| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. অপ্পটিৰিদিতসুত্তৰণ্ণনা
7. Appaṭividitasuttavaṇṇanā
৭. পৰত্তিনিৰত্তিতদুভযহেতুৰিভাগস্স ধম্মস্সপি চতুসচ্চন্তোগধত্তা আহ ‘‘ধম্মাতি চতুসচ্চধম্মা’’তি। চত্তারিপি হি অরিযসচ্চানি চতুসচ্চন্তোগধানি। অপ্পটিৰিদ্ধাতি পরিঞ্ঞাভিসমযাদিৰসেন অনভিসমিতা। দিট্ঠিগতৰাদেসূতি দিট্ঠিগতসঞ্ঞিতেসু ৰাদেসু। দিট্ঠিগতেহি তে পৰত্তিতা। ইতো পরেসন্তি ইতো সাসনিকেহি পরেসং অঞ্ঞেসং। ধম্মতাযাতি সভাৰেন, সযমেৰাতি অত্থো। গচ্ছন্তীতি পৰত্তন্তি দিট্ঠিৰাদং পগ্গয্হ তিট্ঠন্তি। পরেনাতি দিট্ঠিগতিকেন। নীযন্তীতি দিট্ঠিৰাদসঙ্গণ্হনে উয্যোজীযন্তি। তেনাহ ‘‘তত্থা’’তিআদি। পবুজ্ঝিতুন্তি পমাদনিদ্দায পটিবুজ্ঝিতুং। পটিপদা যথাদেসিতস্স ধম্মস্স কথিততায, পটিবুজ্ঝিতুং যোনিসো পৰত্তিযমানত্তা ভদ্দিকা।
7. Pavattinivattitadubhayahetuvibhāgassa dhammassapi catusaccantogadhattā āha ‘‘dhammāti catusaccadhammā’’ti. Cattāripi hi ariyasaccāni catusaccantogadhāni. Appaṭividdhāti pariññābhisamayādivasena anabhisamitā. Diṭṭhigatavādesūti diṭṭhigatasaññitesu vādesu. Diṭṭhigatehi te pavattitā. Ito paresanti ito sāsanikehi paresaṃ aññesaṃ. Dhammatāyāti sabhāvena, sayamevāti attho. Gacchantīti pavattanti diṭṭhivādaṃ paggayha tiṭṭhanti. Parenāti diṭṭhigatikena. Nīyantīti diṭṭhivādasaṅgaṇhane uyyojīyanti. Tenāha ‘‘tatthā’’tiādi. Pabujjhitunti pamādaniddāya paṭibujjhituṃ. Paṭipadā yathādesitassa dhammassa kathitatāya, paṭibujjhituṃ yoniso pavattiyamānattā bhaddikā.
হেতুনাতি ঞাযেন। কারণেনাতি চতুসচ্চানং সম্বোধযুত্তিযা। হত্থতলে আমলকং ৰিয সব্বং ঞেয্যং জানাতীতি সব্বঞ্ঞূ, তেনেৰ সব্বঞ্ঞুতাভিসম্বোধেন বুদ্ধোতি সব্বঞ্ঞুবুদ্ধো। পচ্চেকং পরেহি অসাধারণতায ৰিসুং সযম্ভুঞাণেন সচ্চানি বুদ্ধৰাতি পচ্চেকবুদ্ধো। পরোপদেসেন চতুসচ্চং বুজ্ঝতীতি চতুসচ্চবুদ্ধো। তথা হি সো সযম্ভুতায অভাৰতো কেৰলং চতুসচ্চবুদ্ধোতি ৰুচ্চতি। সুতেন সুতমযঞাণেন খন্ধাদিভেদং ঞেয্যং বুদ্ধৰাতি সুতবুদ্ধো। সব্বঞ্ঞুবুদ্ধপচ্চেকবুদ্ধে ঠপেত্ৰা অৰসেসা অগ্গসাৰকমহাসাৰকাপি পকতিসাৰকাপি ৰীতরাগা অৰসেসা খীণাসৰা। তযোপি পুরিমা ৰট্টন্তি সম্বুদ্ধাতিআদিৰচনতো। সন্নিৰসতি এতেনাতি সন্নিৰাসো, চরিতং। লোকস্স সন্নিৰাসো লোকসন্নিৰাসো, তস্মিং। কাযদুচ্চরিতাদিভেদে ৰিসমে। সতিসম্মোসেন ৰিসমে ৰা সত্তনিকাযে। সো হি ৰিসমযোগতো ৰিসমো। রাগৰিসমাদিকে ৰিসমে ৰা কিলেসজাতে। তং ৰিসমং পহায তং ৰিসমং অজ্ঝুপেক্খিত্ৰা সমং সদিসং যুত্তরূপং, পুরিমকেহি ৰা সম্বুদ্ধেহি সমং সদিসং চরন্তি ৰত্তন্তি।
Hetunāti ñāyena. Kāraṇenāti catusaccānaṃ sambodhayuttiyā. Hatthatale āmalakaṃ viya sabbaṃ ñeyyaṃ jānātīti sabbaññū, teneva sabbaññutābhisambodhena buddhoti sabbaññubuddho. Paccekaṃ parehi asādhāraṇatāya visuṃ sayambhuñāṇena saccāni buddhavāti paccekabuddho. Paropadesena catusaccaṃ bujjhatīti catusaccabuddho. Tathā hi so sayambhutāya abhāvato kevalaṃ catusaccabuddhoti vuccati. Sutena sutamayañāṇena khandhādibhedaṃ ñeyyaṃ buddhavāti sutabuddho. Sabbaññubuddhapaccekabuddhe ṭhapetvā avasesā aggasāvakamahāsāvakāpi pakatisāvakāpi vītarāgā avasesā khīṇāsavā. Tayopi purimā vaṭṭanti sambuddhātiādivacanato. Sannivasati etenāti sannivāso, caritaṃ. Lokassa sannivāso lokasannivāso, tasmiṃ. Kāyaduccaritādibhede visame. Satisammosena visame vā sattanikāye. So hi visamayogato visamo. Rāgavisamādike visame vā kilesajāte. Taṃ visamaṃ pahāya taṃ visamaṃ ajjhupekkhitvā samaṃ sadisaṃ yuttarūpaṃ, purimakehi vā sambuddhehi samaṃ sadisaṃ caranti vattanti.
অপ্পটিৰিদিতসুত্তৰণ্ণনা নিট্ঠিতা।
Appaṭividitasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৭. অপ্পটিৰিদিতসুত্তং • 7. Appaṭividitasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. অপ্পটিৰিদিতসুত্তৰণ্ণনা • 7. Appaṭividitasuttavaṇṇanā
