| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
269. අප්‌පටිනිස්‌සග්‌ගෙ උක්‌ඛෙපනීයකම්‌මපටිප්‌පස්‌සද්‌ධිකථා
269. Appaṭinissagge ukkhepanīyakammapaṭippassaddhikathā
450. ඉධ පන, භික්‌ඛවෙ, භික්‌ඛු සඞ්‌ඝෙන පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයස්‌ස කම්‌මස්‌ස පටිප්‌පස්‌සද්‌ධිං යාචති. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයස්‌ස කම්‌මස්‌ස පටිප්‌පස්‌සද්‌ධිං යාචති. හන්‌දස්‌ස මයං පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයකම්‌මං පටිප්‌පස්‌සම්‌භෙමා’’ති. තෙ තස්‌ස පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයකම්‌මං පටිප්‌පස්‌සම්‌භෙන්‌ති – අධම්‌මෙන වග්‌ගා…පෙ.… අධම්‌මෙන සමග්‌ගා… ධම්‌මෙන වග්‌ගා… ධම්‌මපතිරූපකෙන වග්‌ගා… ධම්‌මපතිරූපකෙන සමග්‌ගා. තත්‍රට්‌ඨො සඞ්‌ඝො විවදති – ‘‘අධම්‌මෙන වග්‌ගකම්‌මං, අධම්‌මෙන සමග්‌ගකම්‌මං, ධම්‌මෙන වග්‌ගකම්‌මං, ධම්‌මපතිරූපකෙන වග්‌ගකම්‌මං, ධම්‌මපතිරූපකෙන සමග්‌ගකම්‌මං, අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති. තත්‍ර, භික්‌ඛවෙ, යෙ තෙ භික්‌ඛූ එවමාහංසු – ‘‘ධම්‌මපතිරූපකෙන සමග්‌ගකම්‌ම’’න්‌ති, යෙ ච තෙ භික්‌ඛූ එවමාහංසු – ‘‘අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති, ඉමෙ තත්‌ථ භික්‌ඛූ ධම්‌මවාදිනො. ඉමෙපි පඤ්‌ච වාරා සංඛිත්‌තා.
450. Idha pana, bhikkhave, bhikkhu saṅghena pāpikāya diṭṭhiyā appaṭinissagge ukkhepanīyakammakato sammā vattati, lomaṃ pāteti, netthāraṃ vattati, pāpikāya diṭṭhiyā appaṭinissagge ukkhepanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena pāpikāya diṭṭhiyā appaṭinissagge ukkhepanīyakammakato sammā vattati, lomaṃ pāteti, netthāraṃ vattati, pāpikāya diṭṭhiyā appaṭinissagge ukkhepanīyassa kammassa paṭippassaddhiṃ yācati. Handassa mayaṃ pāpikāya diṭṭhiyā appaṭinissagge ukkhepanīyakammaṃ paṭippassambhemā’’ti. Te tassa pāpikāya diṭṭhiyā appaṭinissagge ukkhepanīyakammaṃ paṭippassambhenti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Imepi pañca vārā saṃkhittā.
අප්‌පටිනිස්‌සග්‌ගෙ උක්‌ඛෙපනීයකම්‌මපටිප්‌පස්‌සද්‌ධිකථා නිට්‌ඨිතා.
Appaṭinissagge ukkhepanīyakammapaṭippassaddhikathā niṭṭhitā.
චම්‌පෙය්‍යක්‌ඛන්‌ධකො නවමො.
Campeyyakkhandhako navamo.
