| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
262. அப்படினிஸ்ஸக்³கே³ உக்கே²பனீயகம்மவிவாத³கதா²
262. Appaṭinissagge ukkhepanīyakammavivādakathā
439. இத⁴ பன, பி⁴க்க²வே, பி⁴க்கு² ந இச்ச²தி பாபிகங் தி³ட்டி²ங் படினிஸ்ஸஜ்ஜிதுங். தத்ர சே பி⁴க்கூ²னங் ஏவங் ஹோதி – ‘‘அயங் கோ², ஆவுஸோ, பி⁴க்கு² ந இச்ச²தி பாபிகங் தி³ட்டி²ங் படினிஸ்ஸஜ்ஜிதுங். ஹந்த³ஸ்ஸ மயங் பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மங் கரோமா’’தி. தே தஸ்ஸ பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மங் கரொந்தி – அத⁴ம்மேன வக்³கா³…பே॰… அத⁴ம்மேன ஸமக்³கா³… த⁴ம்மேன வக்³கா³… த⁴ம்மபதிரூபகேன வக்³கா³… த⁴ம்மபதிரூபகேன ஸமக்³கா³. தத்ரட்டோ² ஸங்கோ⁴ விவத³தி – ‘‘அத⁴ம்மேன வக்³க³கம்மங், அத⁴ம்மேன ஸமக்³க³கம்மங், த⁴ம்மேன வக்³க³கம்மங், த⁴ம்மபதிரூபகேன வக்³க³கம்மங், த⁴ம்மபதிரூபகேன ஸமக்³க³கம்மங், அகதங் கம்மங் து³க்கடங் கம்மங் புன காதப்³ப³ங் கம்ம’’ந்தி. தத்ர, பி⁴க்க²வே, யே தே பி⁴க்கூ² ஏவமாஹங்ஸு – ‘‘த⁴ம்மபதிரூபகேன ஸமக்³க³கம்ம’’ந்தி, யே ச தே பி⁴க்கூ² ஏவமாஹங்ஸு – ‘‘அகதங் கம்மங் து³க்கடங் கம்மங் புன காதப்³ப³ங் கம்ம’’ந்தி, இமே தத்த² பி⁴க்கூ² த⁴ம்மவாதி³னோ. இமே பஞ்ச வாரா ஸங்கி²த்தா.
439. Idha pana, bhikkhave, bhikkhu na icchati pāpikaṃ diṭṭhiṃ paṭinissajjituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu na icchati pāpikaṃ diṭṭhiṃ paṭinissajjituṃ. Handassa mayaṃ pāpikāya diṭṭhiyā appaṭinissagge ukkhepanīyakammaṃ karomā’’ti. Te tassa pāpikāya diṭṭhiyā appaṭinissagge ukkhepanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
அப்படினிஸ்ஸக்³கே³ உக்கே²பனீயகம்மவிவாத³கதா² நிட்டி²தா.
Appaṭinissagge ukkhepanīyakammavivādakathā niṭṭhitā.
