| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๗. อปฺปฎิวิทิตสุตฺตวณฺณนา
7. Appaṭividitasuttavaṇṇanā
๗. สตฺตเม ธมฺมาติ จตุสจฺจธมฺมาฯ อปฺปฎิวิทิตาติ ญาเณน อปฺปฎิวิทฺธาฯ ปรวาเทสูติ ทฺวาสฎฺฐิทิฎฺฐิคตวาเทสุฯ เต หิ อิโต ปเรสํ ติตฺถิยานํ วาทตฺตา ปรวาทา นามฯ นียเรติ อตฺตโน ธมฺมตายปิ คจฺฉนฺติ, ปเรนปิ นียนฺติฯ ตตฺถ สยเมว สสฺสตาทีนิ คณฺหนฺตา คจฺฉนฺติ นาม, ปรสฺส วจเนน ตานิ คณฺหนฺตา นียนฺติ นามฯ กาโล เตสํ ปพุชฺฌิตุนฺติ เตสํ ปุคฺคลานํ ปพุชฺฌิตุํ อยํ กาโลฯ โลกสฺมิญฺหิ พุโทฺธ อุปฺปโนฺน, ธโมฺม เทสิยติ, สโงฺฆ สุปฺปฎิปโนฺน, ปฎิปทา ภทฺทิกา, อิเม จ ปน มหาชนา วเฎฺฎ สุตฺตา นปฺปพุชฺฌนฺตีติ เทวตา อาหฯ สมฺพุทฺธาติ สมฺมา เหตุนา การเณน พุทฺธาฯ จตฺตาโร หิ พุทฺธา – สพฺพญฺญุพุโทฺธ, ปเจฺจกพุโทฺธ, จตุสจฺจพุโทฺธ, สุตพุโทฺธติฯ ตตฺถ สมติํสปารมิโย ปูเรตฺวา สมฺมาสโมฺพธิํ ปโตฺต สพฺพญฺญุพุโทฺธ นามฯ กปฺปสตสหสฺสาธิกานิ เทฺว อสเงฺขฺยยฺยานิ ปารมิโย ปูเรตฺวา สยมฺภุตํ ปโตฺต ปเจฺจกพุโทฺธ นามฯ อวเสสา ขีณาสวา จตุสจฺจพุทฺธา นามฯ พหุสฺสุโต สุตพุโทฺธ นามฯ อิมสฺมิํ อเตฺถ ตโยปิ ปุริมา วฎฺฎนฺติฯ สมฺมทญฺญาติ สมฺมา เหตุนา การเณน ชานิตฺวาฯ จรนฺติ วิสเม สมนฺติ วิสเม วา โลกสนฺนิวาเส วิสเม วา สตฺตนิกาเย วิสเม วา กิเลสชาเต สมํ จรนฺตีติฯ
7. Sattame dhammāti catusaccadhammā. Appaṭividitāti ñāṇena appaṭividdhā. Paravādesūti dvāsaṭṭhidiṭṭhigatavādesu. Te hi ito paresaṃ titthiyānaṃ vādattā paravādā nāma. Nīyareti attano dhammatāyapi gacchanti, parenapi nīyanti. Tattha sayameva sassatādīni gaṇhantā gacchanti nāma, parassa vacanena tāni gaṇhantā nīyanti nāma. Kālo tesaṃ pabujjhitunti tesaṃ puggalānaṃ pabujjhituṃ ayaṃ kālo. Lokasmiñhi buddho uppanno, dhammo desiyati, saṅgho suppaṭipanno, paṭipadā bhaddikā, ime ca pana mahājanā vaṭṭe suttā nappabujjhantīti devatā āha. Sambuddhāti sammā hetunā kāraṇena buddhā. Cattāro hi buddhā – sabbaññubuddho, paccekabuddho, catusaccabuddho, sutabuddhoti. Tattha samatiṃsapāramiyo pūretvā sammāsambodhiṃ patto sabbaññubuddho nāma. Kappasatasahassādhikāni dve asaṅkhyeyyāni pāramiyo pūretvā sayambhutaṃ patto paccekabuddho nāma. Avasesā khīṇāsavā catusaccabuddhā nāma. Bahussuto sutabuddho nāma. Imasmiṃ atthe tayopi purimā vaṭṭanti. Sammadaññāti sammā hetunā kāraṇena jānitvā. Caranti visame samanti visame vā lokasannivāse visame vā sattanikāye visame vā kilesajāte samaṃ carantīti.
อปฺปฎิวิทิตสุตฺตวณฺณนา นิฎฺฐิตาฯ
Appaṭividitasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๗. อปฺปฎิวิทิตสุตฺตํ • 7. Appaṭividitasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๗. อปฺปฎิวิทิตสุตฺตวณฺณนา • 7. Appaṭividitasuttavaṇṇanā
