| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೭. ಅಪ್ಪಟಿವಿದಿತಸುತ್ತವಣ್ಣನಾ
7. Appaṭividitasuttavaṇṇanā
೭. ಪವತ್ತಿನಿವತ್ತಿತದುಭಯಹೇತುವಿಭಾಗಸ್ಸ ಧಮ್ಮಸ್ಸಪಿ ಚತುಸಚ್ಚನ್ತೋಗಧತ್ತಾ ಆಹ ‘‘ಧಮ್ಮಾತಿ ಚತುಸಚ್ಚಧಮ್ಮಾ’’ತಿ। ಚತ್ತಾರಿಪಿ ಹಿ ಅರಿಯಸಚ್ಚಾನಿ ಚತುಸಚ್ಚನ್ತೋಗಧಾನಿ। ಅಪ್ಪಟಿವಿದ್ಧಾತಿ ಪರಿಞ್ಞಾಭಿಸಮಯಾದಿವಸೇನ ಅನಭಿಸಮಿತಾ। ದಿಟ್ಠಿಗತವಾದೇಸೂತಿ ದಿಟ್ಠಿಗತಸಞ್ಞಿತೇಸು ವಾದೇಸು। ದಿಟ್ಠಿಗತೇಹಿ ತೇ ಪವತ್ತಿತಾ। ಇತೋ ಪರೇಸನ್ತಿ ಇತೋ ಸಾಸನಿಕೇಹಿ ಪರೇಸಂ ಅಞ್ಞೇಸಂ। ಧಮ್ಮತಾಯಾತಿ ಸಭಾವೇನ, ಸಯಮೇವಾತಿ ಅತ್ಥೋ। ಗಚ್ಛನ್ತೀತಿ ಪವತ್ತನ್ತಿ ದಿಟ್ಠಿವಾದಂ ಪಗ್ಗಯ್ಹ ತಿಟ್ಠನ್ತಿ। ಪರೇನಾತಿ ದಿಟ್ಠಿಗತಿಕೇನ। ನೀಯನ್ತೀತಿ ದಿಟ್ಠಿವಾದಸಙ್ಗಣ್ಹನೇ ಉಯ್ಯೋಜೀಯನ್ತಿ। ತೇನಾಹ ‘‘ತತ್ಥಾ’’ತಿಆದಿ। ಪಬುಜ್ಝಿತುನ್ತಿ ಪಮಾದನಿದ್ದಾಯ ಪಟಿಬುಜ್ಝಿತುಂ। ಪಟಿಪದಾ ಯಥಾದೇಸಿತಸ್ಸ ಧಮ್ಮಸ್ಸ ಕಥಿತತಾಯ, ಪಟಿಬುಜ್ಝಿತುಂ ಯೋನಿಸೋ ಪವತ್ತಿಯಮಾನತ್ತಾ ಭದ್ದಿಕಾ।
7. Pavattinivattitadubhayahetuvibhāgassa dhammassapi catusaccantogadhattā āha ‘‘dhammāti catusaccadhammā’’ti. Cattāripi hi ariyasaccāni catusaccantogadhāni. Appaṭividdhāti pariññābhisamayādivasena anabhisamitā. Diṭṭhigatavādesūti diṭṭhigatasaññitesu vādesu. Diṭṭhigatehi te pavattitā. Ito paresanti ito sāsanikehi paresaṃ aññesaṃ. Dhammatāyāti sabhāvena, sayamevāti attho. Gacchantīti pavattanti diṭṭhivādaṃ paggayha tiṭṭhanti. Parenāti diṭṭhigatikena. Nīyantīti diṭṭhivādasaṅgaṇhane uyyojīyanti. Tenāha ‘‘tatthā’’tiādi. Pabujjhitunti pamādaniddāya paṭibujjhituṃ. Paṭipadā yathādesitassa dhammassa kathitatāya, paṭibujjhituṃ yoniso pavattiyamānattā bhaddikā.
ಹೇತುನಾತಿ ಞಾಯೇನ। ಕಾರಣೇನಾತಿ ಚತುಸಚ್ಚಾನಂ ಸಮ್ಬೋಧಯುತ್ತಿಯಾ। ಹತ್ಥತಲೇ ಆಮಲಕಂ ವಿಯ ಸಬ್ಬಂ ಞೇಯ್ಯಂ ಜಾನಾತೀತಿ ಸಬ್ಬಞ್ಞೂ, ತೇನೇವ ಸಬ್ಬಞ್ಞುತಾಭಿಸಮ್ಬೋಧೇನ ಬುದ್ಧೋತಿ ಸಬ್ಬಞ್ಞುಬುದ್ಧೋ। ಪಚ್ಚೇಕಂ ಪರೇಹಿ ಅಸಾಧಾರಣತಾಯ ವಿಸುಂ ಸಯಮ್ಭುಞಾಣೇನ ಸಚ್ಚಾನಿ ಬುದ್ಧವಾತಿ ಪಚ್ಚೇಕಬುದ್ಧೋ। ಪರೋಪದೇಸೇನ ಚತುಸಚ್ಚಂ ಬುಜ್ಝತೀತಿ ಚತುಸಚ್ಚಬುದ್ಧೋ। ತಥಾ ಹಿ ಸೋ ಸಯಮ್ಭುತಾಯ ಅಭಾವತೋ ಕೇವಲಂ ಚತುಸಚ್ಚಬುದ್ಧೋತಿ ವುಚ್ಚತಿ। ಸುತೇನ ಸುತಮಯಞಾಣೇನ ಖನ್ಧಾದಿಭೇದಂ ಞೇಯ್ಯಂ ಬುದ್ಧವಾತಿ ಸುತಬುದ್ಧೋ। ಸಬ್ಬಞ್ಞುಬುದ್ಧಪಚ್ಚೇಕಬುದ್ಧೇ ಠಪೇತ್ವಾ ಅವಸೇಸಾ ಅಗ್ಗಸಾವಕಮಹಾಸಾವಕಾಪಿ ಪಕತಿಸಾವಕಾಪಿ ವೀತರಾಗಾ ಅವಸೇಸಾ ಖೀಣಾಸವಾ। ತಯೋಪಿ ಪುರಿಮಾ ವಟ್ಟನ್ತಿ ಸಮ್ಬುದ್ಧಾತಿಆದಿವಚನತೋ। ಸನ್ನಿವಸತಿ ಏತೇನಾತಿ ಸನ್ನಿವಾಸೋ, ಚರಿತಂ। ಲೋಕಸ್ಸ ಸನ್ನಿವಾಸೋ ಲೋಕಸನ್ನಿವಾಸೋ, ತಸ್ಮಿಂ। ಕಾಯದುಚ್ಚರಿತಾದಿಭೇದೇ ವಿಸಮೇ। ಸತಿಸಮ್ಮೋಸೇನ ವಿಸಮೇ ವಾ ಸತ್ತನಿಕಾಯೇ। ಸೋ ಹಿ ವಿಸಮಯೋಗತೋ ವಿಸಮೋ। ರಾಗವಿಸಮಾದಿಕೇ ವಿಸಮೇ ವಾ ಕಿಲೇಸಜಾತೇ। ತಂ ವಿಸಮಂ ಪಹಾಯ ತಂ ವಿಸಮಂ ಅಜ್ಝುಪೇಕ್ಖಿತ್ವಾ ಸಮಂ ಸದಿಸಂ ಯುತ್ತರೂಪಂ, ಪುರಿಮಕೇಹಿ ವಾ ಸಮ್ಬುದ್ಧೇಹಿ ಸಮಂ ಸದಿಸಂ ಚರನ್ತಿ ವತ್ತನ್ತಿ।
Hetunāti ñāyena. Kāraṇenāti catusaccānaṃ sambodhayuttiyā. Hatthatale āmalakaṃ viya sabbaṃ ñeyyaṃ jānātīti sabbaññū, teneva sabbaññutābhisambodhena buddhoti sabbaññubuddho. Paccekaṃ parehi asādhāraṇatāya visuṃ sayambhuñāṇena saccāni buddhavāti paccekabuddho. Paropadesena catusaccaṃ bujjhatīti catusaccabuddho. Tathā hi so sayambhutāya abhāvato kevalaṃ catusaccabuddhoti vuccati. Sutena sutamayañāṇena khandhādibhedaṃ ñeyyaṃ buddhavāti sutabuddho. Sabbaññubuddhapaccekabuddhe ṭhapetvā avasesā aggasāvakamahāsāvakāpi pakatisāvakāpi vītarāgā avasesā khīṇāsavā. Tayopi purimā vaṭṭanti sambuddhātiādivacanato. Sannivasati etenāti sannivāso, caritaṃ. Lokassa sannivāso lokasannivāso, tasmiṃ. Kāyaduccaritādibhede visame. Satisammosena visame vā sattanikāye. So hi visamayogato visamo. Rāgavisamādike visame vā kilesajāte. Taṃ visamaṃ pahāya taṃ visamaṃ ajjhupekkhitvā samaṃ sadisaṃ yuttarūpaṃ, purimakehi vā sambuddhehi samaṃ sadisaṃ caranti vattanti.
ಅಪ್ಪಟಿವಿದಿತಸುತ್ತವಣ್ಣನಾ ನಿಟ್ಠಿತಾ।
Appaṭividitasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೭. ಅಪ್ಪಟಿವಿದಿತಸುತ್ತಂ • 7. Appaṭividitasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭. ಅಪ್ಪಟಿವಿದಿತಸುತ್ತವಣ್ಣನಾ • 7. Appaṭividitasuttavaṇṇanā
