| Library / Tipiṭaka / തിപിടക • Tipiṭaka / മഹാവഗ്ഗപാളി • Mahāvaggapāḷi |
൨൬൮. അപ്പടികമ്മേ ഉക്ഖേപനീയകമ്മപടിപ്പസ്സദ്ധികഥാ
268. Appaṭikamme ukkhepanīyakammapaṭippassaddhikathā
൪൪൯. ഇധ പന, ഭിക്ഖവേ, ഭിക്ഖു സങ്ഘേന ആപത്തിയാ അപ്പടികമ്മേ ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, ആപത്തിയാ അപ്പടികമ്മേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന ആപത്തിയാ അപ്പടികമ്മേ ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, ആപത്തിയാ അപ്പടികമ്മേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം ആപത്തിയാ അപ്പടികമ്മേ ഉക്ഖേപനീയകമ്മം പടിപ്പസ്സമ്ഭേമാ’’തി. തേ തസ്സ ആപത്തിയാ അപ്പടികമ്മേ ഉക്ഖേപനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ…പേ॰… അധമ്മേന സമഗ്ഗാ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ. തത്രട്ഠോ സങ്ഘോ വിവദതി – ‘‘അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, അകതം കമ്മം ദുക്കടം കമ്മം പുന കാതബ്ബം കമ്മ’’ന്തി. തത്ര, ഭിക്ഖവേ, യേ തേ ഭിക്ഖൂ ഏവമാഹംസു – ‘‘ധമ്മപതിരൂപകേന സമഗ്ഗകമ്മ’’ന്തി, യേ ച തേ ഭിക്ഖൂ ഏവമാഹംസു – ‘‘അകതം കമ്മം ദുക്കടം കമ്മം പുന കാതബ്ബം കമ്മ’’ന്തി, ഇമേ തത്ഥ ഭിക്ഖൂ ധമ്മവാദിനോ. ഇമേപി പഞ്ച വാരാ സംഖിത്താ.
449. Idha pana, bhikkhave, bhikkhu saṅghena āpattiyā appaṭikamme ukkhepanīyakammakato sammā vattati, lomaṃ pāteti, netthāraṃ vattati, āpattiyā appaṭikamme ukkhepanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena āpattiyā appaṭikamme ukkhepanīyakammakato sammā vattati, lomaṃ pāteti, netthāraṃ vattati, āpattiyā appaṭikamme ukkhepanīyassa kammassa paṭippassaddhiṃ yācati. Handassa mayaṃ āpattiyā appaṭikamme ukkhepanīyakammaṃ paṭippassambhemā’’ti. Te tassa āpattiyā appaṭikamme ukkhepanīyakammaṃ paṭippassambhenti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Imepi pañca vārā saṃkhittā.
അപ്പടികമ്മേ ഉക്ഖേപനീയകമ്മപടിപ്പസ്സദ്ധികഥാ നിട്ഠിതാ.
Appaṭikamme ukkhepanīyakammapaṭippassaddhikathā niṭṭhitā.
