| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၄၈. အပ္ပဋိနိသ္သဂ္ဂေ ဥက္ခေပနီယကမ္မကထာ
248. Appaṭinissagge ukkhepanīyakammakathā
၄၁၇. ဣဓ ပန, ဘိက္ခဝေ, ဘိက္ခု န ဣစ္ဆတိ ပာပိကံ ဒိဋ္ဌိံ ပဋိနိသ္သဇ္ဇိတုံ။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု န ဣစ္ဆတိ ပာပိကံ ဒိဋ္ဌိံ ပဋိနိသ္သဇ္ဇိတုံ။ ဟန္ဒသ္သ မယံ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခေပနီယကမ္မံ ကရောမာ’’တိ။ တေ တသ္သ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂာ။ သော တမ္ဟာ အာဝာသာ အညံ အာဝာသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု သင္ဃေန ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခေပနီယကမ္မကတော အဓမ္မေန ဝဂ္ဂေဟိ။ ဟန္ဒသ္သ မယံ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခေပနီယကမ္မံ ကရောမာ’’တိ။ တေ တသ္သ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခေပနီယကမ္မံ ကရောန္တိ – အဓမ္မေန သမဂ္ဂာ။ပေ.။ ဓမ္မေန ဝဂ္ဂာ။ ဓမ္မပတိရူပကေန ဝဂ္ဂာ။ ဓမ္မပတိရူပကေန သမဂ္ဂာ။ပေ.။။
417. Idha pana, bhikkhave, bhikkhu na icchati pāpikaṃ diṭṭhiṃ paṭinissajjituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu na icchati pāpikaṃ diṭṭhiṃ paṭinissajjituṃ. Handassa mayaṃ pāpikāya diṭṭhiyā appaṭinissagge ukkhepanīyakammaṃ karomā’’ti. Te tassa pāpikāya diṭṭhiyā appaṭinissagge ukkhepanīyakammaṃ karonti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena pāpikāya diṭṭhiyā appaṭinissagge ukkhepanīyakammakato adhammena vaggehi. Handassa mayaṃ pāpikāya diṭṭhiyā appaṭinissagge ukkhepanīyakammaṃ karomā’’ti. Te tassa pāpikāya diṭṭhiyā appaṭinissagge ukkhepanīyakammaṃ karonti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
စက္ကံ ကာတဗ္ဗံ။
Cakkaṃ kātabbaṃ.
အပ္ပဋိနိသ္သဂ္ဂေ ဥက္ခေပနီယကမ္မကထာ နိဋ္ဌိတာ။
Appaṭinissagge ukkhepanīyakammakathā niṭṭhitā.
