṇamayikagāthāpaṭisaṃyuttā dveasīti suttantā udānanti veditabbā. ‘‘Vuttañhetaṃ bhagavatā’’tiādinayappavattā dasuttarasatasuttantā itivuttakanti veditabbā. Apaṇṇakajātakādīni paññāsādhikāni pañca jātakasatāni jātakanti veditabbāni. ‘‘Cattārome, bhikkhave, acchariyā abbhutā dhammā ānande’’tiādinayappavattā sabbepi acchariyaabbhutadhammapaṭisaṃyuttā suttantā abbhutadhammanti veditabbā. Cūḷavedallamahāvedallasammādiṭṭhisakkapañhasaṅkhārabhājaniyamahāpuṇṇamasuttādayo sabbepi vedañca tuṭṭhiñca laddhā laddhā pucchitā suttantā vedallanti veditabbā. Na atthamaññāya na dhammamaññāyāti aṭṭhakathañca pāḷiñca ajānitvā. Dhammānudhammappaṭipannoti navalokuttaradhammassa anurūpadhammaṃ sahasīlaṃ pubbabhāgapaṭipadaṃ na paṭipanno hoti. Iminā upāyena sabbavāresu attho veditabbo. Paṭhamavāre panettha appassutadussīlo kathito, dutiye appassutakhīṇāsavo, tatiye bahussutadussīlo, catutthe bahussutakhīṇāsavo.
ஸீலேஸு அஸமாஹிதோதி ஸீலேஸு அபரிபூரகாரீ. ஸீலதோ ச ஸுதேன சாதி ஸீலபா⁴கே³ன ச ஸுதபா⁴கே³ன ச ‘‘அயங் து³ஸ்ஸீலோ அப்பஸ்ஸுதோ’’தி ஏவங் தங் க³ரஹந்தீதி அத்தோ². தஸ்ஸ ஸம்பஜ்ஜதே ஸுதந்தி தஸ்ஸ புக்³க³லஸ்ஸ யஸ்மா தேன ஸுதேன ஸுதகிச்சங் கதங், தஸ்மா தஸ்ஸ ஸுதங் ஸம்பஜ்ஜதி நாம. நாஸ்ஸ ஸம்பஜ்ஜதேதி ஸுதகிச்சஸ்ஸ அகதத்தா ந ஸம்பஜ்ஜதி. த⁴ம்மத⁴ரந்தி ஸுதத⁴ம்மானங் ஆதா⁴ரபூ⁴தங். ஸப்பஞ்ஞந்தி ஸுபஞ்ஞங். நெக்க²ங் ஜம்போ³னத³ஸ்ஸேவாதி ஜம்பு³னத³ங் வுச்சதி ஜாதிஸுவண்ணங், தஸ்ஸ ஜம்பு³னத³ஸ்ஸ நெக்க²ங் விய, பஞ்சஸுவண்ணபரிமாணங் ஸுவண்ணக⁴டிகங் வியாதி அத்தோ².
Sīlesuasamāhitoti sīlesu aparipūrakārī. Sīlato ca sutena cāti sīlabhāgena ca sutabhāgena ca ‘‘ayaṃ dussīlo appassuto’’ti evaṃ taṃ garahantīti attho. Tassa sampajjate sutanti tassa puggalassa yasmā tena sutena sutakiccaṃ kataṃ, tasmā tassa sutaṃ sampajjati nāma. Nāssa sampajjateti sutakiccassa akatattā na sampajjati. Dhammadharanti sutadhammānaṃ ādhārabhūtaṃ. Sappaññanti supaññaṃ. Nekkhaṃ jambonadassevāti jambunadaṃ vuccati jātisuvaṇṇaṃ, tassa jambunadassa nekkhaṃ viya, pañcasuvaṇṇaparimāṇaṃ suvaṇṇaghaṭikaṃ viyāti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. அப்பஸ்ஸுதஸுத்தங் • 6. Appassutasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. அப்பஸ்ஸுதஸுத்தவண்ணனா • 6. Appassutasuttavaṇṇanā
