| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. အပ္ပဋိဝိဒိတသုတ္တဝဏ္ဏနာ
7. Appaṭividitasuttavaṇṇanā
၇. ပဝတ္တိနိဝတ္တိတဒုဘယဟေတုဝိဘာဂသ္သ ဓမ္မသ္သပိ စတုသစ္စန္တောဂဓတ္တာ အာဟ ‘‘ဓမ္မာတိ စတုသစ္စဓမ္မာ’’တိ။ စတ္တာရိပိ ဟိ အရိယသစ္စာနိ စတုသစ္စန္တောဂဓာနိ။ အပ္ပဋိဝိဒ္ဓာတိ ပရိညာဘိသမယာဒိဝသေန အနဘိသမိတာ။ ဒိဋ္ဌိဂတဝာဒေသူတိ ဒိဋ္ဌိဂတသညိတေသု ဝာဒေသု။ ဒိဋ္ဌိဂတေဟိ တေ ပဝတ္တိတာ။ ဣတော ပရေသန္တိ ဣတော သာသနိကေဟိ ပရေသံ အညေသံ။ ဓမ္မတာယာတိ သဘာဝေန, သယမေဝာတိ အတ္ထော။ ဂစ္ဆန္တီတိ ပဝတ္တန္တိ ဒိဋ္ဌိဝာဒံ ပဂ္ဂယ္ဟ တိဋ္ဌန္တိ။ ပရေနာတိ ဒိဋ္ဌိဂတိကေန။ နီယန္တီတိ ဒိဋ္ဌိဝာဒသင္ဂဏ္ဟနေ ဥယ္ယောဇီယန္တိ။ တေနာဟ ‘‘တတ္ထာ’’တိအာဒိ။ ပဗုဇ္ဈိတုန္တိ ပမာဒနိဒ္ဒာယ ပဋိဗုဇ္ဈိတုံ။ ပဋိပဒာ ယထာဒေသိတသ္သ ဓမ္မသ္သ ကထိတတာယ, ပဋိဗုဇ္ဈိတုံ ယောနိသော ပဝတ္တိယမာနတ္တာ ဘဒ္ဒိကာ။
7. Pavattinivattitadubhayahetuvibhāgassa dhammassapi catusaccantogadhattā āha ‘‘dhammāti catusaccadhammā’’ti. Cattāripi hi ariyasaccāni catusaccantogadhāni. Appaṭividdhāti pariññābhisamayādivasena anabhisamitā. Diṭṭhigatavādesūti diṭṭhigatasaññitesu vādesu. Diṭṭhigatehi te pavattitā. Ito paresanti ito sāsanikehi paresaṃ aññesaṃ. Dhammatāyāti sabhāvena, sayamevāti attho. Gacchantīti pavattanti diṭṭhivādaṃ paggayha tiṭṭhanti. Parenāti diṭṭhigatikena. Nīyantīti diṭṭhivādasaṅgaṇhane uyyojīyanti. Tenāha ‘‘tatthā’’tiādi. Pabujjhitunti pamādaniddāya paṭibujjhituṃ. Paṭipadā yathādesitassa dhammassa kathitatāya, paṭibujjhituṃ yoniso pavattiyamānattā bhaddikā.
ဟေတုနာတိ ဉာယေန။ ကာရဏေနာတိ စတုသစ္စာနံ သမ္ဗောဓယုတ္တိယာ။ ဟတ္ထတလေ အာမလကံ ဝိယ သဗ္ဗံ ဉေယ္ယံ ဇာနာတီတိ သဗ္ဗညူ, တေနေဝ သဗ္ဗညုတာဘိသမ္ဗောဓေန ဗုဒ္ဓောတိ သဗ္ဗညုဗုဒ္ဓော။ ပစ္စေကံ ပရေဟိ အသာဓာရဏတာယ ဝိသုံ သယမ္ဘုဉာဏေန သစ္စာနိ ဗုဒ္ဓဝာတိ ပစ္စေကဗုဒ္ဓော။ ပရောပဒေသေန စတုသစ္စံ ဗုဇ္ဈတီတိ စတုသစ္စဗုဒ္ဓော။ တထာ ဟိ သော သယမ္ဘုတာယ အဘာဝတော ကေဝလံ စတုသစ္စဗုဒ္ဓောတိ ဝုစ္စတိ။ သုတေန သုတမယဉာဏေန ခန္ဓာဒိဘေဒံ ဉေယ္ယံ ဗုဒ္ဓဝာတိ သုတဗုဒ္ဓော။ သဗ္ဗညုဗုဒ္ဓပစ္စေကဗုဒ္ဓေ ဌပေတ္ဝာ အဝသေသာ အဂ္ဂသာဝကမဟာသာဝကာပိ ပကတိသာဝကာပိ ဝီတရာဂာ အဝသေသာ ခီဏာသဝာ။ တယောပိ ပုရိမာ ဝဋ္ဋန္တိ သမ္ဗုဒ္ဓာတိအာဒိဝစနတော။ သန္နိဝသတိ ဧတေနာတိ သန္နိဝာသော, စရိတံ။ လောကသ္သ သန္နိဝာသော လောကသန္နိဝာသော, တသ္မိံ။ ကာယဒုစ္စရိတာဒိဘေဒေ ဝိသမေ။ သတိသမ္မောသေန ဝိသမေ ဝာ သတ္တနိကာယေ။ သော ဟိ ဝိသမယောဂတော ဝိသမော။ ရာဂဝိသမာဒိကေ ဝိသမေ ဝာ ကိလေသဇာတေ။ တံ ဝိသမံ ပဟာယ တံ ဝိသမံ အဇ္ဈုပေက္ခိတ္ဝာ သမံ သဒိသံ ယုတ္တရူပံ, ပုရိမကေဟိ ဝာ သမ္ဗုဒ္ဓေဟိ သမံ သဒိသံ စရန္တိ ဝတ္တန္တိ။
Hetunāti ñāyena. Kāraṇenāti catusaccānaṃ sambodhayuttiyā. Hatthatale āmalakaṃ viya sabbaṃ ñeyyaṃ jānātīti sabbaññū, teneva sabbaññutābhisambodhena buddhoti sabbaññubuddho. Paccekaṃ parehi asādhāraṇatāya visuṃ sayambhuñāṇena saccāni buddhavāti paccekabuddho. Paropadesena catusaccaṃ bujjhatīti catusaccabuddho. Tathā hi so sayambhutāya abhāvato kevalaṃ catusaccabuddhoti vuccati. Sutena sutamayañāṇena khandhādibhedaṃ ñeyyaṃ buddhavāti sutabuddho. Sabbaññubuddhapaccekabuddhe ṭhapetvā avasesā aggasāvakamahāsāvakāpi pakatisāvakāpi vītarāgā avasesā khīṇāsavā. Tayopi purimā vaṭṭanti sambuddhātiādivacanato. Sannivasati etenāti sannivāso, caritaṃ. Lokassa sannivāso lokasannivāso, tasmiṃ. Kāyaduccaritādibhede visame. Satisammosena visame vā sattanikāye. So hi visamayogato visamo. Rāgavisamādike visame vā kilesajāte. Taṃ visamaṃ pahāya taṃ visamaṃ ajjhupekkhitvā samaṃ sadisaṃ yuttarūpaṃ, purimakehi vā sambuddhehi samaṃ sadisaṃ caranti vattanti.
အပ္ပဋိဝိဒိတသုတ္တဝဏ္ဏနာ နိဋ္ဌိတာ။
Appaṭividitasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. အပ္ပဋိဝိဒိတသုတ္တံ • 7. Appaṭividitasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. အပ္ပဋိဝိဒိတသုတ္တဝဏ္ဏနာ • 7. Appaṭividitasuttavaṇṇanā
