| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. அப்பஸ்ஸுதஸுத்தவண்ணனா
6. Appassutasuttavaṇṇanā
6. ச²ட்டே² அப்பகங் ஸுதங் ஹோதீதி நவங்க³ஸத்து²ஸாஸனே கிஞ்சிதே³வ ஸுதங் ஹோதி. ததே³வ நவங்க³ஸத்து²ஸாஸனங் த³ஸ்ஸேதுங் ‘‘ஸுத்தங் கெ³ய்ய’’ந்திஆதி³ வுத்தங். தத்த² ஸுத்தாதீ³னி விப⁴ஜித்வா த³ஸ்ஸெந்தோ ‘‘உப⁴தோவிப⁴ங்க³னித்³தே³ஸக்க²ந்த⁴கபரிவாரா’’திஆதி³மாஹ. கத²ங் பனாயங் விபா⁴கோ³ யுஜ்ஜெய்ய. ஸகா³த²கஞ்ஹி ஸுத்தங் கெ³ய்யங், நிக்³கா³த²கங் ஸுத்தங் வெய்யாகரணங். தது³ப⁴யவினிமுத்தஞ்ச ஸுத்தங் உதா³னாதி³விஸேஸஸஞ்ஞாரஹிதங் நத்தி², யங் ஸுத்தங்க³ங் ஸியா. மங்க³லஸுத்தாதீ³னஞ்ச (கு²॰ பா॰ 5.1 ஆத³யோ; ஸு॰ நி॰ 261 ஆத³யோ) ஸுத்தங்க³ஸங்க³ஹோ ந ஸியா கா³தா²பா⁴வதோ த⁴ம்மபதா³தீ³னங் விய . கெ³ய்யங்க³ஸங்க³ஹோ வா ஸியா ஸகா³த²கத்தா ஸகா³தா²வக்³க³ஸ்ஸ விய. ததா² உப⁴தோவிப⁴ங்கா³தீ³ஸு ஸகா³த²கப்பதே³ஸானந்தி? வுச்சதே –
6. Chaṭṭhe appakaṃ sutaṃ hotīti navaṅgasatthusāsane kiñcideva sutaṃ hoti. Tadeva navaṅgasatthusāsanaṃ dassetuṃ ‘‘suttaṃ geyya’’ntiādi vuttaṃ. Tattha suttādīni vibhajitvā dassento ‘‘ubhatovibhaṅganiddesakkhandhakaparivārā’’tiādimāha. Kathaṃ panāyaṃ vibhāgo yujjeyya. Sagāthakañhi suttaṃ geyyaṃ, niggāthakaṃ suttaṃ veyyākaraṇaṃ. Tadubhayavinimuttañca suttaṃ udānādivisesasaññārahitaṃ natthi, yaṃ suttaṅgaṃ siyā. Maṅgalasuttādīnañca (khu. pā. 5.1 ādayo; su. ni. 261 ādayo) suttaṅgasaṅgaho na siyā gāthābhāvato dhammapadādīnaṃ viya . Geyyaṅgasaṅgaho vā siyā sagāthakattā sagāthāvaggassa viya. Tathā ubhatovibhaṅgādīsu sagāthakappadesānanti? Vuccate –
‘‘ஸுத்தந்தி ஸாமஞ்ஞவிதி⁴, விஸேஸவித⁴யோ பரே;
‘‘Suttanti sāmaññavidhi, visesavidhayo pare;
ஸனிமித்தா நிருள்ஹத்தா, ஸஹதாஞ்ஞேன நாஞ்ஞதோ’’. (நெத்தி॰ அட்ட²॰ ஸங்க³ஹவாரவண்ணனா; தீ³॰ நி॰ டீ॰ 1.பட²மமஹாஸங்கீ³திகதா²வண்ணனா; ஸாரத்த²॰ டீ॰ 1.பட²மமஹாஸங்கீ³திகதா²வண்ணனா)
Sanimittā niruḷhattā, sahatāññena nāññato’’. (netti. aṭṭha. saṅgahavāravaṇṇanā; dī. ni. ṭī. 1.paṭhamamahāsaṅgītikathāvaṇṇanā; sārattha. ṭī. 1.paṭhamamahāsaṅgītikathāvaṇṇanā)
ஸப்³ப³ஸ்ஸபி ஹி பு³த்³த⁴வசனஸ்ஸ ஸுத்தந்தி அயங் ஸாமஞ்ஞவிதி⁴. தேனேவாஹ ஆயஸ்மா மஹாகச்சானோ நெத்தியங் (நெத்தி॰ ஸங்க³ஹவாரோ) ‘‘நவவித⁴ஸுத்தந்தபரியெட்டீ²’’தி. எத்தகங் தஸ்ஸ ப⁴க³வதோ ஸுத்தாக³தங் ஸுத்தபரியாபன்னங் (பாசி॰ 655, 1242) ஸகவாதே³ பஞ்ச ஸுத்தஸதானீதி (த⁴॰ ஸ॰ அட்ட²॰ நிதா³னகதா²; கதா²॰ அட்ட²॰ நிதா³னகதா²) ஏவமாதி³ ச ஏதஸ்ஸ அத்த²ஸ்ஸ ஸாத⁴கங். விஸேஸவித⁴யோ பரே ஸனிமித்தா ததே³கதே³ஸேஸு கெ³ய்யாத³யோ விஸேஸவித⁴யோ தேன தேன நிமித்தேன பதிட்டி²தா. ததா² ஹி கெ³ய்யஸ்ஸ ஸகா³த²கத்தங் தப்³பா⁴வனிமித்தங். லோகேபி ஹி ஸஸிலோகங் ஸகா³த²கங் வா சுண்ணியக³ந்த²ங் ‘‘கெ³ய்ய’’ந்தி வத³ந்தி. கா³தா²விரஹே பன ஸதி புச்ச²ங் கத்வா விஸ்ஸஜ்ஜனபா⁴வோ வெய்யாகரணஸ்ஸ தப்³பா⁴வனிமித்தங். புச்சா²விஸ்ஸஜ்ஜனஞ்ஹி ‘‘ப்³யாகரண’’ந்தி வுச்சதி. ப்³யாகரணமேவ வெய்யாகரணங். ஏவங் ஸந்தே ஸகா³த²காதீ³னம்பி புச்ச²ங் கத்வா விஸ்ஸஜ்ஜனவஸேன பவத்தானங் வெய்யாகரணபா⁴வோ ஆபஜ்ஜதீதி? நாபஜ்ஜதி கெ³ய்யாதி³ஸஞ்ஞானங் அனோகாஸபா⁴வதோ, ‘‘கா³தா²விரஹே ஸதீ’’தி விஸேஸிதத்தா ச. ததா² ஹி த⁴ம்மபதா³தீ³ஸு கேவலங் கா³தா²ப³ந்தே⁴ஸு ஸகா³த²கத்தேபி ஸோமனஸ்ஸஞாணமயிககா³தா²யுத்தேஸு ‘‘வுத்தங் ஹேத’’ந்திஆதீ³வசனஸம்ப³ந்தே⁴ஸு அப்³பு⁴தத⁴ம்மப்படிஸங்யுத்தேஸு ச ஸுத்தவிஸேஸேஸு யதா²க்கமங் கா³தா²உதா³னஇதிவுத்தகஅப்³பு⁴தத⁴ம்மஸஞ்ஞா பதிட்டி²தா, ததா² ஸதிபி கா³தா²ப³ந்த⁴பா⁴வே ப⁴க³வதோ அதீதாஸு ஜாதீஸு சரியானுபா⁴வப்பகாஸகேஸு ஜாதகஸஞ்ஞா, ஸதிபி பஞ்ஹவிஸ்ஸஜ்ஜனபா⁴வே ஸகா³த²கத்தே ச கேஸுசி ஸுத்தந்தேஸு வேத³ஸ்ஸ லபா⁴பனதோ வேத³ல்லஸஞ்ஞா பதிட்டி²தாதி ஏவங் தேன தேன ஸகா³த²கத்தாதி³னா நிமித்தேன தேஸு தேஸு ஸுத்தவிஸேஸேஸு கெ³ய்யாதி³ஸஞ்ஞா பதிட்டி²தாதி விஸேஸவித⁴யோ ஸுத்தங்க³தோ பரே கெ³ய்யாத³யோ. யங் பனெத்த² கெ³ய்யங்கா³தி³னிமித்தரஹிதங், தங் ஸுத்தங்க³ங் விஸேஸஸஞ்ஞாபரிஹாரேன ஸாமஞ்ஞஸஞ்ஞாய பவத்தனதோ. நனு ச ஸகா³த²கங் ஸுத்தங் கெ³ய்யங், நிக்³கா³த²கங் ஸுத்தங் வெய்யாகரணந்தி ஸுத்தங்க³ங் ந ஸம்ப⁴வதீதி சோத³னா தத³வத்தா²வாதி? ந தத³வத்தா² ஸோதி⁴தத்தா. ஸோதி⁴தஞ்ஹி புப்³பே³ ‘‘கா³தா²விரஹே ஸதி புச்சா²விஸ்ஸஜ்ஜனபா⁴வோ வெய்யாகரணஸ்ஸ தப்³பா⁴வனிமித்த’’ந்தி.
Sabbassapi hi buddhavacanassa suttanti ayaṃ sāmaññavidhi. Tenevāha āyasmā mahākaccāno nettiyaṃ (netti. saṅgahavāro) ‘‘navavidhasuttantapariyeṭṭhī’’ti. Ettakaṃ tassa bhagavato suttāgataṃ suttapariyāpannaṃ (pāci. 655, 1242) sakavāde pañca suttasatānīti (dha. sa. aṭṭha. nidānakathā; kathā. aṭṭha. nidānakathā) evamādi ca etassa atthassa sādhakaṃ. Visesavidhayo pare sanimittā tadekadesesu geyyādayo visesavidhayo tena tena nimittena patiṭṭhitā. Tathā hi geyyassa sagāthakattaṃ tabbhāvanimittaṃ. Lokepi hi sasilokaṃ sagāthakaṃ vā cuṇṇiyaganthaṃ ‘‘geyya’’nti vadanti. Gāthāvirahe pana sati pucchaṃ katvā vissajjanabhāvo veyyākaraṇassa tabbhāvanimittaṃ. Pucchāvissajjanañhi ‘‘byākaraṇa’’nti vuccati. Byākaraṇameva veyyākaraṇaṃ. Evaṃ sante sagāthakādīnampi pucchaṃ katvā vissajjanavasena pavattānaṃ veyyākaraṇabhāvo āpajjatīti? Nāpajjati geyyādisaññānaṃ anokāsabhāvato, ‘‘gāthāvirahe satī’’ti visesitattā ca. Tathā hi dhammapadādīsu kevalaṃ gāthābandhesu sagāthakattepi somanassañāṇamayikagāthāyuttesu ‘‘vuttaṃ heta’’ntiādīvacanasambandhesu abbhutadhammappaṭisaṃyuttesu ca suttavisesesu yathākkamaṃ gāthāudānaitivuttakaabbhutadhammasaññā patiṭṭhitā, tathā satipi gāthābandhabhāve bhagavato atītāsu jātīsu cariyānubhāvappakāsakesu jātakasaññā, satipi pañhavissajjanabhāve sagāthakatte ca kesuci suttantesu vedassa labhāpanato vedallasaññā patiṭṭhitāti evaṃ tena tena sagāthakattādinā nimittena tesu tesu suttavisesesu geyyādisaññā patiṭṭhitāti visesavidhayo suttaṅgato pare geyyādayo. Yaṃ panettha geyyaṅgādinimittarahitaṃ, taṃ suttaṅgaṃ visesasaññāparihārena sāmaññasaññāya pavattanato. Nanu ca sagāthakaṃ suttaṃ geyyaṃ, niggāthakaṃ suttaṃ veyyākaraṇanti suttaṅgaṃ na sambhavatīti codanā tadavatthāvāti? Na tadavatthā sodhitattā. Sodhitañhi pubbe ‘‘gāthāvirahe sati pucchāvissajjanabhāvo veyyākaraṇassa tabbhāvanimitta’’nti.
யஞ்ச வுத்தங் – ‘‘கா³தா²பா⁴வதோ மங்க³லஸுத்தாதீ³னங் ஸுத்தங்க³ஸங்க³ஹோ ந ஸியா’’தி, தங் ந, நிருள்ஹத்தா. நிருள்ஹோ ஹி மங்க³லஸுத்தாதீ³னங் ஸுத்தபா⁴வோ. ந ஹி தானி த⁴ம்மபத³பு³த்³த⁴வங்ஸாத³யோ விய கா³தா²பா⁴வேன பஞ்ஞாதானி, அத² கோ² ஸுத்தபா⁴வேனேவ, தேனேவ ஹி அட்ட²கதா²யங் ‘‘ஸுத்தனாமக’’ந்தி நாமக்³க³ஹணங் கதங். யங் பன வுத்தங் ‘‘ஸகா³த²கத்தா கெ³ய்யங்க³ஸங்க³ஹோ ஸியா’’தி, தத³பி நத்தி², யஸ்மா ஸஹதாஞ்ஞேன. ஸஹ கா³தா²ஹீதி ஹி ஸகா³த²கங். ஸஹபா⁴வோ நாம அத்த²தோ அஞ்ஞேன ஹோதி, ந ச மங்க³லஸுத்தாதீ³ஸு கா³தா²வினிமுத்தோ கோசி ஸுத்தப்பதே³ஸோ அத்தி², யோ ‘‘ஸஹ கா³தா²ஹீ’’தி வுச்செய்ய, ந ச ஸமுதா³யோ நாம கோசி அத்தி². யத³பி வுத்தங் – ‘‘உப⁴தோவிப⁴ங்கா³தீ³ஸு ஸகா³த²கப்பதே³ஸானங் கெ³ய்யங்க³ஸங்க³ஹோ ஸியா’’தி, தத³பி ந, அஞ்ஞதோ. அஞ்ஞா ஏவ ஹி தா கா³தா² ஜாதகாதி³பரியாபன்னத்தா. அதோ ந தாஹி உப⁴தோவிப⁴ங்கா³தீ³னங் கெ³ய்யங்க³பா⁴வோதி. ஏவங் ஸுத்தாதீ³னங் அங்கா³னங் அஞ்ஞமஞ்ஞங் ஸங்கராபா⁴வோ வேதி³தப்³போ³. அயமெத்த² ஸங்கே²போ, வித்தா²ரோ பன ஸமந்தபாஸாதி³காய வினயஸங்வண்ணனாய ஸாரத்த²தீ³பனியா (ஸாரத்த²॰ டீ॰ 1.பட²மமஹாஸங்கீ³திகதா²வண்ணனா) அம்ஹேஹி பகாஸிதோ, இச்ச²ந்தேஹி ததோயேவ க³ஹேதப்³போ³.
Yañca vuttaṃ – ‘‘gāthābhāvato maṅgalasuttādīnaṃ suttaṅgasaṅgaho na siyā’’ti, taṃ na, niruḷhattā. Niruḷho hi maṅgalasuttādīnaṃ suttabhāvo. Na hi tāni dhammapadabuddhavaṃsādayo viya gāthābhāvena paññātāni, atha kho suttabhāveneva, teneva hi aṭṭhakathāyaṃ ‘‘suttanāmaka’’nti nāmaggahaṇaṃ kataṃ. Yaṃ pana vuttaṃ ‘‘sagāthakattā geyyaṅgasaṅgaho siyā’’ti, tadapi natthi, yasmā sahatāññena. Saha gāthāhīti hi sagāthakaṃ. Sahabhāvo nāma atthato aññena hoti, na ca maṅgalasuttādīsu gāthāvinimutto koci suttappadeso atthi, yo ‘‘saha gāthāhī’’ti vucceyya, na ca samudāyo nāma koci atthi. Yadapi vuttaṃ – ‘‘ubhatovibhaṅgādīsu sagāthakappadesānaṃ geyyaṅgasaṅgaho siyā’’ti, tadapi na, aññato. Aññā eva hi tā gāthā jātakādipariyāpannattā. Ato na tāhi ubhatovibhaṅgādīnaṃ geyyaṅgabhāvoti. Evaṃ suttādīnaṃ aṅgānaṃ aññamaññaṃ saṅkarābhāvo veditabbo. Ayamettha saṅkhepo, vitthāro pana samantapāsādikāya vinayasaṃvaṇṇanāya sāratthadīpaniyā (sārattha. ṭī. 1.paṭhamamahāsaṅgītikathāvaṇṇanā) amhehi pakāsito, icchantehi tatoyeva gahetabbo.
ந அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதீதி அட்ட²கதா²ஞ்ச பாளிஞ்ச ஜானித்வா லோகுத்தரத⁴ம்மஸ்ஸ அனுரூபத⁴ம்மங் புப்³ப³பா⁴க³ப்படிபத³ங் படிபன்னோ ந ஹோதீதி ஏவமெத்த² ஸம்ப³ந்தோ⁴ வேதி³தப்³போ³. தேனேவாஹ ‘‘ந அத்த²மஞ்ஞாய த⁴ம்மமஞ்ஞாயாதி அட்ட²கத²ஞ்ச பாளிஞ்ச ஜானித்வா…பே॰… ந படிபன்னோ ஹோதீ’’தி.
Na atthamaññāya dhammamaññāya dhammānudhammappaṭipanno hotīti aṭṭhakathāñca pāḷiñca jānitvā lokuttaradhammassa anurūpadhammaṃ pubbabhāgappaṭipadaṃ paṭipanno na hotīti evamettha sambandho veditabbo. Tenevāha ‘‘na atthamaññāya dhammamaññāyāti aṭṭhakathañca pāḷiñca jānitvā…pe… na paṭipanno hotī’’ti.
அப்பஸ்ஸுதஸுத்தவண்ணனா நிட்டி²தா.
Appassutasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. அப்பஸ்ஸுதஸுத்தங் • 6. Appassutasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. அப்பஸ்ஸுதஸுத்தவண்ணனா • 6. Appassutasuttavaṇṇanā
